തിരുവനന്തപുരം: ശബരിമല സ്വർണക്കൊള്ള കേസിൽ ഒരാളെയും സംരക്ഷിക്കില്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ. തിരുവിതാംകൂർ ദേവസ്വം ബോർഡ് മുൻ പ്രസിഡന്റ് എ പത്മകുമാറിനെ അറസ്റ്റ് ചെയ്ത പശ്ചാത്തലത്തിലായിരുന്നു എം വി ഗോവിന്ദന്റെ പ്രതികരണം. അറസ്റ്റ് ചെയ്തതുകൊണ്ട് ആരും കുറ്റക്കാരനാകുന്നില്ലെന്നും സിപിഎം സംസ്ഥാന സെക്രട്ടറി പറഞ്ഞു.
'ഒരാളെയും സംരക്ഷിക്കില്ല. ആർക്കുവേണ്ടിയും നിലപാട് വ്യത്യസ്തമായി എടുക്കില്ല. അറസ്റ്റ് ചെയ്തതുകൊണ്ട് കുറ്റവാളിയാകുന്നില്ല. പകുതിവെന്തിട്ട് നിലപാട് സ്വീകരിക്കേണ്ട കാര്യമില്ല. നല്ലോണം വേവട്ടെ'- എം വി ഗോവിന്ദൻ പറഞ്ഞു. ആരോപണവിധേയൻ കുറ്റക്കാരനാണോയെന്ന് കോടതിയാണ് പറയേണ്ടത്. ശിക്ഷിക്കപ്പെടുകയാണെങ്കിൽ അപ്പോൾ നിലപാട് സ്വീകരിക്കുമെന്നും അദ്ദേഹം കൂട്ടിച്ചേർത്തു.
അറസ്റ്റ് ചെയ്താൽ അതിന്റെ അർത്ഥം കുറ്റാരോപിതൻ എന്നുമാത്രമാണെന്ന് സിപിഎം സംസ്ഥാന സെക്രട്ടറി ചൂണ്ടിക്കാട്ടി. ആരെ വേണമെങ്കിലും ചോദ്യം ചെയ്യാം, അറസ്റ്റ് ചെയ്യാം. സിപിഎമ്മിന്റെ കൈകൾ ശുദ്ധമാണ്. പിന്നെന്തിന് ഭയപ്പെടണം. ശബരിമലയിലെ ഒരുതരി സ്വർണം പോലും നഷ്ടപ്പെടരുതെന്നും എം വി ഗോവിന്ദൻ പറഞ്ഞു.
