തിരുവനന്തപുരം: തദ്ദേശ സ്വയംഭരണ തിരഞ്ഞെടുപ്പ് അടുത്തിരിക്കെ, ഇടതുപക്ഷത്തോട് അടുക്കുന്ന എൻ.എസ്.എസിനെ അനുനയിപ്പിക്കാനുള്ള വഴികൾ തേടി കോൺഗ്രസ് നേതൃത്വം. അടുത്തിടെ നടന്ന അയ്യപ്പസംഗമവും ശബരിമല വിഷയത്തിലെ സർക്കാർ അനുകൂല നിലപാടും എൻ.എസ്.എസ്സിന് സർക്കാരിനോടുള്ള സമീപനത്തിൽ മാറ്റം വരുത്തിയിട്ടുണ്ട്. ഈ സാഹചര്യം യു.ഡി.എഫിന്റെ പ്രചാരണ തന്ത്രങ്ങളെ ദുർബലപ്പെടുത്തുമോയെന്ന ആശങ്കയിലാണ് കോൺഗ്രസ്.
സാധാരണയായി 'സമദൂരം' നിലപാടെടുക്കാറുണ്ടെങ്കിലും എൻ.എസ്.എസ്സിന്റെ വോട്ട് ബാങ്ക് യു.ഡി.എഫിന് നിർണായകമാണ്. ഈ ബന്ധത്തിൽ വിള്ളൽ വീണത് കോൺഗ്രസിനെ അലോസരപ്പെടുത്തുന്നുണ്ട്. കെ.പി.സി.സി. അധ്യക്ഷനോ പ്രതിപക്ഷ നേതാവോ നേരിട്ട് ഇടപെടണമെന്നും അല്ലെങ്കിൽ എ.ഐ.സി.സി. ജനറൽ സെക്രട്ടറി കെ.സി. വേണുഗോപാൽ വഴിയുള്ള ഇടപെടലുകൾ നടത്തണമെന്നും അഭിപ്രായങ്ങളുണ്ട്.
എന്നാൽ, നിലവിലെ കെ.പി.സി.സി. അധ്യക്ഷനും പ്രതിപക്ഷ നേതാവിനും എൻ.എസ്.എസ് നേതൃത്വവുമായി അത്ര നല്ല ബന്ധമില്ലാത്തതിനാൽ, പി.ജെ. കുര്യൻ, രമേശ് ചെന്നിത്തല, കെ. മുരളീധരൻ, തിരുവഞ്ചൂർ രാധാകൃഷ്ണൻ തുടങ്ങിയ മുതിർന്ന നേതാക്കളെ അനുനയ ചർച്ചകൾക്കായി ചുമതലപ്പെടുത്താൻ സാധ്യതയുണ്ട്. ശബരിമല വിഷയത്തിൽ എൻ.എസ്.എസ്സിനെ ശക്തമായി പിന്തുണച്ച ബി.ജെ.പി.യെ ഈ നീക്കം നിരാശപ്പെടുത്തിയിട്ടുണ്ട്. എൻ.എസ്.എസ്സിന്റെ നിലപാടിനെതിരെ ബി.ജെ.പി. നേതാക്കളായ കുമ്മനം രാജശേഖരൻ ഉൾപ്പെടെയുള്ളവർ പരസ്യമായി പ്രതികരിക്കുകയും ചെയ്തു.
