അയോധ്യ: രാമക്ഷേത്രത്തിലെ സംഭാവന മോഷണവുമായി ബന്ധപ്പെട്ട വിവാദത്തിൽ ആദ്യമായി പ്രതികരിച്ച് ശ്രീരാമക്ഷേത്രം ട്രസ്റ്റിന്റെ മുൻ ജനറൽ സെക്രട്ടറി ചമ്പത് റായ്. തനിക്കെതിരെ ഉയരുന്ന ആരോപണങ്ങൾ വസ്തുതാവിരുദ്ധമാണെന്നും പ്രത്യേക അന്വേഷണസംഘം (എസ്.ഐ.ടി) അന്തിമ റിപ്പോർട്ട് സമർപ്പിച്ച ശേഷം ഓരോ ആരോപണങ്ങൾക്കും വിശദമായി മറുപടി നൽകുമെന്നും അദ്ദേഹം അറിയിച്ചു.

രാമഭക്തർക്കായി എഴുതിയ തുറന്ന കത്തിലാണ് ചമ്പത് റായ് തന്റെ നിലപാട് വ്യക്തമാക്കിയത്. തന്റെ ജീവിതം ഒരു "തുറന്ന പുസ്തകമാണ്" എന്നും സത്യം വൈകാതെ എല്ലാവരുടെയും മുന്നിലെത്തുമെന്നും അദ്ദേഹം കത്തിൽ പറയുന്നു.

ജൂൺ 7 മുതൽ രാമക്ഷേത്രത്തിലെ സംഭാവനകളുമായി ബന്ധപ്പെട്ട് വിവിധ ആരോപണങ്ങളും പ്രചാരണങ്ങളും പ്രചരിക്കുന്നുണ്ടെന്ന് ചൂണ്ടിക്കാട്ടിയ റായ്, അന്വേഷണ നടപടികൾ പൂർത്തിയാകുന്നതുവരെ മൗനം പാലിക്കാനാണ് താൻ തീരുമാനിച്ചതെന്ന് വ്യക്തമാക്കി. എസ്.ഐ.ടിയുടെ അന്തിമ റിപ്പോർട്ട് പുറത്തുവന്നാൽ എല്ലാ ആരോപണങ്ങൾക്കും തെളിവുകളുടെ അടിസ്ഥാനത്തിൽ മറുപടി നൽകുമെന്നും അദ്ദേഹം കൂട്ടിച്ചേർത്തു.

കഴിഞ്ഞ 45 വർഷമായി പ്രചാരകനായി പ്രവർത്തിച്ചുവരുന്ന താൻ 1991 ഒക്ടോബർ മുതൽ അയോധ്യയെ കേന്ദ്രമാക്കി സേവനമനുഷ്ഠിക്കുകയാണെന്നും കത്തിൽ അദ്ദേഹം പരാമർശിക്കുന്നു.

സംഭാവന മോഷണ വിവാദം ശക്തമായതിനെ തുടർന്ന് ചമ്പത് റായിയും ട്രസ്റ്റ് അംഗമായിരുന്ന അനിൽ മിശ്രയും രാജിവെച്ചിരുന്നു. ഇരുവരുടെയും രാജിക്കത്ത് ട്രസ്റ്റ് അംഗീകരിച്ചതോടെ അവർ ട്രസ്റ്റി സ്ഥാനത്തുനിന്നും ഔദ്യോഗികമായി ഒഴിവായി.

അതേസമയം, രാമക്ഷേത്രത്തിന് ലഭിച്ച സംഭാവനയിൽ നിന്ന് 1.24 കോടി രൂപ ട്രസ്റ്റ് ചെലവഴിച്ചതുമായി ബന്ധപ്പെട്ട വിഷയത്തിലും എസ്.ഐ.ടി അന്വേഷണം പുരോഗമിക്കുകയാണ്. നേരത്തെ രഹസ്യമായി സൂക്ഷിച്ചിരുന്ന അന്വേഷണസംഘത്തിന്റെ പ്രാഥമിക റിപ്പോർട്ട് പിന്നീട് പൊതുജനങ്ങൾക്ക് ലഭ്യമാക്കിയിട്ടുണ്ട്.