ന്യൂഡൽഹി: മറ്റു അന്വേഷണ ഏജൻസികളുടെ നിയമപരമായ അധികാരപരിധിയിൽ ഇടപെടരുതെന്ന് എൻഫോഴ്‌സ്‌മെന്റ് ഡയറക്ടറേറ്റിന് (ഇഡി) സുപ്രീം കോടതിയുടെ മുന്നറിയിപ്പ്.സിഎംആർഎൽ–എക്സാലോജിക് കേസിൽ മുൻ  മുഖ്യമന്ത്രി പിണറായി വിജയനും കുടുംബാംഗങ്ങൾക്കുമെതിരെ രജിസ്റ്റർ ചെയ്ത അഴിമതിക്കേസിലെ അന്വേഷണം താൽക്കാലികമായി സ്റ്റേ ചെയ്തുകൊണ്ടാണ് കോടതിയുടെ നിരീക്ഷണം.
എഫ്‌ഐആർ രജിസ്റ്റർ ചെയ്യുന്നതുമായി ബന്ധപ്പെട്ട കേരള ഹൈക്കോടതി ഉത്തരവുകൾ ചോദ്യം ചെയ്തുള്ള ഹർജികൾ പരിഗണിക്കവെയാണ് ജസ്റ്റിസുമാരായ ജോയ്മല്യ ബാഗ്ചിയും വി. മോഹനയും അടങ്ങിയ ബെഞ്ച് ഇക്കാര്യം വ്യക്തമാക്കിയത്.
കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) ഇഡിക്ക് അന്വേഷണം തുടരാമെന്നും ആവശ്യമായ സാഹചര്യത്തിൽ പ്രോസിക്യൂഷൻ നടപടികളുമായി മുന്നോട്ടുപോകാമെന്നും കോടതി വ്യക്തമാക്കി. എന്നാൽ, അഴിമതിക്കുറ്റം നടന്നതായി സംശയിക്കുന്ന വിവരം സംസ്ഥാന അധികൃതർക്ക് കൈമാറിയശേഷം, നിയമാനുസൃതമായി അധികാരം വിനിയോഗിക്കാൻ അവരെ അനുവദിക്കണമെന്നും ബെഞ്ച് ചൂണ്ടിക്കാട്ടി.
പിഎംഎൽഎയിലെ വകുപ്പ് 66(2) പ്രകാരം ഇഡി കൈമാറിയ വിവരത്തിന്റെ അടിസ്ഥാനത്തിൽ എഫ്‌ഐആർ രജിസ്റ്റർ ചെയ്യാൻ ഹൈക്കോടതി സിംഗിൾ ബെഞ്ച് നിർദേശിച്ചതോടെയാണ് തർക്കം ഉടലെടുത്തത്. പ്രത്യേക അന്വേഷണസംഘം രൂപീകരിച്ച് പ്രാഥമിക അന്വേഷണം നടത്താനുള്ള സംസ്ഥാന സർക്കാരിന്റെ തീരുമാനവും സിംഗിൾ ബെഞ്ച് റദ്ദാക്കിയിരുന്നു. ഈ ഉത്തരവിനെതിരെ അപ്പീൽ നൽകാൻ പ്രതികൾക്ക് അനുമതി നൽകുന്നത് ഡിവിഷൻ ബെഞ്ച് പിന്നീട് നിരസിച്ചു.
വകുപ്പ് 66(2) പ്രകാരം ഇഡിയിൽനിന്ന് വിവരം ലഭിച്ചാൽ സംസ്ഥാന പൊലീസ് നിർബന്ധമായും എഫ്‌ഐആർ രജിസ്റ്റർ ചെയ്യേണ്ടതുണ്ടോ എന്ന ചോദ്യം സുപ്രീം കോടതി ഉന്നയിച്ചു. അതോ തുടർനടപടി തീരുമാനിക്കുന്നതിനുമുമ്പ് പ്രാഥമിക അന്വേഷണത്തിലൂടെ വിവരങ്ങൾ പരിശോധിക്കാൻ പൊലീസിന് കഴിയുമോ എന്നതും പരിശോധിക്കേണ്ടതുണ്ടെന്ന് കോടതി ചൂണ്ടിക്കാട്ടി.
എഫ്‌ഐആർ രജിസ്റ്റർ ചെയ്യുന്നത് നിർബന്ധമാണെന്ന നിലപാടും വിവരങ്ങൾ പരിശോധിക്കേണ്ടതുണ്ടെന്ന നിരീക്ഷണവും സിംഗിൾ ബെഞ്ച് ഉത്തരവിൽ ഉൾപ്പെട്ടതിലെ പ്രത്യക്ഷ വൈരുധ്യവും സുപ്രീം കോടതി പരാമർശിച്ചു.
എഫ്‌ഐആർ നിലനിർത്തിക്കൊണ്ടാണ് അന്വേഷണം താൽക്കാലികമായി നിർത്തിവച്ചത്. തർക്കവിഷയങ്ങൾ അപ്പീൽ പരിഗണിക്കുന്ന കോടതി പരിശോധിക്കട്ടെയെന്ന നിലപാടാണ് സുപ്രീം കോടതി സ്വീകരിച്ചത്.