കൽപറ്റ: വയനാട്ടിലെ പരമ്പരാഗത നെൽവിത്തുകളുടെ സംരക്ഷണത്തിനായി ജീവിതം ഉഴിഞ്ഞുവച്ച ചെറുവയൽ രാമൻ (74) അന്തരിച്ചു. എടവക കമ്മന സ്വദേശിയായ അദ്ദേഹം നാട്ടുകാർക്കിടയിൽ ‘നെല്ലച്ഛൻ’ എന്ന പേരിലാണ് അറിയപ്പെട്ടിരുന്നത്. പാരമ്പര്യത്തനിമ നിലനിർത്തുന്ന വൈക്കോൽ മേഞ്ഞ വീട്ടിൽ ജീവിച്ചിരുന്ന രാമൻ, കേരളത്തിന്റെ കാർഷിക പൈതൃകം കാത്തുസൂക്ഷിച്ച വ്യക്തിത്വമായിരുന്നു.

1952ൽ ചെറുവയൽ കുറിച്യത്തറവാട്ടിലെ കേളപ്പന്റെയും തേയിയുടെയും മകനായാണ് രാമന്റെ ജനനം. പ്രതികൂല സാഹചര്യങ്ങൾ ഉയർന്ന വിദ്യാഭ്യാസത്തിന് തടസ്സമായെങ്കിലും ജീവിതാനുഭവങ്ങളിലൂടെ അദ്ദേഹം വലിയ അറിവ് നേടി. പ്രകൃതിയുടെയും നെൽക്കൃഷിയുടെയും പ്രാധാന്യം തിരിച്ചറിഞ്ഞ രാമൻ, പരമ്പരാഗത കൃഷിരീതികളുടെയും നാടൻ നെല്ലിനങ്ങളുടെയും സംരക്ഷണത്തിനായി പ്രവർത്തിച്ചു.

കുന്നുംകുളമ്പൻ, പെരുവക, കുങ്കുമശാലി, കുത്തിച്ചീര, കുഞ്ഞുഞ്ഞി, ഓണമൊട്ടൻ, ഓണച്ചണ്ണ, വെള്ളിമുത്ത്, കനകം, ചെമ്പകം തുടങ്ങിയ അപൂർവ നെൽവിത്തുകൾ സംരക്ഷിക്കുന്നതിൽ അദ്ദേഹം നിർണായക പങ്കുവഹിച്ചു. വിത്തുകൾ തേടി എത്തുന്നവർക്ക് പണം വാങ്ങാതെ അവ കൈമാറിയിരുന്ന രാമന്റെ പ്രവർത്തനങ്ങൾ കൃഷിയോടുള്ള അദ്ദേഹത്തിന്റെ പ്രതിബദ്ധതയുടെ തെളിവായിരുന്നു.

പതിനേഴാം വയസ്സിൽ അമ്മാവന്റെ മരണത്തോടെ കുടുംബത്തിന്റെയും കൃഷിയുടെയും ചുമതല രാമനിലെത്തി. കൂട്ടുകുടുംബ വ്യവസ്ഥ നിലനിന്നിരുന്ന കുറിച്യത്തറവാട്ടിൽ അമ്മാവൻ ഏൽപിച്ച നെൽവിത്തുകളും കന്നുകാലികളും ഏക്കറുകണക്കിന് ഭൂമിയും സംരക്ഷിക്കേണ്ട ഉത്തരവാദിത്തം അദ്ദേഹം ഏറ്റെടുത്തു. കാലം മാറിയപ്പോഴും പരമ്പരാഗത കൃഷിയോടുള്ള അടുപ്പം കൈവിടാതെ മുന്നോട്ടുപോയി.

വയനാടിന്റെ കാർഷിക പൈതൃകത്തെ രാജ്യാന്തര വേദികളിലെത്തിക്കാനും രാമന് കഴിഞ്ഞു. 2011ൽ ഹൈദരാബാദിൽ നടന്ന രാജ്യാന്തര ജൈവവൈവിധ്യ സംരക്ഷണ സമ്മേളനത്തിൽ കേരളത്തിലെ കർഷകരെ പ്രതിനിധീകരിച്ചു. ബ്രസീലിൽ നടന്ന ലോക കാർഷിക സെമിനാർ ഉൾപ്പെടെ 11 രാജ്യങ്ങളിലെ സമ്മേളനങ്ങളിലും പങ്കെടുത്തു.

കാർഷിക-ജൈവവൈവിധ്യ സംരക്ഷണ രംഗത്തെ സംഭാവനകൾ പരിഗണിച്ച് കേന്ദ്ര കൃഷി മന്ത്രാലയത്തിന്റെ ജിനോം സേവിയർ പുരസ്കാരം ഉൾപ്പെടെ നിരവധി അംഗീകാരങ്ങൾ അദ്ദേഹത്തെ തേടിയെത്തി. 2023ൽ രാജ്യം പത്മശ്രീ നൽകി ആദരിച്ചു.

പരമ്പരാഗത നെൽവിത്തുകൾ വരുംതലമുറകൾക്കായി കാത്തുസൂക്ഷിക്കണമെന്ന സന്ദേശം ജീവിതത്തിലൂടെ പകർന്നുനൽകിയ രാമന്റെ വിയോഗം വയനാടിന്റെ കാർഷിക പൈതൃകത്തിന് വലിയ നഷ്ടമാണ്. നെൽവിത്തുകളുടെ വൈവിധ്യവും കൃഷിയുടെ തനിമയും സംരക്ഷിക്കാൻ നടത്തിയ പ്രവർത്തനങ്ങളിലൂടെ അദ്ദേഹം എന്നും ഓർമിക്കപ്പെടും.