തിരുവനന്തപുരം കാട്ടാക്കടയിൽ വിവാഹസൽക്കാര ചടങ്ങിനിടെ സിപിഎം പ്രവർത്തകർ തമ്മിലുണ്ടായ സംഘർഷം അക്രമത്തിൽ കലാശിച്ചു. സംഭവത്തിൽ സിപിഎം ബ്രാഞ്ച് സെക്രട്ടറി ഉൾപ്പെടെ മൂന്ന് പേർക്ക് വെട്ടേറ്റു. രണ്ട് സിപിഎം പ്രവർത്തകരെ പൊലീസ് അറസ്റ്റ് ചെയ്തിട്ടുണ്ട്.
തോട്ടമ്പറ ബ്രാഞ്ച് സെക്രട്ടറി മനു, അമൽ, മഹേഷ്, ശരത് എന്നിവർക്കാണ് ആക്രമണത്തിൽ പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു. മുൻവൈരാഗ്യമാണ് ആക്രമണത്തിന് പിന്നിലെന്നാണ് പൊലീസിന്റെ പ്രാഥമിക കണ്ടെത്തൽ.
സംഭവത്തിൽ എട്ടംഗസംഘം പങ്കെടുത്തതായി പൊലീസ് അന്വേഷണത്തിൽ വ്യക്തമായി. പരിക്കേറ്റവരുടെ മൊഴിയുടെ അടിസ്ഥാനത്തിൽ മറ്റൊരു ബ്രാഞ്ച് സെക്രട്ടറിയായ മനുവിനെയും സഹോദരൻ ഷിനുവിനെയും അറസ്റ്റ് ചെയ്തു. മറ്റ് പ്രതികളെ കണ്ടെത്താനുള്ള അന്വേഷണം പുരോഗമിക്കുകയാണ്.
കാട്ടാക്കടയിൽ നേരത്തെ നടന്ന പുസ്തകമേളയ്ക്കിടെ ഇരുവിഭാഗങ്ങളും തമ്മിൽ സംഘർഷമുണ്ടായിരുന്നു. ആ സംഭവത്തിന്റെ തുടർച്ചയായാണ് വിവാഹസൽക്കാര വേദിയിൽ വീണ്ടും ഏറ്റുമുട്ടലുണ്ടായതെന്നാണ് പൊലീസിന്റെ നിഗമനം.
