സി.എം.ആർ.എൽ-എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട് സി.ബി.ഐ അന്വേഷണം ആവശ്യപ്പെട്ടുള്ള ഹർജിക്ക് പിന്നിൽ രാഷ്ട്രീയ ഗൂഢാലോചനയാണെന്ന് മുഖ്യമന്ത്രി പിണറായി വിജയൻ ഹൈക്കോടതിയിൽ സത്യവാങ്മൂലം നൽകി. തന്നെയും മകൾ വീണയെയും വ്യക്തിപരമായി കടന്നാക്രമിക്കാനാണ് ഈ ഹർജി ഉപയോഗിക്കുന്നതെന്ന് അദ്ദേഹം ചൂണ്ടിക്കാട്ടി.

മാധ്യമപ്രവർത്തകൻ എം.ആർ. അജയൻ സമർപ്പിച്ച ഈ പൊതുതാൽപര്യ ഹർജി രാഷ്ട്രീയ പ്രേരിതമാണെന്നും, ഒരുതരം "ആഡംബര വ്യവഹാരം" (Luxury Litigation) ആണെന്നും മുഖ്യമന്ത്രി ആരോപിച്ചു. ഹർജിയിൽ 15-ാം എതിർകക്ഷിയായ പിണറായിക്ക് ഹൈക്കോടതി നേരത്തെ നോട്ടീസ് അയച്ചിരുന്നു. ഈ കേസ് ഹൈക്കോടതി ഈ മാസം 17-ന് വീണ്ടും പരിഗണിക്കും.

തനിക്കെതിരായ ഹർജിയിൽ പൊതുതാത്പര്യമില്ലെന്നും, ഉന്നയിക്കുന്ന ആരോപണങ്ങൾക്ക് യാതൊരു തെളിവിന്റെയും പിൻബലമില്ലെന്നും മുഖ്യമന്ത്രി സത്യവാങ്മൂലത്തിൽ വ്യക്തമാക്കി. ഹർജിക്കാരൻ ആശ്രയിക്കുന്നത് ആദായനികുതി ഇന്ററിം സെറ്റിൽമെന്റ് ബോർഡിന്റെ ഉത്തരവിനെയാണ്, എന്നാൽ താനോ മകളോ അതിൽ കക്ഷികളായിരുന്നില്ല. മുൻപ് സമാനമായ ആരോപണങ്ങളുമായി മാത്യു കുഴൽനാടൻ എം.എൽ.എയും ഗിരീഷ് ബാബുവും നൽകിയ ഹർജികൾ വിജിലൻസ് കോടതികളും ഹൈക്കോടതിയും തള്ളിക്കളഞ്ഞ കാര്യവും മുഖ്യമന്ത്രി ഓർമ്മിപ്പിച്ചു.

അഞ്ചു പതിറ്റാണ്ടിലേറെയായി പൊതുജീവിതം നയിക്കുന്ന വ്യക്തിയാണ് താനെന്നും, ആറു തവണ എം.എൽ.എ ആകുകയും 2016 മുതൽ മുഖ്യമന്ത്രിയായി പ്രവർത്തിക്കുകയും ചെയ്യുന്നുവെന്നും പിണറായി വിജയൻ ചൂണ്ടിക്കാട്ടി. തന്റെ എല്ലാ ആസ്തികളും ബാദ്ധ്യതകളും തിരഞ്ഞെടുപ്പ് കമ്മീഷന് സമയാസമയം വെളിപ്പെടുത്തിയിട്ടുള്ളതാണെന്നും അദ്ദേഹം പറഞ്ഞു.

നിലവിൽ സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്.എഫ്.ഐ.ഒ) അന്വേഷിക്കുന്ന കേസിൽ ഒരു സമാന്തര സി.ബി.ഐ അന്വേഷണം ആവശ്യപ്പെടുന്നത് നിയമപരമായി നിലനിൽക്കില്ലെന്നും മുഖ്യമന്ത്രി വാദിച്ചു. ഈ സാഹചര്യത്തിൽ ഹർജി തള്ളിക്കളയണമെന്ന് പിണറായി വിജയൻ ഹൈക്കോടതിയോട് അഭ്യർത്ഥിച്ചു.

മുഖ്യമന്ത്രിയുടെ സത്യവാങ്മൂലത്തിലെ പ്രധാന വാദങ്ങൾ:

 * തെളിവുകളുടെ അഭാവം: ഹർജിക്കാരന് വിഷയവുമായി നേരിട്ട് ബന്ധമില്ലെന്നും, തെളിവുകളോ രേഖകളോ ഇല്ലാതെ ഊഹങ്ങളും കേട്ടുകേൾവികളും മാത്രമാണ് ഉന്നയിച്ചിരിക്കുന്നതെന്നും മുഖ്യമന്ത്രി വ്യക്തമാക്കി.
 * അനധികൃത സഹായമില്ല: തനിക്കോ മകൾ വഴിയോ സി.എം.ആർ.എൽ അടക്കമുള്ള ഒരു കമ്പനിയിൽ നിന്നും അനധികൃത സഹായം ലഭിച്ചിട്ടില്ലെന്നും, ആരോപണങ്ങൾ പൂർണ്ണമായും അടിസ്ഥാനരഹിതമാണെന്നും അദ്ദേഹം ഉറപ്പിച്ചു പറഞ്ഞു.
 * സാമ്പത്തിക ഇടപാടുകൾ സുതാര്യം: സി.എം.ആർ.എൽ-എക്സാലോജിക് സാമ്പത്തിക ഇടപാടുകൾ ബാങ്ക് അക്കൗണ്ടുകൾ വഴിയാണ് നടന്നത്. എക്സാലോജിക് തന്റെ ബിനാമി കമ്പനിയാണെന്ന ആരോപണം വസ്തുതാവിരുദ്ധമാണ്. സി.എം.ആർ.എല്ലിന് വേണ്ടി താൻ പക്ഷപാതം കാണിച്ചിട്ടില്ലെന്നും മുഖ്യമന്ത്രി കൂട്ടിച്ചേർത്തു.
 * കോവളം പാലസ് വിവാദം: കോവളം പാലസ് കൈമാറാനായി താൻ സ്വാധീനം ചെലുത്തി എന്ന ആരോപണം തെറ്റിദ്ധാരണാജനകമാണ്. താൻ അധികാരത്തിൽ വരുമ്പോഴേക്കും ഈ കൈമാറ്റത്തിനുള്ള നിയമനടപടികൾ ഏകദേശം പൂർത്തിയായിരുന്നുവെന്ന് അദ്ദേഹം വിശദീകരിച്ചു.
 * നിയമപരമായ സാധുതയില്ല: ആദായനികുതി സെറ്റിൽമെന്റ് ക്രിമിനൽ നിയമത്തിന്റെ പരിധിയിൽ വരില്ലെന്നും, സെറ്റിൽമെന്റ് വീണ്ടും തുറക്കാൻ വ്യവസ്ഥയില്ലെന്നും മുഖ്യമന്ത്രി ചൂണ്ടിക്കാട്ടി. സി.എം.ആർ.എല്ലിനെ സെബി ലിസ്റ്റിൽ നിന്ന് നീക്കണമെന്നതുൾപ്പെടെയുള്ള ഹർജിയിലെ ആവശ്യങ്ങൾ ദിശാബോധമില്ലാത്തതാണെന്നും അദ്ദേഹം വാദിച്ചു.