പാലക്കാട്: യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാജി വച്ച രാഹുൽ മാങ്കൂട്ടത്തിൽ എം.എൽ.എയ്ക്കെതിരെയും അദ്ദേഹത്തെ പിന്തുണച്ച ഷാഫി പറമ്പിൽ എം.പിക്ക് എതിരെയും കോൺഗ്രസിനുള്ളിൽ പടയൊരുക്കം ശക്തം. പാലക്കാട് കോൺഗ്രസിലെ ഒരു വിഭാഗം നേതാക്കളും പ്രവർത്തകരും ഇരുവരുടെയും നടപടികളിൽ അതൃപ്തി രേഖപ്പെടുത്തി ഹൈക്കമാൻഡിന് പരാതി നൽകി.
പൂരം ഫണ്ടും പുതിയ കാറും വിവാദത്തിൽ
പാലക്കാട് ഉപതിരഞ്ഞെടുപ്പ് സമയത്ത് വലിയ ഫണ്ട് കൈകാര്യം ചെയ്ത രാഹുൽ മാങ്കൂട്ടത്തിൽ, ഈ പണം എന്തു ചെയ്തെന്ന് വ്യക്തമാക്കണമെന്ന് വിമർശകർ ആവശ്യപ്പെടുന്നു. "പൂരപ്പറമ്പിലെ പോക്കറ്റടിക്കാരെപ്പോലെയാണ് ഇവർ," എന്ന് വിമർശകർ ആരോപിക്കുന്നു. എം.എൽ.എ ആയ ശേഷം രാഹുൽ വാങ്ങിയ കാറിന് പണം എവിടെ നിന്നാണ് ലഭിച്ചതെന്നും ഇവർ ചോദിക്കുന്നു. രാഹുലിന്റെ സ്വഭാവദൂഷ്യം കാരണം നേരത്തെയും സ്ഥാനാർത്ഥിത്വത്തെ എതിർത്തിരുന്നതായും പാർട്ടിയിൽ ആരോപണമുണ്ട്.
യൂത്ത് കോൺഗ്രസ് അധ്യക്ഷ സ്ഥാനം രാജി വച്ച രാഹുൽ മാങ്കൂട്ടത്തിലിനെ ഇത്രയും കാലം സംരക്ഷിച്ചത് ഷാഫി പറമ്പിലാണെന്നും വിമർശനം ഉയർന്നിട്ടുണ്ട്. പാലക്കാട് ഉപതിരഞ്ഞെടുപ്പിൽ രാഹുലിനെ സ്ഥാനാർത്ഥിയാക്കാൻ ഷാഫി പറമ്പിൽ സമ്മർദ്ദം ചെലുത്തിയിരുന്നു. ഡി.സി.സി പ്രസിഡന്റ് ഉൾപ്പെടെയുള്ള മുതിർന്ന നേതാക്കൾ കെ. മുരളീധരനെ സ്ഥാനാർത്ഥിയാക്കാൻ ആവശ്യപ്പെട്ട് കെ.പി.സി.സിക്ക് കത്ത് നൽകിയിട്ടും, അതൊന്നും പരിഗണിക്കാതെയാണ് രാഹുലിനെ സ്ഥാനാർത്ഥിയാക്കിയതെന്നാണ് ഒരു വിഭാഗം പ്രവർത്തകരുടെ ആരോപണം. രാഹുലിനെതിരെ ആരോപണങ്ങൾ ഉയർന്നിട്ടും ഷാഫി പറമ്പിൽ ഇതുവരെ പ്രതികരിച്ചിട്ടില്ലെന്നതും ഇവരുടെ അതൃപ്തിക്ക് കാരണമായി.
രാഹുലിനെതിരെ പൊലീസ് കേസെടുക്കാൻ തിടുക്കം കാട്ടില്ല
നിർബന്ധിത ഗർഭഛിദ്രത്തിന് യുവതിയെ പ്രേരിപ്പിച്ചെന്ന രാഹുൽ മാങ്കൂട്ടത്തിനെതിരെയുള്ള പരാതിയിൽ പോലീസ് ഉടൻ കേസെടുക്കില്ല. പരാതിക്കാരനായ ഷിന്റോ സെബാസ്റ്റ്യന് മാധ്യമങ്ങളിൽ വന്ന വാർത്തകൾക്കപ്പുറം കൂടുതൽ തെളിവുകൾ ഹാജരാക്കാൻ സാധിച്ചിട്ടില്ല. അതിനാൽ കൂടുതൽ തെളിവുകൾ ലഭിച്ചാൽ മാത്രം കേസെടുത്താൽ മതിയെന്ന് പോലീസിന് നിയമോപദേശം ലഭിച്ചിട്ടുണ്ട്. ഇതിന്റെ അടിസ്ഥാനത്തിൽ തിടുക്കപ്പെട്ട് കേസെടുത്താൽ കോടതിയിൽ തിരിച്ചടി നേരിടേണ്ടി വരുമെന്നും പോലീസ് വിലയിരുത്തുന്നു. രാഹുൽ മാങ്കൂട്ടത്തിനെതിരെ ഷിന്റോ ബാലാവകാശ കമ്മീഷനിലും പരാതി നൽകിയിട്ടുണ്ട്.
