ന്യൂഡൽഹി: എക്സാലോജിക്–സിഎംആർഎൽ ഇടപാടുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് സംസ്ഥാന സർക്കാരിന് നൽകിയ കത്തിന്റെ പശ്ചാത്തലത്തിൽ രൂക്ഷ വിമർശനവുമായി സിപിഎം പോളിറ്റ് ബ്യൂറോ. കേന്ദ്ര അന്വേഷണ ഏജൻസിയുടെ നിർദേശങ്ങൾക്കനുസരിച്ച് പ്രവർത്തിക്കുന്ന നിലപാട് കേരളത്തിലെ യുഡിഎഫ് സർക്കാർ സ്വീകരിക്കരുതെന്ന് പിബി മുന്നറിയിപ്പ് നൽകി.
എക്സാലോജിക്–സിഎംആർഎൽ പണമിടപാടുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ, മകൾ ടി. വീണ, മുൻമന്ത്രി മുഹമ്മദ് റിയാസ് എന്നിവർക്കെതിരെ അഴിമതി നിരോധന നിയമപ്രകാരം കേസെടുക്കണമെന്നാവശ്യപ്പെട്ടാണ് ഇഡി കൊച്ചി മേധാവി സംസ്ഥാന പോലീസ് മേധാവിക്ക് കത്തയച്ചത്. ഇതിനെ രാഷ്ട്രീയ പകപോക്കലിന്റെ ഭാഗമെന്നാണ് സിപിഎം വിശേഷിപ്പിച്ചത്.
വീണയ്ക്കെതിരായ അന്വേഷണം പിണറായി വിജയനെ ലക്ഷ്യമിട്ടുള്ള നീക്കത്തിന്റെ ഭാഗമാണെന്ന ആരോപണവും പോളിറ്റ് ബ്യൂറോ ആവർത്തിച്ചു. പ്രതിപക്ഷ നേതാക്കളെ ലക്ഷ്യമിട്ട് കേന്ദ്ര ഏജൻസികളെ ഉപയോഗിക്കുന്ന മോദി സർക്കാരിന്റെ നടപടികളുടെ മറ്റൊരു ഉദാഹരണമാണ് ഇതെന്നും പിബി പ്രസ്താവനയിൽ ആരോപിച്ചു.
അതേസമയം, ഇഡി നടപടിയെ കെപിസിസി പ്രസിഡന്റ് പിന്തുണച്ചതും കേസെടുക്കണമെന്ന് ആവശ്യപ്പെട്ടതും കോൺഗ്രസിന്റെ ഇരട്ടത്താപ്പാണ് വ്യക്തമാക്കുന്നതെന്ന് സിപിഎം കുറ്റപ്പെടുത്തി. രാഹുൽ ഗാന്ധി ഉൾപ്പെടെയുള്ള കോൺഗ്രസ് നേതാക്കൾക്കെതിരായ ഇഡി നടപടികളെ ദേശീയ തലത്തിൽ കോൺഗ്രസ് എതിർക്കുമ്പോഴാണ് കേരളത്തിൽ വ്യത്യസ്ത നിലപാട് സ്വീകരിക്കുന്നതെന്നും പിബി ചൂണ്ടിക്കാട്ടി.
പിണറായി വിജയനെതിരെ കേസെടുക്കണമെന്ന് ആവശ്യപ്പെട്ട് ഒരു കോൺഗ്രസ് എംഎൽഎ നേരത്തെ വിജിലൻസ് കോടതിയെയും ഹൈക്കോടതിയെയും സുപ്രീം കോടതിയെയും സമീപിച്ചിരുന്നുവെന്നും എന്നാൽ ഹർജികൾ കോടതികൾ തള്ളിയിരുന്നുവെന്നും സിപിഎം ഓർമിപ്പിച്ചു. ഇപ്പോൾ അതേ വിഷയത്തിൽ വീണ്ടും കേസ് ഉയർത്തിക്കൊണ്ടുവരാനുള്ള ശ്രമമാണ് നടക്കുന്നതെന്നും പിബി ആരോപിച്ചു.
‘ഇഡിയുടെ ഏജന്റായി പ്രവർത്തിക്കരുത്’
ഇഡിയുടെ ഏജന്റായി പ്രവർത്തിക്കരുതെന്ന് സതീശൻ സർക്കാരിന് മുന്നറിയിപ്പ് നൽകുന്നതായും സിപിഎം പോളിറ്റ് ബ്യൂറോ വ്യക്തമാക്കി. രാഷ്ട്രീയ പകപോക്കലിനെ പാർട്ടി രാഷ്ട്രീയമായും നിയമപരമായും ശക്തമായി നേരിടുമെന്നും പ്രസ്താവനയിൽ അറിയിച്ചു.
ഇതിനിടെ, ഇഡി നടപടിക്കെതിരെ സിപിഎം ജനറൽ സെക്രട്ടറി എം.എ. ബേബിയും രംഗത്തെത്തി. സിപിഎമ്മിനെ ഭയപ്പെടുത്താനോ പിണറായി വിജയനെ ലക്ഷ്യമിടാനോ ആണ് ഇഡി ശ്രമിക്കുന്നതെങ്കിൽ അത് പരാജയപ്പെടുമെന്ന് അദ്ദേഹം എക്സിൽ കുറിച്ചു.
വിജിലൻസ് കോടതിയും ഹൈക്കോടതിയും സുപ്രീം കോടതിയും നേരത്തെ തള്ളിയ വിഷയത്തിൽ പിണറായി വിജയനെതിരെ എഫ്ഐആർ രജിസ്റ്റർ ചെയ്യാൻ കേരള പോലീസിനുമേൽ സമ്മർദം ചെലുത്താനുള്ള ശ്രമമാണ് ഇപ്പോൾ നടക്കുന്നതെന്നാണ് ബേബിയുടെ ആരോപണം.
മോദി സർക്കാർ കേന്ദ്ര അന്വേഷണ ഏജൻസികളെ, പ്രത്യേകിച്ച് ഇഡിയെ, രാഷ്ട്രീയ എതിരാളികളെ നേരിടാൻ ദുരുപയോഗം ചെയ്യുകയാണെന്ന ആരോപണവും ബേബി ആവർത്തിച്ചു. കേരളത്തിലെ കോൺഗ്രസ് നേതൃത്വത്തിലുള്ള യുഡിഎഫ് സർക്കാർ കേന്ദ്രത്തിന്റെ താൽപര്യങ്ങൾ നടപ്പാക്കുമെന്ന് ബിജെപി പ്രതീക്ഷിക്കുന്നുവെന്നും കെപിസിസി പ്രസിഡന്റ് ഇതിനോടകം അതിനുള്ള സന്നദ്ധത വ്യക്തമാക്കിയിട്ടുണ്ടെന്നും അദ്ദേഹം ആരോപിച്ചു.
കേരളത്തിലെ രാഷ്ട്രീയ സാഹചര്യത്തിൽ ആരൊക്കെയാണ് തമ്മിൽ ധാരണയിലെത്തിയിരിക്കുന്നതെന്ന് ഓരോ ദിവസം കഴിയുന്തോറും കൂടുതൽ വ്യക്തമാകുകയാണെന്നും ബേബി പറഞ്ഞു. കേന്ദ്ര ഏജൻസികളുടെ നടപടികളെയും അതിന് പിന്നിലെ രാഷ്ട്രീയ നീക്കങ്ങളെയും സിപിഎം രാഷ്ട്രീയമായും നിയമപരമായും നേരിടുമെന്നും അദ്ദേഹം വ്യക്തമാക്കി.
