തിരുവനന്തപുരം: നാളത്തെ മന്ത്രിസഭാ യോഗത്തിൽ നിന്നും സിപിഐ മന്ത്രിമാർ വിട്ടുനിൽക്കും. സിപിഐ സംസ്ഥാന സെക്രട്ടറിയേറ്റ് യോഗത്തിലാണ് ഇതുസംബന്ധിച്ച് തീരുമാനം എടുത്തത്. പിഎംശ്രീ പദ്ധതി ധാരണാപത്രം റദ്ദാക്കണമെന്ന നിലപാടിൽ പാർട്ടി ഉറച്ചുനിൽക്കുകയാണ്. കഴിഞ്ഞദിവസം ചേർന്ന എക്‌സിക്യൂട്ടീവ് യോഗത്തിലെ തീരുമാനം ഇന്ന് ഓൺലൈനായി ചേർന്ന സെക്രട്ടറിയേറ്റ് യോഗവും അംഗീകരിക്കുകയായിരുന്നു.
ഇന്നു രാവിലെ ആരംഭിച്ച സെക്രട്ടേറിയറ്റ്‌ യോഗം ഉച്ചവരെ നീണ്ടു. നാളെ നടക്കുന്ന മന്ത്രിസഭാ യോഗത്തിൽ സിപിഐ മന്ത്രിമാരായ കെ. രാജൻ, പി. പ്രസാദ്, ജി.ആർ. അനിൽ, ചിഞ്ചുറാണി എന്നിവർ പങ്കെടുക്കേണ്ടെന്ന നിർദേശമാണ് നൽകിയിരിക്കുന്നത്. സെക്രട്ടേറിയേറ്റിനു ശേഷം മാധ്യമങ്ങളോട് പ്രതികരിക്കാതെ സിപിഐ സംസ്ഥാന സെക്രട്ടറി ബിനോയ് വിശ്വം മടങ്ങി.
ബുധനാഴ്ച രാവിലെ പത്തുമണിക്കായിരുന്നു മന്ത്രിസഭാ യോഗം നടക്കേണ്ടിയിരുന്നത്. എന്നാൽ, അത് ഉച്ചകഴിഞ്ഞ് 3.30-ന് ചേരാൻ തീരുമാനിച്ചിട്ടുണ്ട്. മുഖ്യമന്ത്രിയും സിപിഐ നേതൃത്വവുമായി ചർച്ച നടത്തി സമവായത്തിലെത്താനുള്ള സാധ്യതകൾ മുന്നിൽക്കണ്ടാണ് ഇതെന്നാണ് സൂചന.