എം.എൽ.എ സ്ഥാനം രാജി വയ്ക്കേണ്ടെന്ന് കോൺഗ്രസ് ധാരണ
ലൈംഗിക ആരോപണങ്ങളെ തുടർന്ന് യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാജി വച്ചെങ്കിലും, രാഹുൽ മാങ്കൂട്ടത്തിൽ എം.എൽ.എ സ്ഥാനം തത്കാലം രാജി വയ്ക്കേണ്ടെന്ന് കോൺഗ്രസിൽ ധാരണയായി. ആരോപണങ്ങൾ രാഷ്ട്രീയമായി നേരിടാൻ ഇത് ആവശ്യമാണെന്ന് നേതൃത്വം കണക്കുകൂട്ടുന്നു. രാഹുലിനെതിരെയുള്ള ആരോപണങ്ങളുടെ നിജസ്ഥിതി അന്വേഷിക്കാൻ പ്രത്യേക സമിതിയെ നിയോഗിക്കുന്നതിനെക്കുറിച്ചും കെ.പി.സി.സി നേതൃത്വം ആലോചിക്കുന്നുണ്ട്.
മറ്റൊരു പെൺകുട്ടിയും രാഹുലിനെതിരെ ലൈംഗികാരോപണവുമായി രംഗത്തെത്തിയിട്ടുണ്ട്. പാലക്കാട്ടെ പൊതുപരിപാടികളിൽ നിന്ന് രാഹുലിനെ ഒഴിവാക്കിയിട്ടുണ്ട്. രാഹുലിനെ സംരക്ഷിക്കാൻ വി.ഡി. സതീശനും ഷാഫി പറമ്പിലും ശ്രമിക്കുന്നുണ്ടെന്ന് ആരോപിച്ച് ഒരു വിഭാഗം കോൺഗ്രസുകാർ രഹസ്യ നീക്കം ആരംഭിച്ചു. അതേസമയം, തനിക്ക് പരാതി ലഭിച്ചിട്ടില്ലെന്ന് വി.ഡി. സതീശൻ വ്യക്തമാക്കി. ഷാഫി പറമ്പിൽ ഈ വിഷയത്തിൽ ഇതുവരെ പ്രതികരിച്ചിട്ടില്ല.
പുതിയ സാഹചര്യത്തിൽ യൂത്ത് കോൺഗ്രസ് അധ്യക്ഷനെ ചൊല്ലിയുള്ള തർക്കവും രൂക്ഷമായി. ഭരണമാറ്റത്തിന് സാധ്യത കാണുന്ന ഘട്ടത്തിൽ കോൺഗ്രസിലുണ്ടായ ഈ പ്രതിസന്ധി ഹൈക്കമാൻഡിനെയും അലോസരപ്പെടുത്തുന്നുണ്ട്. രാഹുലിനെതിരെ കേസ് രജിസ്റ്റർ ചെയ്യാത്ത സാഹചര്യത്തിൽ രാജി വേണ്ടെന്നാണ് പാർട്ടിയുടെ നിലപാട്. സമാനമായ വിഷയങ്ങളിൽ മുമ്പ് സി.പി.എം എം.എൽ.എ ആയിരുന്ന മുകേഷിനെതിരെ കേസെടുക്കുകയും പിന്നീട് ജാമ്യം ലഭിക്കുകയും ചെയ്തിരുന്നു. കൂടാതെ എ.കെ. ശശീന്ദ്രൻ മന്ത്രിസ്ഥാനം രാജി വച്ചപ്പോഴും എം.എൽ.എ സ്ഥാനത്ത് തുടർന്നിരുന്നു. ഈ വിഷയങ്ങളും കോൺഗ്രസ് നേതൃത്വം ഉദാഹരണമായി ചൂണ്ടിക്കാട്ടുന്നു.
