കാഞ്ഞിരപ്പള്ളി: കൂവപ്പള്ളിയിൽ ഷേർളിയും ജോബും മരിച്ച സംഭവത്തിൽ പൊലീസ് അന്വേഷണം കൂടുതൽ ഊർജിതമാക്കി. ഇരുവരുടെയും ബന്ധവും ഷേർലി സ്വന്തം ജീവിതത്തെക്കുറിച്ച് പലരോടും പറഞ്ഞ പരസ്പരവിരുദ്ധ വിവരങ്ങളും കേസിൽ പുതിയ ദുരൂഹതകൾ സൃഷ്ടിക്കുകയാണ്. നെടുങ്കണ്ടം കല്ലാർ തുരുത്തി സ്വദേശിനിയായ ഷേർലി മാത്യു (45), കോട്ടയം കുമ്മനം ആലുംമൂട് കുരുട്ടുപറമ്പിൽ സ്വദേശിയായ ജോബ് സക്കറിയ (38) എന്നിവരാണ് മരിച്ചത്. ഷേർലിയെ കൊലപ്പെടുത്തിയ ശേഷം ജോബ് ആത്മഹത്യ ചെയ്തതാകാമെന്നതാണ് പൊലീസിന്റെ പ്രാഥമിക നിഗമനം. 

കഴിഞ്ഞ എട്ടുമാസമായി ജോബ് ഷേർലിയോടൊപ്പം കുളപ്പുറത്തെ വീട്ടിൽ താമസിച്ചിരുന്നെങ്കിലും, നാട്ടുകാർക്ക് ഇയാളെ പരിചയപ്പെടുത്തിയിരുന്നത് ബന്ധുവായോ സഹോദരനായോ ആയിരുന്നു. വീടിന്റെ നിർമാണകാലത്ത് ഷേർലിയോടൊപ്പം ഉണ്ടായിരുന്ന ഒരാളെ ഭർത്താവാണെന്നും അവർ ചിലരോടു പറഞ്ഞിരുന്നതായി സമീപവാസികൾ പറയുന്നു. ഷേർലിയുടെ ജീവിതകഥ ഓരോരുത്തരോടും വ്യത്യസ്തമായിരുന്നുവെന്നാണ് പൊലീസ് വിലയിരുത്തൽ. ചിലരോട് ഭർത്താവ് മരിച്ചുവെന്ന് പറഞ്ഞപ്പോൾ, മറ്റുചിലരോട് ഭർത്താവ് വിദേശത്താണെന്നും മക്കൾ പുറത്താണെന്നും അവൾ പറഞ്ഞു. ഒരു മകൾ മരിച്ചുവെന്ന കഥയും ചിലരോട് പങ്കുവെച്ചിരുന്നു. ഇതെല്ലാം തന്നെ അന്വേഷണസംഘം വിശദമായി പരിശോധിക്കുകയാണ്.

എട്ടുമാസം മുൻപാണ് ഷേർലി കൂവപ്പള്ളിക്ക് സമീപം കുളപ്പുറത്ത് സ്ഥലം വാങ്ങി വീട് നിർമിച്ചത്. ഭർത്താവിന്റെ മരണത്തെ തുടർന്നാണ് അവൾ കാഞ്ഞിരപ്പള്ളിയിലേക്ക് എത്തിയത്. തുടക്കത്തിൽ മുക്കാലിയിൽ വാടകയ്ക്ക് താമസിച്ച ശേഷം സ്വന്തമായി വീട് പണിയുകയായിരുന്നു. വെള്ളിയാഴ്ച, ഷേർലിയുടെ മുൻബന്ധത്തിൽ ഉണ്ടായ മകൻ ഈ വീട്ടിലെത്തിയിരുന്നതായും നാട്ടുകാർ പറയുന്നു.

ഷേർലിക്കും ജോബിനും തമ്മിൽ സാമ്പത്തിക തർക്കങ്ങളുണ്ടായിരുന്നുവെന്ന് പൊലീസ് സ്ഥിരീകരിച്ചു. ഷേർലി ജോബിന് പണം നൽകാനുണ്ടെന്നായിരുന്നു ജോബിന്റെ പരാതി; മറിച്ച് ജോബ് തന്നെ പണം നൽകാനുണ്ടെന്നായിരുന്നു ഷേർലിയുടെ നിലപാട്. ബന്ധം വഷളായതോടെ കഴിഞ്ഞ ഏകദേശം ഒരു മാസമായി ജോബ് വീട്ടിലെത്താറില്ലായിരുന്നുവെന്നാണ് വിവരം. ഇതിനിടെ ഷേർലിക്ക് പെട്ടെന്നു ദേഷ്യം വരുന്നതടക്കമുള്ള മാനസിക പ്രശ്നങ്ങൾ ഉണ്ടായിരുന്നുവെന്നും, മുൻബന്ധത്തിലെ മകനും ജോബും ചേർന്ന് അവളെ കൊച്ചിയിൽ ചികിത്സയ്ക്കായി കൊണ്ടുപോയിരുന്നുവെന്നും പൊലീസ് പറയുന്നു.

സംഭവദിവസം ജോബുമായി തർക്കമുണ്ടായെന്നും തന്റെ ജീവന് ഭീഷണിയുണ്ടെന്നും ഷേർലി സുഹൃത്തിനോട് ഫോണിൽ അറിയിച്ചിരുന്നു. പിന്നീട് രാത്രിയിൽ സുഹൃത്ത് വിളിച്ചപ്പോൾ ഫോൺ എടുക്കാതിരുന്നതോടെയാണ് പൊലീസിൽ വിവരം അറിയിച്ചത്. പരിശോധനയ്ക്കെത്തിയ പൊലീസ്, കിടപ്പുമുറിയിൽ രക്തം വാർന്നു മരിച്ച നിലയിൽ ഷേർലിയെയും, ഹാളിലെ സ്റ്റെയർകേസ് കമ്പിയിൽ തൂങ്ങിമരിച്ച നിലയിൽ ജോബിനെയും കണ്ടെത്തുകയായിരുന്നു.

മൂർച്ചയുള്ള ആയുധം ഉപയോഗിച്ച് ഷേർലിയെ കഴുത്തിൽ കുത്തിക്കൊലപ്പെടുത്തിയ ശേഷം ജോബ് ആത്മഹത്യ ചെയ്തതാകാമെന്നാണ് പ്രാഥമിക കണ്ടെത്തൽ. എന്നാൽ കൊലപാതകത്തിന് ഉപയോഗിച്ച ആയുധം ഇതുവരെ കണ്ടെത്താനായിട്ടില്ല. കേസിലെ എല്ലാ വശങ്ങളും പരിശോധിച്ച് അന്വേഷണം തുടരുകയാണെന്ന് പൊലീസ് അറിയിച്ചു.