ബെംഗളൂരു: ഏറ്റവും നീളം കൂടിയ ഭൂഗർഭ മെട്രോ പാതയായ ഡയറി സർക്കിൾ–നാഗവാര ഭാഗം നിർമാണത്തിന്റെ അവസാനഘട്ടത്തിലേക്ക് കടന്നു. 21.25 കിലോമീറ്റർ ദൈർഘ്യമുള്ള പിങ്ക് ലൈനിലെ 13.76 കിലോമീറ്റർ ഭൂഗർഭ പാതയിൽ നവംബർ–ഡിസംബർ മാസങ്ങളിൽ പരീക്ഷണ ഓട്ടം ആരംഭിക്കാനാണ് ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് (BMRCL) ലക്ഷ്യമിടുന്നത്. പൂർണ പിങ്ക് ലൈൻ 2027 മാർച്ചോടെ തുറക്കുകയാണ് ലക്ഷ്യം.
ഡയറി സർക്കിൾ മുതൽ നാഗവാര വരെയുള്ള ഭൂഗർഭ ഭാഗത്ത് പന്ത്രണ്ട് സ്റ്റേഷനുകളാണുള്ളത്. ടണലിംഗ് 2024 ഒക്ടോബറിലും  ട്രാക്ക് ലേയിംഗ് 2026 മേയിലും പൂർത്തിയായതാണ്. എന്നാൽ വൈദ്യുതി, സിഗ്നലിംഗ്, ടെലികമ്മ്യൂണിക്കേഷൻ, വെന്റിലേഷൻ, അഗ്നിശമന സംവിധാനം, എസ്കലേറ്റർ–ലിഫ്റ്റ് ഉൾപ്പെടെയുള്ള വിവിധ സിസ്റ്റം ജോലികൾ കൂടുതൽ സമയം എടുത്തു.
ഡയറി സർക്കിൾ മുതൽ പോട്ടറി ടൗൺ വരെയുള്ള എട്ട് സ്റ്റേഷനുകളിൽ 750V DC തേർഡ് റെയിൽ സംവിധാനത്തിന്റെ സ്ഥാപിക്കലും വൈദ്യുതീകരണവും പൂർത്തിയായി. ടാനറി റോഡ്–നാഗവാര ഭാഗത്തെ ശേഷിക്കുന്ന നാല് സ്റ്റേഷനുകളിലെ ജോലികളും ഉടൻ പൂർത്തിയാക്കാനാണ് നീക്കം. ട്രാക്ഷൻ, ഇലക്ട്രിക്കൽ–മെക്കാനിക്കൽ ജോലികൾ പുരോഗമിക്കുകയാണ്. ഔട്ട്ഡോർ സിഗ്നലിംഗ് പൂർത്തിയായപ്പോൾ ഇൻഡോർ സിഗ്നലിംഗ് തുടരുകയാണ്.
ബെംഗളൂരുവിലെ മെട്രോ ശൃംഖലയിൽ ആദ്യമായി ഈ ഭൂഗർഭപാതയിലെ സ്റ്റേഷനുകളിൽ പ്ലാറ്റ്‌ഫോം സ്‌ക്രീൻ ഡോറുകൾ (PSD) സ്ഥാപിക്കും. യാത്രക്കാർ അബദ്ധത്തിൽ ട്രാക്കിലേക്ക് വീഴുന്നത് തടയുന്നതിനൊപ്പം ട്രെയിൻ സിഗ്നലിംഗ് സംവിധാനവുമായി ഏകോപിപ്പിച്ചാണ് ഇവ പ്രവർത്തിക്കുക. PSD ഉപകരണങ്ങൾ ചൈനയിൽ നിന്ന് എത്തിക്കാനുള്ള നടപടികൾ പുരോഗമിക്കുകയാണ്.
അതേസമയം, ഡയറി സർക്കിൾ–എംജി റോഡ് ഭാഗത്തെ കൈനമാറ്റിക് എൻവലപ്പ് (KE) പരിശോധനകൾക്കായി ട്രെയിനുകൾ ഉടൻ എത്തിക്കും. ട്രെയിനിന്റെയും ട്രാക്കിന്റെയും ചലനത്തിനും സുരക്ഷാ പരിധികൾക്കും അനുയോജ്യമായ സ്ഥലം ഉറപ്പാക്കുന്നതാണ് ഈ പരിശോധനയുടെ ലക്ഷ്യം.
എല്ലാ സംവിധാനങ്ങളും സംയോജിപ്പിച്ച ശേഷം രണ്ടോ മൂന്നോ മാസത്തിനുള്ളിൽ മുഴുവൻ ഭൂഗർഭപാതയിലും പരീക്ഷണഓട്ടം നടത്താനാണ് പദ്ധതി. നവംബർ–ഡിസംബർ മാസങ്ങളിൽ ട്രയൽ റൺ ആരംഭിക്കുമെന്നാണ് BMRCL ഉദ്യോഗസ്ഥർ പറയുന്നത്.
പരീക്ഷണ ഓട്ടങ്ങൾക്ക് ശേഷം റോളിംഗ് സ്റ്റോക്ക് അനുമതിയും കമ്മീഷണർ ഓഫ് മെട്രോ റെയിൽ സേഫ്റ്റി (CMRS) അനുമതിയും ഉൾപ്പെടെയുള്ള നിയമപരമായ നടപടികൾ പൂർത്തിയാക്കും. ശേഷിക്കുന്ന ഫാൾസ് സീലിംഗ്, തറ ടൈലിംഗ്, സ്റ്റേഷൻ പെയിന്റിംഗ് തുടങ്ങിയ സിവിൽ ജോലികളും ഇതോടൊപ്പം തുടരും.
2027 മാർച്ചിൽ പിങ്ക് ലൈൻ പൂർണമായി പ്രവർത്തനക്ഷമമാകുന്നതോടെ ബെംഗളൂരുവിന്റെ വടക്കും തെക്കും ഭാഗങ്ങളെ നഗരമധ്യത്തിലൂടെ നേരിട്ട് ബന്ധിപ്പിക്കുന്ന പ്രധാന മെട്രോ ഇടനാഴി യാഥാർഥ്യമാകും. എം ജി റോഡ് സ്റ്റേഷനാണ് പർപ്പിൾ ലൈൻ, പിങ്ക് ലൈൻ എന്നിവ ബന്ധിപ്പിക്കുന്ന ഇന്റർ ചേഞ്ച്‌ സ്റ്റേഷനായി മാറുന്നത്.

Photo Courtesy - Google