തൊഴിലാളികളുടെ അവകാശങ്ങളെ ഹനിച്ചുകൊണ്ടും അവരെ വേദനിപ്പിച്ചുകൊണ്ടും ഒരു സംരംഭവും നടപ്പിലാക്കാൻ സർക്കാരിന് ഉദ്ദേശ്യമില്ലെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. ഐഎൻടിയുസി (INTUC) സംസ്ഥാന നേതൃയോഗത്തിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.സ്വകാര്യവൽക്കരണം സർക്കാരിന്റെ നയമല്ലെന്ന് വ്യക്തമാക്കിയ മുഖ്യമന്ത്രി, പൊതുമേഖലാ സ്ഥാപനങ്ങളെല്ലാം സർക്കാരിന്റെ പക്കൽ നിന്ന് ചോർത്തിയെടുക്കാമെന്ന് കരുതിയാൽ അനുവദിക്കില്ലെന്നും കൂട്ടിച്ചേർത്തു. കെഎസ്ആർടിസിയെ സ്വതന്ത്രമായി നിലനിർത്താനാണ് സർക്കാർ ശ്രമിക്കുന്നത്. പൊതുമേഖലാ സ്ഥാപനമാണെന്ന് പറഞ്ഞ് അതിന്റെ സമ്പത്ത് ഊറ്റിക്കുടിക്കാൻ ആരെയും അനുവദിക്കില്ലെന്നും സ്ഥാപനങ്ങൾ മികച്ച രീതിയിൽ മുന്നോട്ട് കൊണ്ടുപോകണമെന്നും അദ്ദേഹം പറഞ്ഞു.നിയമസഭാ സമ്മേളനം നടക്കുന്നതുകൊണ്ടാണ് ഐഎൻടിയുസിയുടെ മുൻ പരിപാടിയിൽ പങ്കെടുക്കാൻ കഴിയാതിരുന്നതെന്നും മുഖ്യമന്ത്രി വിശദീകരിച്ചു. ഐഎൻടിയുസി സംസ്ഥാന നേതൃയോഗത്തിൽ ആർ. ചന്ദ്രശേഖരനും മുഖ്യമന്ത്രിയും ഒരുമിച്ച് വേദി പങ്കിട്ടു. കശുവണ്ടി ഇറക്കുമതി അഴിമതി കേസിൽ ആർ. ചന്ദ്രശേഖരനെ പ്രോസിക്യൂട്ട് ചെയ്യാൻ അനുമതി നൽകിയതിന് പിന്നാലെ ഇരുവരും ആദ്യമായാണ് ഒരു വേദിയിൽ എത്തുന്നത്. യോഗത്തിൽ ആർ. ചന്ദ്രശേഖരൻ മുഖ്യമന്ത്രിയെ പ്രശംസിച്ച് സംസാരിക്കുകയും ചെയ്തു.
Photo Courtesy - Google
