​ദോഹ: അന്തരിച്ച ഖത്തർ മുൻ ഭരണാധികാരിയും ഫാദർ അമീറുമായ ഷെയ്ഖ് ഹമദ് ബിൻ ഖലീഫ അൽഥാനിയോടുള്ള ആദരസൂചകമായി ലോകമെമ്പാടുമുള്ള ഖത്തർ എംബസികളിൽ അനുശോചന പ്രവാഹം. വിവിധ രാജ്യങ്ങളിലെ ഭരണത്തലവന്മാരും ഉന്നത ഉദ്യോഗസ്ഥരും നയതന്ത്രപ്രതിനിധികളും അതത് രാജ്യങ്ങളിലെ ഖത്തർ എംബസികൾ സന്ദർശിച്ച് ആദരാഞ്ജലികൾ അർപ്പിച്ചു. പരേതന്റെ ആത്മാവിന് നിത്യശാന്തി നേർന്ന അവർ, ഖത്തർ ഭരണകൂടത്തോടും ജനങ്ങളോടും തങ്ങളുടെ അഗാധമായ ദുഃഖവും അനുഭാവവും രേഖപ്പെടുത്തി.ഇന്തോനേഷ്യ: ഇന്തോനേഷ്യൻ പ്രസിഡന്റ് പ്രബോവോ സുബിയാന്തോ ജക്കാർത്തയിലെ ഖത്തർ എംബസിയിലെത്തി അനുശോചനം രേഖപ്പെടുത്തി. വൈസ് പ്രസിഡന്റ് ജിബ്രാൻ രാകബൂമിങ് രാക ഇന്തോനേഷ്യയിലെ പ്രസിദ്ധമായ ഇസ്തിഖ്ലാൽ പള്ളിയിൽ ഫാദർ അമീറിനായി നടന്ന മയ്യിത്ത് നമസ്കാരത്തിൽ (ഗായിബ് നമസ്കാരം) പങ്കെടുത്തു.
​ബ്രിട്ടൻ: യുകെ വിദേശകാര്യ സെക്രട്ടറി യെവെറ്റ് കൂപ്പർ ലണ്ടനിലെ ഖത്തർ എംബസി സന്ദർശിച്ച് ബ്രിട്ടീഷ് സർക്കാരിന്റെ ദുഃഖം അറിയിച്ചു.
​സൗദി അറേബ്യ: റിയാദ് ഗവർണർ ഫൈസൽ ബിൻ ബന്ദർ ബിൻ അബ്ദുൽ അസീസ് അൽ സൗദ് റിയാദിലെ ഖത്തർ എംബസിയിലെത്തി ആദരാഞ്ജലികൾ അർപ്പിച്ചു.
​തുർക്കി: തുർക്കി പ്രതിരോധ മന്ത്രി യാസർ ഗുലർ അങ്കാറയിലെ ഖത്തർ എംബസിയിലെത്തി അനുശോചനം രേഖപ്പെടുത്തി.
​സൈപ്രസ്: സൈപ്രസ് പ്രസിഡന്റ് ഡോ. നിക്കോസ് ക്രിസ്റ്റോഡൗലിഡസ് നികോസിയയിലെ എംബസി സന്ദർശിച്ചു.
​ഫിലിപ്പീൻസ്: വൈസ് പ്രസിഡന്റ് സാറ ദുതെർതെ മനിലയിലെ ഖത്തർ എംബസിയിലെത്തി അനുശോചനം അറിയിച്ചു.
​ബ്രൂണെ: ബ്രൂണെ കിരീടാവകാശിയും പ്രധാനമന്ത്രിയുടെ ഓഫീസിലെ സീനിയർ മന്ത്രിയുമായ പ്രിൻസ് അൽ-മുഹ്തദീ ബില്ലാഹ് നേരിട്ടെത്തി ദുഃഖം പങ്കുവെച്ചു.
​ഘാന: ഘാന പ്രസിഡന്റ് ജോൺ ദ്രാമനി മഹാവ അക്രയിലെ ഖത്തർ എംബസി സന്ദർശിച്ചു.
​ഇവർക്ക് പുറമേ അസർബൈജാൻ പ്രധാനമന്ത്രി അലി അസദോവ്, മെക്സിക്കോ, ഡൊമിനിക്കൻ റിപ്പബ്ലിക് തുടങ്ങിയ ലാറ്റിൻ അമേരിക്കൻ രാജ്യങ്ങളിലെ വിദേശകാര്യ സഹമന്ത്രിമാർ തുടങ്ങിയ പ്രമുഖരും അതത് എംബസികളിലെത്തി ഖത്തർ ജനതയുടെ ദുഃഖത്തിൽ പങ്കുചേർന്നു. ആഗോളതലത്തിൽ ഖത്തറിനും ഫാദർ അമീറിനും ഉണ്ടായിരുന്ന നയതന്ത്ര സ്വാധീനത്തിന്റെയും ബഹുമാനത്തിന്റെയും തെളിവായി വിദേശ രാജ്യങ്ങളിലെ ഈ അനുശോചന പ്രവാഹം മാറി.