ബെംഗളൂരു: ആദായ നികുതി വകുപ്പിന്റെ റെയ്ഡിനിടെ കോൺഫിഡന്റ് ഗ്രൂപ്പ് ചെയർമാൻ ഡോ. സി.ജെ. റോയി സ്വയം വെടിവെച്ച് മരിച്ച സംഭവത്തിൽ കൂടുതൽ വിവരങ്ങൾ പുറത്തുവരുന്നു. ഇടത് നെഞ്ചിൽ കയറിയ വെടിയുണ്ട ഹൃദയവും ശ്വാസകോശവും തകർത്ത് പിന്നിലൂടെ പുറത്തുകടന്നു എന്നാണ് പോസ്റ്റുമോർട്ടം റിപ്പോർട്ട്. റോയി തൽക്ഷണം മരിച്ചതായും റിപ്പോർട്ടിൽ പറയുന്നു. 

ബൗറിങ് ആശുപത്രിയിലെ മെഡിക്കൽ സൂപ്രണ്ട് എം. എൻ. അരവിന്ദ് നടത്തിയ പോസ്റ്റുമോർട്ടത്തിലാണ് ഇക്കാര്യം വ്യക്തമാക്കിയത്. 6.35 എംഎം വലുപ്പമുള്ള വെടിയുണ്ടയാണ് ശരീരത്തിൽ നിന്ന് കണ്ടെത്തിയത്. നെഞ്ചിൽ തോക്ക് ചേർത്തുവച്ച് ഒരൊറ്റ തവണയാണ് വെടിവച്ചതെന്നും റിപ്പോർട്ടിൽ പറയുന്നു. കൂടുതൽ ശാസ്ത്രീയ പരിശോധനകൾ പുരോഗമിക്കുകയാണെന്നും വിശദമായ പോസ്റ്റുമോർട്ടം റിപ്പോർട്ടിനായി പൊലീസ് കാത്തിരിക്കുകയാണെന്നും അധികൃതർ അറിയിച്ചു. സംഭവസ്ഥലത്ത് നിന്ന് ശേഖരിച്ച രക്തസാമ്പിളുകളും മറ്റ് തെളിവുകളും പരിശോധനയിലാണ്.

സംഭവം ഇങ്ങനെ:

ആദായ നികുതി വകുപ്പിന്റെ നോട്ടീസിനെ തുടർന്ന് ദുബായിൽ നിന്ന് ദിവസങ്ങൾക്ക് മുൻപ് ബെംഗളൂരുവിലെത്തിയ റോയിയെ, ലാങ്ഫഡ് ടൗണിലുള്ള കോൺഫിഡന്റ് ഗ്രൂപ്പ് ആസ്ഥാനത്ത് ചോദ്യം ചെയ്യുന്നതിനിടെയാണ് സംഭവം. കൊച്ചിയിൽ നിന്നുള്ള എട്ട് അംഗ ഐടി സംഘമാണ് റെയ്ഡ് നടത്തിയത്. മൊഴിയെടുക്കുന്നതിനിടയിൽ മുറിയിലേക്ക് പോയ റോയിയെ പിന്നീട് മരിച്ച നിലയിൽ കണ്ടെത്തുകയായിരുന്നു. സംഭവം ഇന്നലെ ഉച്ച കഴിഞ്ഞ് മൂന്ന് മണിയോടെ നടന്നു.

അന്വേഷണം:

റോയിയുടെ മരണത്തിൽ പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്. ജോയിന്റ് കമ്മിഷണറുടെ നേതൃത്വത്തിൽ രണ്ട് എസ്പിമാരടങ്ങുന്ന സംഘമാണ് കേസ് അന്വേഷിക്കുക. സംഭവത്തിൽ ഐടി ഉദ്യോഗസ്ഥരുടെ പങ്ക് ഉൾപ്പെടെ എല്ലാ വശങ്ങളും പരിശോധിക്കുമെന്ന് പൊലീസ് അറിയിച്ചു.

ആരോപണങ്ങൾ:

റോയിയുടെ മരണത്തിന് ആദായ നികുതി ഉദ്യോഗസ്ഥരുടെ നടപടികളാണ് കാരണമെന്ന ആരോപണം കുടുംബം ഉയർത്തിയിട്ടുണ്ട്. അന്വേഷണത്തിനിടെ ഉദ്യോഗസ്ഥർ മാനസിക സമ്മർദം ചെലുത്തിയതിനെ തുടർന്നാണ് റോയി ആത്മഹത്യ ചെയ്തതെന്നുമാണ് സഹോദരൻ സി.ജെ. ബാബുവിന്റെ ആരോപണം. ലീഗൽ അഡ്വൈസർ പ്രകാശും ഇതേ ആരോപണം ഉന്നയിച്ചിട്ടുണ്ട്.

ആദായ നികുതിയുമായി ബന്ധപ്പെട്ട് കോൺഫിഡന്റ് ഗ്രൂപ്പിന് അപ്പീലറ്റ് ട്രൈബ്യൂണലിലും കർണാടക ഹൈക്കോടതിയിലും കേസുകൾ നിലവിലുണ്ടായിരുന്നുവെന്നും അന്വേഷണ സംഘം പരിശോധിക്കുന്നുണ്ട്.