കൊച്ചി: ഇന്ത്യൻ ശിക്ഷാ നിയമത്തിലെ (IPC) 498എ വകുപ്പ് പ്രകാരമുള്ള കുറ്റകൃത്യത്തിന് തുടർച്ചയായ ക്രൂരകൃത്യങ്ങളുടെ പരമ്പര തന്നെ വേണമെന്നില്ലെന്ന് കേരള ഹൈക്കോടതി വ്യക്തമാക്കി. ഒറ്റപ്പെട്ട ഒരു ഗുരുതരമായ ക്രൂരത പോലും ഈ വകുപ്പ് പ്രകാരം കുറ്റകരമാക്കാൻ പര്യാപ്തമാണെന്ന് കോടതി നിരീക്ഷിച്ചു.
ജസ്റ്റിസ് ജോബിൻ സെബാസ്റ്റ്യനാണ് ഈ സുപ്രധാന ഉത്തരവ് പുറപ്പെടുവിച്ചത്. ദമ്പതികൾ തമ്മിലുള്ള എല്ലാ അഭിപ്രായവ്യത്യാസങ്ങളും പീഡനങ്ങളുമൊന്നും 498എ പ്രകാരമുള്ള 'ക്രൂരത'യുടെ പരിധിയിൽ വരില്ലെന്ന് കോടതി വ്യക്തമാക്കി. കുടുംബജീവിതത്തിലെ സ്വാഭാവികമായ ചെറിയ തോതിലുള്ള പ്രശ്നങ്ങളെയും, നിയമപ്രകാരം കുറ്റകരമാകുന്ന ഗൗരവമേറിയ പെരുമാറ്റങ്ങളെയും വേർതിരിച്ചു കാണേണ്ടതുണ്ട്.
അതേസമയം, സംഭവങ്ങൾ ആവർത്തിച്ചില്ല എന്ന ഒറ്റക്കാരണത്താൽമാത്രം പ്രോസിക്യൂഷൻ നടപടികൾ തള്ളിക്കളയാനാവില്ലെന്നും കോടതി വ്യക്തമാക്കി. 498എ വകുപ്പിന്റെ പരിധിയിൽ വരുന്ന തരത്തിലുള്ള ഗൗരവമുള്ളതാണെങ്കിൽ ഒരു ഒറ്റപ്പെട്ട സംഭവം പോലും ക്രൂരതയായി കണക്കാക്കാം.
സംഭവങ്ങളുടെ എണ്ണം എണ്ണിക്കണക്കാക്കുന്നതിന് പകരം ആരോപിക്കപ്പെടുന്ന കുറ്റകൃത്യത്തിന്റെ സ്വഭാവം, ഗൗരവം, പശ്ചാത്തലം, അതിന്റെ പ്രത്യാഘാതങ്ങൾ എന്നിവയാണ് കോടതികൾ വിലയിരുത്തേണ്ടതെന്ന് ഈ വിധി ഓർമ്മിപ്പിക്കുന്നു. എങ്കിലും, നിയമപ്രകാരം ക്രൂരത സ്ഥിരീകരിക്കുന്നതിന് വ്യക്തമായ വസ്തുതകൾ വേണമെന്നും, അവ്യക്തവും പൊതുവായതുമായ ആരോപണങ്ങൾക്ക് നിലനിൽപ്പില്ലെന്നും കോടതി കൂട്ടിച്ചേർത്തു.
