രാവിലെ എഴുന്നേറ്റ ഉടൻ ഒരു കപ്പ് ചൂടുള്ള കാപ്പി കുടിക്കുന്നത് പലരുടെയും ദിനചര്യയുടെ ഭാഗമാണ്. ഉറക്കച്ചടവ് മാറ്റാനും ഉന്മേഷം നൽകാനും കാപ്പിക്ക് കഴിയുമെന്നത് നേരത്തെ തന്നെ അറിയപ്പെട്ട കാര്യമാണ്. എന്നാൽ കാപ്പിയുടെ ഗുണങ്ങൾ അതിൽ മാത്രം ഒതുങ്ങുന്നില്ലെന്നാണ് പുതിയ പഠനം സൂചിപ്പിക്കുന്നത്. കുടലിലെ സൂക്ഷ്മജീവികളും തലച്ചോറും തമ്മിലുള്ള ബന്ധത്തിലും കാപ്പി നിർണായകമായ മാറ്റങ്ങൾ സൃഷ്ടിക്കാമെന്നാണ് ഗവേഷകർ കണ്ടെത്തിയിരിക്കുന്നത്.

അയർലൻഡിലെ യൂണിവേഴ്സിറ്റി കോളജ് കോർക്കിലെ എപിസി മൈക്രോബയോം നടത്തിയ പഠനത്തിലാണ് കാപ്പിയുടെ ഈ സ്വാധീനം പരിശോധിച്ചത്. പഠനം Nature Communications എന്ന ശാസ്ത്ര ജേണലിൽ പ്രസിദ്ധീകരിച്ചിട്ടുണ്ട്.

കാപ്പിയും കുടൽ-മസ്തിഷ്ക ബന്ധവും

കുടലിലെ സൂക്ഷ്മജീവികളും മസ്തിഷ്കവും തമ്മിലുള്ള ആശയവിനിമയത്തെ മൈക്രോബയോട്ട-ഗട്ട്-ബ്രെയിൻ ആക്സിസ് എന്നാണ് വിളിക്കുന്നത്. ദഹനം, മാനസികാവസ്ഥ, പ്രതിരോധശേഷി തുടങ്ങിയ നിരവധി ശാരീരിക പ്രവർത്തനങ്ങളുമായി ഈ സംവിധാനം ബന്ധപ്പെട്ടിരിക്കുന്നു.

62 പേരെ ഉൾപ്പെടുത്തിയാണ് പഠനം നടത്തിയത്. ദിവസവും മൂന്ന് മുതൽ അഞ്ച് കപ്പ് വരെ കാപ്പി കുടിക്കുന്നവരെയും കാപ്പി കഴിക്കാത്തവരെയും ഗവേഷകർ താരതമ്യം ചെയ്തു. കാപ്പി ഉപയോഗിച്ചിരുന്നവരോട് രണ്ടാഴ്ചത്തേക്ക് കാപ്പി പൂർണമായി ഒഴിവാക്കാനും തുടർന്ന് വ്യത്യസ്ത തരത്തിലുള്ള കാപ്പി നൽകാനും ഗവേഷകർ നിർദേശിച്ചു.

പങ്കെടുത്തവരിൽ ചിലർക്ക് സാധാരണ കാപ്പിയും മറ്റുള്ളവർക്ക് കഫീൻ നീക്കം ചെയ്ത ഡീകാഫ് കാപ്പിയുമാണ് നൽകിയത്. ഇതുവഴി കാപ്പിയുടെ ഗുണങ്ങൾ കഫീനുമായി മാത്രം ബന്ധപ്പെട്ടതാണോ എന്ന് പരിശോധിക്കുകയായിരുന്നു ലക്ഷ്യം.

കാപ്പി വീണ്ടും തുടങ്ങിയപ്പോൾ സമ്മർദം കുറഞ്ഞു

കഫീൻ അടങ്ങിയതും ഡീകാഫ് കാപ്പിയുമായിരുന്നെങ്കിലും, കാപ്പി വീണ്ടും ഉപയോഗിക്കാൻ തുടങ്ങിയതിന് ശേഷം പങ്കെടുത്തവരിൽ മാനസിക സമ്മർദം, വിഷാദലക്ഷണങ്ങൾ, പെട്ടെന്നുള്ള വൈകാരിക പ്രതികരണങ്ങൾ എന്നിവ കുറയുന്നതായി ഗവേഷകർ നിരീക്ഷിച്ചു.

കാപ്പിയുടെ ചില മാനസികാരോഗ്യ ഗുണങ്ങൾ കഫീൻ മാത്രം മൂലമല്ലെന്ന സൂചനയാണ് ഇതിലൂടെ ലഭിക്കുന്നത്.

