തിരുവനന്തപുരം: ഓണത്തോടനുബന്ധിച്ച് വെളിച്ചെണ്ണയുടെ വില കുറയുന്നു. കരിഞ്ചന്തക്കാർ കൊപ്ര പൂഴ്ത്തിവെച്ച് വില വർദ്ധിപ്പിക്കാനുള്ള നീക്കം സർക്കാർ ഇടപെടലുകളും കമ്പനികളുടെ നേരിട്ടുള്ള സംഭരണവും കാരണം പരാജയപ്പെട്ടു. ഇതോടെ, മൊത്തവിപണിയിൽ 500 രൂപ കടന്ന വെളിച്ചെണ്ണയുടെ വില 395-425 രൂപയായി കുറഞ്ഞു. ഓണമെത്തുമ്പോഴേക്കും ലിറ്ററിന് 350 രൂപയായി കുറയാൻ സാധ്യതയുണ്ടെന്ന് പ്രതീക്ഷിക്കുന്നു.

ഓണത്തിന് വെളിച്ചെണ്ണ ലിറ്ററിന് 349 രൂപയ്ക്ക് സബ്സിഡി നിരക്കിൽ നൽകുമെന്ന് സർക്കാർ പ്രഖ്യാപിച്ചിട്ടുണ്ട്. സപ്ലൈകോ ആദ്യഘട്ടത്തിൽ 40 ലക്ഷം ലിറ്റർ വെളിച്ചെണ്ണ ലഭ്യമാക്കും. ഇതിന്റെ ഭാഗമായി കൊപ്രയുടെ വിലയും കുറഞ്ഞു. ഒരു കിലോഗ്രാമിന് 270-280 രൂപയായിരുന്ന കൊപ്രയുടെ വില ഇപ്പോൾ 215-220 രൂപയായി.

തമിഴ്നാട്ടിൽ നിന്ന് വൻതോതിൽ കൊപ്ര ശേഖരിച്ച് വില വർദ്ധിപ്പിക്കാനുള്ള മൊത്ത വ്യാപാരികളുടെ ശ്രമം, വലിയ കമ്പനികൾ കർഷകരിൽ നിന്ന് നേരിട്ട് കൊപ്ര വാങ്ങാൻ തുടങ്ങിയതോടെയാണ് പാളിയത്. കൂടാതെ, കർണാടകയിൽ നിന്നുള്ള തേങ്ങയുടെ വരവും വില കുറയ്ക്കാൻ സഹായിച്ചു.
ഭക്ഷ്യമന്ത്രി ജി.ആർ. അനിൽ, വില കുറയുന്നത് സർക്കാരിന്റെ ഇടപെടലുകൾ ഫലപ്രദമാകുന്നതിന്റെ തെളിവാണെന്ന് പ്രതികരിച്ചു. 

പൊതുവിപണിയിലെ വിലക്കുറവിനനുസരിച്ച് സപ്ലൈകോയിലെ സബ്സിഡി വെളിച്ചെണ്ണയുടെ വിലയിലും കുറവുണ്ടാകുമെന്ന് അദ്ദേഹം അറിയിച്ചു.
സപ്ലൈകോ ഓണക്കാലത്ത് 250 കോടി രൂപയുടെ വിറ്റുവരവ് പ്രതീക്ഷിക്കുന്നുണ്ട്. ഇതിന്റെ ഭാഗമായി ഓഗസ്റ്റിലെ പ്രതിദിന വിറ്റുവരവ് 9 കോടിയായി വർധിച്ചു. ജൂലൈയിൽ ഇത് 6 കോടി രൂപയായിരുന്നു. ക്ഷാമമുണ്ടായിരുന്ന സമയത്ത് വിറ്റുവരവ് ഒരു കോടി മാത്രമായിരുന്നു.