തിരുവനന്തപുരം: മുഖ്യമന്ത്രി വി.ഡി. സതീശൻ മാധ്യമങ്ങളോട് പ്രതികരിക്കുന്ന പരിപാടികൾ ഇനി മുൻകൂട്ടി അറിയിക്കും. മുഖ്യമന്ത്രി എത്തുന്ന സ്ഥലങ്ങളിലെല്ലാം മാധ്യമപ്രവർത്തകർ പ്രതികരണത്തിനായി സമീപിക്കുകയും, പ്രതികരിക്കാത്തത് വാർത്തയാകുകയും ചെയ്യുന്ന സാഹചര്യം വർധിച്ചതോടെയാണ് മുഖ്യമന്ത്രിയുടെ ഓഫിസ് പുതിയ നിലപാട് വ്യക്തമാക്കിയത്.
എല്ലാ ബുധനാഴ്ചയും മന്ത്രിസഭാ യോഗത്തിന് ശേഷം മുഖ്യമന്ത്രി മാധ്യമങ്ങളെ കാണും. ഇതിന് പുറമെ അടിയന്തര സാഹചര്യങ്ങളിലോ പ്രധാന വിഷയങ്ങളിലോ പ്രതികരണം ആവശ്യമുണ്ടെങ്കിൽ മുൻകൂട്ടി അറിയിച്ച് മാധ്യമങ്ങളെ കാണാനും തീരുമാനിച്ചിട്ടുണ്ട്.
മുഖ്യമന്ത്രി പങ്കെടുക്കുന്ന പരിപാടികളിലും ഔദ്യോഗിക സന്ദർശനങ്ങളിലുമെല്ലാം മാധ്യമപ്രവർത്തകർ പ്രതികരണത്തിനായി സമീപിക്കുന്ന സാഹചര്യം കഴിഞ്ഞ ദിവസങ്ങളിൽ വർധിച്ചെന്നാണ് മുഖ്യമന്ത്രിയുടെ ഓഫിസിന്റെ വിലയിരുത്തൽ. ഇതിന്റെ ഭാഗമായി മുഖ്യമന്ത്രിയുടെ സുരക്ഷാ ക്രമീകരണങ്ങളിലും പൊലീസ് കൂടുതൽ ജാഗ്രത പുലർത്തുന്നുണ്ട്.
സിഎംആർഎൽ മേധാവി എസ്.എൻ. ശശിധരൻ കർത്തായിൽനിന്ന് വി.ഡി. സതീശൻ പണം വാങ്ങിയെന്ന ബിജെപി നേതാവ് ഷോൺ ജോർജിന്റെ ആരോപണത്തിന് പിന്നാലെയാണ് മാധ്യമങ്ങളുടെ ശ്രദ്ധ മുഖ്യമന്ത്രിയിലേക്ക് കൂടുതൽ കേന്ദ്രീകരിച്ചത്. ആരോപണം ഉയർന്ന സമയത്ത് കൊച്ചിയിൽ ഒരു ചടങ്ങിൽ പങ്കെടുക്കുകയായിരുന്നു മുഖ്യമന്ത്രി. ചടങ്ങിന് ശേഷം പ്രതികരണം തേടി മാധ്യമപ്രവർത്തകർ കൂട്ടത്തോടെ സമീപിച്ചിരുന്നു.
ഇക്കാര്യം ശ്രദ്ധയിൽപ്പെട്ടതിനെ തുടർന്ന് മുഖ്യമന്ത്രിയുടെ സുരക്ഷ ശക്തമാക്കുന്നതിനെക്കുറിച്ച് ഇന്റലിജൻസ് വിഭാഗം വിലയിരുത്തൽ നടത്തി. പിന്നാലെ ഇടുക്കി കലക്ടറേറ്റിൽ യോഗം കഴിഞ്ഞ് പുറത്തിറങ്ങിയപ്പോഴും മാധ്യമപ്രവർത്തകർ മുഖ്യമന്ത്രിയെ വളഞ്ഞതായാണ് സ്പെഷൽ ബ്രാഞ്ച് റിപ്പോർട്ട് ചെയ്തത്.
മാധ്യമപ്രവർത്തകരടക്കമുള്ളവർ അനിയന്ത്രിതമായി മുഖ്യമന്ത്രിയുടെ അടുത്തേക്ക് എത്തുന്ന സാഹചര്യം ഒഴിവാക്കണമെന്നും സുരക്ഷയിൽ പ്രത്യേക ജാഗ്രത പാലിക്കണമെന്നും ജില്ലാ പൊലീസ് മേധാവിമാർക്ക് ഇന്റലിജൻസ് എഡിജിപി നിർദേശം നൽകിയിട്ടുണ്ട്.
പ്രതിപക്ഷ കക്ഷികൾ വിവിധ വിഷയങ്ങളിൽ പ്രതിഷേധവുമായി രംഗത്തുള്ള സാഹചര്യത്തിൽ മുഖ്യമന്ത്രിയുടെ സമീപത്തേക്ക് ആളുകൾ എത്തുന്നതിൽ താൽക്കാലിക നിയന്ത്രണം വേണമെന്നാണ് പൊലീസ് നിലപാട്. മുഖ്യമന്ത്രിയുടെ വാഹനവ്യൂഹത്തിന്റെ സുരക്ഷ വർധിപ്പിക്കണമെന്ന നിർദേശവും ഇന്റലിജൻസ് വിഭാഗം നേരത്തെ മുന്നോട്ടുവച്ചിരുന്നു. എന്നാൽ, വാഹനവ്യൂഹം ശക്തമാക്കുന്നതിനോട് മുഖ്യമന്ത്രി സമ്മതിച്ചിരുന്നില്ലെന്നാണ് വിവരം.
