ബെംഗളുരു: കോൺഫിഡന്റ് ഗ്രൂപ്പ് തലവൻ സി.ജെ. റോയി ജീവനൊടുക്കിയ സംഭവത്തിൽ നിർണായക വിവരങ്ങൾ പുറത്ത്. അദ്ദേഹത്തിന്റെ കൈപ്പടയിൽ തയ്യാറാക്കിയ ആത്മഹത്യാക്കുറിപ്പ് കണ്ടെത്തിയതായി റിപ്പോർട്ടുകൾ. ഒൻപതു പേജുള്ള ആത്മഹത്യാ കുറിപ്പിൽ കുടുംബം, ബിസിനസ്, സാമ്പത്തിക ഇടപാടുകൾ എന്നിവയെക്കുറിച്ചുള്ള വ്യക്തമായ പരാമർശങ്ങളുണ്ട് എന്നാണ് റിപ്പോർട്ട്. റോയിയുടെ മരണവുമായി ബന്ധപ്പെട്ട ദുരൂഹതകൾക്ക് മറുപടി നൽകാൻ കഴിയുന്ന സൂചനകൾ കുറിപ്പിലുണ്ടെന്ന് ന്യൂസ് ഫസ്റ്റ് പ്രൈം റിപ്പോർട്ട് ചെയ്യുന്നു. നിലവിൽ കേസ് അന്വേഷിക്കുന്ന പ്രത്യേക അന്വേഷണ സംഘം (എസ്ഐടി) ഈ രേഖ സൂക്ഷ്മമായി പരിശോധിച്ചു വരികയാണെന്ന് പൊലീസ് വൃത്തങ്ങൾ അറിയിച്ചു.
കുടുംബാംഗങ്ങളോട് ക്ഷമ ചോദിച്ചുകൊണ്ടാണ് കുറിപ്പ് ആരംഭിക്കുന്നത്. താൻ അവസാന തീരുമാനത്തിലേക്ക് എത്തിച്ചേർന്നുവെന്ന് വ്യക്തമാക്കുന്ന വാക്കുകൾക്കൊപ്പം, കുടുംബത്തെ മാനസികമായി വേദനിപ്പിച്ചതിന് ക്ഷമാപണവും രേഖപ്പെടുത്തിയിട്ടുണ്ട്. വികാരഭാരം വ്യക്തമായിരുന്നെങ്കിലും, കുറിപ്പിൽ ക്രമബദ്ധമായ നിർദ്ദേശങ്ങളും വിശദമായ പരാമർശങ്ങളും ഉൾപ്പെട്ടിട്ടുണ്ടെന്നാണ് വിവരം.
സാമ്പത്തിക കാര്യങ്ങളിൽ റോയ് ഏറെ വ്യക്തത പുലർത്തിയിരുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. മറ്റുള്ളവർ തനിക്കു നൽകാനുള്ള പണമിടപാടുകൾ, ബിസിനസ് കൈമാറ്റം, പിൻഗാമികൾ ആരാകണം, ഉത്തരവാദിത്തങ്ങൾ എങ്ങനെ വിഭജിക്കണം തുടങ്ങിയ കാര്യങ്ങൾ അദ്ദേഹം കുറിപ്പിൽ വ്യക്തമാക്കിയിട്ടുണ്ടെന്ന് അന്വേഷണ സംഘം പറയുന്നു.
കോൺഫിഡന്റ് ഗ്രൂപ്പുമായി ദീർഘകാലമായി ബന്ധപ്പെട്ടിരുന്ന ജീവനക്കാരെയും സഹപ്രവർത്തകരെയും ഒഴിവാക്കരുതെന്ന നിർദ്ദേശവും കുറിപ്പിലുണ്ടെന്നാണ് വിവരം. അവരെ വിശ്വസ്തരായ പങ്കാളികളായി വിശേഷിപ്പിച്ച റോയ്, ബിസിനസിന്റെ തുടർച്ച ഉറപ്പാക്കുന്നതിന് അവരുടെ പങ്ക് നിർണായകമാണെന്നും രേഖപ്പെടുത്തിയിട്ടുണ്ട്.
മരണക്കുറിപ്പിന്റെ പശ്ചാത്തലത്തിൽ, റോയിയുടെ ഭാര്യയുടെയും മക്കളുടെയും മൊഴിയെടുക്കൽ ആരംഭിച്ചിരിക്കുകയാണ്. സാമ്പത്തിക ഇടപാടുകളെയും ബിസിനസ് തീരുമാനങ്ങളെയും കുറിച്ചുള്ള വിവരങ്ങൾ സ്ഥിരീകരിക്കാൻ ഈ മൊഴികൾ സഹായകമാകുമെന്നാണ് അന്വേഷണ ഉദ്യോഗസ്ഥരുടെ വിലയിരുത്തൽ.
റോയ് മുമ്പ് തന്നെ തന്റെ സാമ്പത്തിക കാര്യങ്ങളെക്കുറിച്ച് ഭാര്യയുമായി തുറന്നുപറഞ്ഞിരുന്നുവെന്നും, മറ്റുള്ളവർക്ക് നൽകിയ പണം ഉൾപ്പെടെയുള്ള വിവരങ്ങൾ അവരെ അറിയിച്ചിരുന്നുവെന്നും അന്വേഷണവുമായി ബന്ധപ്പെട്ട സ്രോതസ്സുകൾ പറയുന്നു. അടുത്തിടെ നൽകിയ ഒരു യൂട്യൂബ് അഭിമുഖത്തിലും തന്റെ ബിസിനസ് ഇടപാടുകളുടെ ഭൂരിഭാഗവും ഭാര്യയ്ക്ക് അറിയാമെന്ന് അദ്ദേഹം വ്യക്തമാക്കിയിരുന്നു.
ഈ സാഹചര്യത്തിൽ, ശവസംസ്കാര ചടങ്ങുകൾക്ക് ശേഷം റോയിയുടെ ഭാര്യയെ കൂടുതൽ വിശദമായി ചോദ്യം ചെയ്യാനാണ് എസ്ഐടിയുടെ നീക്കം. സാമ്പത്തിക രേഖകളും ബിസിനസുമായി ബന്ധപ്പെട്ട നിർണായക വിവരങ്ങളും സംബന്ധിച്ച് അവർക്കുള്ള അറിവ് അന്വേഷണത്തിന് സഹായകരമാകുമെന്നാണ് പ്രതീക്ഷ.
അന്വേഷണം തുടരുന്നതിനിടെ, റോയിയുടെ മരണത്തിലേക്ക് നയിച്ച സംഭവക്രമങ്ങൾ പുനഃസൃഷ്ടിക്കാൻ ഈ ആത്മഹത്യാക്കുറിപ്പ് നിർണായക പങ്ക് വഹിക്കുമെന്ന് അന്വേഷണ ഉദ്യോഗസ്ഥർ കരുതുന്നു.