ഡീകാഫ് കാപ്പി ഉപയോഗിച്ചവരിൽ പഠനശേഷിയിലും ഓർമശക്തിയിലും മെച്ചം കാണപ്പെട്ടതായി പഠനം റിപ്പോർട്ട് ചെയ്യുന്നു. അതേസമയം, സാധാരണ കാപ്പി ഉപയോഗിച്ചവരിൽ ശ്രദ്ധയും ജാഗ്രതയും വർധിക്കുകയും ഉത്കണ്ഠയും ഭയവും കുറയുകയും ചെയ്തതായി ഗവേഷകർ കണ്ടെത്തി.

കുടലിലെ ബാക്ടീരിയകളിലും മാറ്റം

കാപ്പി ഉപയോഗിക്കുന്നവരുടെ കുടലിൽ ചില പ്രത്യേക സൂക്ഷ്മജീവികളുടെ സാന്നിധ്യം കൂടുതലാണെന്നും പഠനത്തിൽ കണ്ടെത്തി. Eggerthella, Cryptobacterium curtum തുടങ്ങിയ ബാക്ടീരിയകളുടെ അളവിൽ വ്യത്യാസം രേഖപ്പെടുത്തി.

കാപ്പി ഉപയോഗവും കുടലിലെ സൂക്ഷ്മജീവികളുടെ ഘടനയും തമ്മിൽ ബന്ധമുണ്ടാകാമെന്നാണ് ഗവേഷകരുടെ കണ്ടെത്തൽ. കൂടാതെ, വൻകുടലിലെ ചില ബാക്ടീരിയ വിഭാഗങ്ങളുടെ വർധനയും നിരീക്ഷിച്ചു.

ഇത്തരം മാറ്റങ്ങൾ കുടലിന്റെ പ്രവർത്തനത്തെയും അതുവഴി മസ്തിഷ്കത്തിന്റെ പ്രവർത്തനങ്ങളെയും സ്വാധീനിക്കാൻ സാധ്യതയുണ്ടെന്നാണ് ഗവേഷകർ ചൂണ്ടിക്കാട്ടുന്നത്.

കഫീൻ മാത്രമല്ല കാപ്പിയിലെ 'ഹീറോ'

പഠനത്തിലെ പ്രധാന കണ്ടെത്തലുകളിൽ ഒന്ന് കാപ്പിയുടെ ഗുണങ്ങൾ കഫീനിൽ മാത്രം ആശ്രയിച്ചല്ലെന്നതാണ്. കഫീൻ നീക്കം ചെയ്ത കാപ്പിയിലും ചില ആരോഗ്യപരമായ മാറ്റങ്ങൾ നിരീക്ഷിക്കപ്പെട്ടത് ഇതിന് തെളിവായി ഗവേഷകർ കാണുന്നു.

കാപ്പിയിൽ അടങ്ങിയിരിക്കുന്ന മറ്റ് ഘടകങ്ങൾ കുടലിലെ സൂക്ഷ്മജീവികളുടെ പ്രവർത്തനത്തെ സ്വാധീനിക്കുന്നതാകാം ഇതിന് പിന്നിലെന്നാണ് ഗവേഷകരുടെ വിലയിരുത്തൽ.

പഠനത്തിന് നേതൃത്വം നൽകിയ പ്രഫസർ ജോൺ ക്രയാന്റെ അഭിപ്രായത്തിൽ, കാപ്പി കേവലം കഫീൻ അടങ്ങിയ പാനീയമല്ല. മെറ്റാബോളിസം, ദഹനവ്യവസ്ഥ, കുടലിലെ സൂക്ഷ്മജീവികൾ, വൈകാരികാരോഗ്യം എന്നിവയുമായി ബന്ധപ്പെടുന്ന സങ്കീർണമായ ഒരു പാനീയമാണ് കാപ്പി.

എന്നാൽ 62 പേരെ മാത്രം ഉൾപ്പെടുത്തിയ പഠനമായതിനാൽ, കാപ്പിയുടെ ആരോഗ്യഗുണങ്ങളെക്കുറിച്ച് അന്തിമ നിഗമനത്തിലെത്താൻ കൂടുതൽ ഗവേഷണം ആവശ്യമാണ്. വ്യക്തിയുടെ ആരോഗ്യസ്ഥിതി, കാപ്പിയുടെ അളവ്, പഞ്ചസാരയുടെയും മറ്റ് ചേർക്കലുകളുടെയും ഉപയോഗം തുടങ്ങിയ ഘടകങ്ങളും കാപ്പിയുടെ ആരോഗ്യപ്രഭാവത്തിൽ പ്രധാനമാണ്.