ന്യൂഡൽഹി: വരുന്ന പശ്ചിമ ബംഗാൾ നിയമസഭാ തെരഞ്ഞെടുപ്പിൽ കോൺഗ്രസ് ഒറ്റയ്ക്ക് മത്സരിക്കാൻ തീരുമാനിച്ചു. സംസ്ഥാനത്തെ ആകെ 294 സീറ്റുകളിലും ആരുമായും സഖ്യമില്ലാതെ മത്സരിക്കാനാണ് ഡൽഹിയിൽ ചേർന്ന ഉന്നതതല യോഗത്തിൽ തീരുമാനമായത്. കോൺഗ്രസ് ദേശീയ അദ്ധ്യക്ഷൻ മല്ലികാർജുൻ ഖർഗെയുടെ വസതിയിൽ ചേർന്ന യോഗത്തിലാണ് നിർണായക തീരുമാനം കൈക്കൊണ്ടത്.

ഏകദേശം ഇരുപത് വർഷങ്ങൾക്ക് ശേഷമാണ് കോൺഗ്രസ് ബംഗാളിൽ ഒറ്റയ്ക്ക് തെരഞ്ഞെടുപ്പിനെ നേരിടാൻ ഒരുങ്ങുന്നത്. 2006ലെ നിയമസഭാ തെരഞ്ഞെടുപ്പിൽ ഒറ്റയ്ക്ക് മത്സരിച്ച കോൺഗ്രസിന് 21 സീറ്റുകൾ ലഭിച്ചിരുന്നു. 2011ൽ തൃണമൂൽ കോൺഗ്രസുമായി സഖ്യം ചേർന്ന് ഇടതുമുന്നണി ഭരണത്തെ അധികാരത്തിൽ നിന്ന് മാറ്റുന്നതിൽ കോൺഗ്രസ് പങ്കാളിയായി. ആ തെരഞ്ഞെടുപ്പിൽ പാർട്ടിക്ക് 42 സീറ്റുകൾ ലഭിച്ചു. 2016ൽ സിപിഎമ്മിനൊപ്പം സഖ്യത്തിലായിരുന്നു കോൺഗ്രസിന്റെ മത്സരമെങ്കിലും 44 സീറ്റുകളിൽ വിജയം കൈവരിച്ചു. എന്നാൽ 2021ൽ ഇടതുമുന്നണിയുമായുള്ള സഖ്യം തുടർന്നിട്ടും ഒരു സീറ്റിൽ പോലും വിജയിക്കാനായിരുന്നില്ല.

പാർട്ടിയുടെ ദീർഘകാല വളർച്ചയ്ക്ക് സഖ്യരാഷ്ട്രീയത്തേക്കാൾ ഒറ്റയ്ക്കുള്ള മത്സരമാണ് ഗുണകരമെന്ന നിലപാടാണ് സംസ്ഥാന കോൺഗ്രസിലെ ഒരു വിഭാഗം മുന്നോട്ടുവയ്ക്കുന്നത്. സഖ്യങ്ങളെ അമിതമായി ആശ്രയിച്ചതാണ് പാർട്ടിയുടെ അടിത്തറ ദുർബലമാക്കിയതെന്ന വിമർശനവും ഇവർ ഉയർത്തുന്നുണ്ട്. 1996ൽ 288 സീറ്റുകളിൽ മത്സരിച്ച് 82 സീറ്റുകൾ നേടിയ പാർട്ടിക്ക് 2021ൽ ഒരു സീറ്റും നേടാനായില്ലെന്ന കണക്കും ഇതിന് ഉദാഹരണമായി ചൂണ്ടിക്കാട്ടപ്പെടുന്നു.

കോൺഗ്രസ് ദേശീയ നേതാക്കളും ബംഗാൾ സംസ്ഥാന നേതാക്കളും യോഗത്തിൽ പങ്കെടുത്തു. ഖർഗെയ്ക്ക് പുറമെ രാഹുൽ ഗാന്ധി, കെ.സി. വേണുഗോപാൽ, സംസ്ഥാനത്തിന്റെ ചുമതലയുള്ള എഐസിസി ജനറൽ സെക്രട്ടറി ഗുലാം അഹ്‌മദ് മിർ, സംസ്ഥാന അദ്ധ്യക്ഷൻ ശുഭാങ്കർ സർക്കാർ, മുതിർന്ന നേതാക്കളായ ആധിർ രഞ്ജൻ ചൗധരി, ഇഷ കിഷൻ ചൗധരി എംപി എന്നിവരും യോഗത്തിൽ സന്നിഹിതരായിരുന്നു.

ഏപ്രിൽ–മെയ് മാസങ്ങളിൽ നടക്കാനിരിക്കുന്നതായി പ്രതീക്ഷിക്കുന്ന നിയമസഭാ തെരഞ്ഞെടുപ്പിൽ സ്വീകരിക്കേണ്ട രാഷ്ട്രീയ തന്ത്രങ്ങളെക്കുറിച്ചാണ് യോഗത്തിൽ വിശദമായ ചർച്ച നടന്നതെന്ന് ഗുലാം അഹ്‌മദ് മിർ മാധ്യമപ്രവർത്തകരോട് പറഞ്ഞു. വിവിധ അഭിപ്രായങ്ങൾ പരിഗണിച്ച ശേഷമാണ് സംസ്ഥാനത്തെ മുഴുവൻ സീറ്റുകളിലും ഒറ്റയ്ക്ക് മത്സരിക്കാൻ കോൺഗ്രസ് തീരുമാനിച്ചതെന്നും അതനുസരിച്ചുള്ള തയ്യാറെടുപ്പുകൾ ആരംഭിക്കുമെന്നും അദ്ദേഹം വ്യക്തമാക്കി.