ബെർലിൻ:ആവേശകരമായ രണ്ടാം പാദ ക്വാർട്ടർ ഫൈനൽ പോരാട്ടങ്ങൾക്കൊടുവിൽ ബാഴ്സലോണയെ തളച്ച് അത്‌ലറ്റിക്കോ മാഡ്രിഡും, ലിവർപൂളിനെ തകർത്ത് നിലവിലെ ചാമ്പ്യന്മാരായ പാരിസ് സെന്റ് ജർമ്മനും (PSG) യുവേഫ ചാമ്പ്യൻസ് ലീഗ് സെമി ഫൈനലിൽ പ്രവേശിച്ചു.ആദ്യ പാദത്തിൽ എതിരില്ലാത്ത രണ്ട് ഗോളുകൾക്ക് പരാജയപ്പെട്ട ബാഴ്സലോണ രണ്ടാം പാദത്തിൽ ശക്തമായ തിരിച്ചുവരവിനാണ് ശ്രമിച്ചത്. മത്സരത്തിന്റെ തുടക്കത്തിൽ തന്നെ ലamine യമാൽ, ഫെറാൻ ടോറസ് എന്നിവർ നേടിയ ഗോളുകൾ ബാഴ്സയ്ക്ക് പ്രതീക്ഷ നൽകിയെങ്കിലും അഡെമോള ലൂക്ക്മാന്റെ ഗോൾ അത്‌ലറ്റിക്കോയ്ക്ക് ആകെ സ്കോറിൽ (3-2) ലീഡ് നൽകി. 79-ാം മിനിറ്റിൽ എറിക് ഗാർഷ്യ ചുവപ്പ് കാർഡ് കണ്ട് പുറത്തായതോടെ ബാഴ്സയുടെ തിരിച്ചുവരവ് പ്രതീക്ഷകൾ അസ്തമിച്ചു. 2017-ന് ശേഷം ആദ്യമായാണ് അത്‌ലറ്റിക്കോ സെമിയിൽ പ്രവേശിക്കുന്നത്. സെമിയിൽ ആഴ്സണൽ അല്ലെങ്കിൽ സ്പോർട്ടിങ് ആയിരിക്കും അത്‌ലറ്റിക്കോയുടെ എതിരാളികൾ.ലിവർപൂളിനെ അവരുടെ തട്ടകമായ ആൻഫീൽഡിൽ നേരിട്ട പി.എസ്.ജി എതിരില്ലാത്ത രണ്ട് ഗോളുകൾക്കാണ് വിജയിച്ചത്. രണ്ട് പാദങ്ങളിലുമായി 4-0 എന്ന വമ്പൻ ലീഡോടെയാണ് നിലവിലെ ചാമ്പ്യന്മാരുടെ മുന്നേറ്റം. മുൻ ബാഴ്സ താരം ഉസ്മാൻ ഡെംബെലെയാണ് പി.എസ്.ജിക്കായി രണ്ട് ഗോളുകളും നേടിയത്. സൂപ്പർ താരങ്ങളെ മാത്രം ആശ്രയിക്കാതെ യുവനിരയെ അണിനിരത്തിയുള്ള പി.എസ്.ജിയുടെ തന്ത്രം ഈ സീസണിലും ഫലം കാണുന്ന കാഴ്ചയാണിത്. സെമിയിൽ ബയേൺ മ്യൂണിക് അല്ലെങ്കിൽ റയൽ മാഡ്രിഡ് ആയിരിക്കും പി.എസ്.ജിയുടെ എതിരാളികൾ.
