ദോഹ: ലോക പരിസ്ഥിതി ദിനത്തോടനുബന്ധിച്ച് ചാലിയാർ ദോഹ സംഘടിപ്പിച്ച “ഗ്രീൻ കോൺഫ്ലൂൻസ് 2026” പരിസ്ഥിതി സംരക്ഷണം, സുസ്ഥിര വികസനം, കാലാവസ്ഥാ വ്യതിയാനം എന്നീ വിഷയങ്ങളിൽ സമൂഹത്തിന്റെ വിവിധ മേഖലകളെ ഒരുമിപ്പിച്ച ശ്രദ്ധേയമായ ഓപ്പൺ ഫോറമായി മാറി. ദോഹയിലെ അരോമ റെസ്റ്റോറന്റിൽ നടന്ന പരിപാടിയിൽ സാമൂഹിക, സാംസ്കാരിക, വിദ്യാഭ്യാസ, ആരോഗ്യ, പരിസ്ഥിതി രംഗങ്ങളിലെ പ്രമുഖർ പങ്കെടുത്തു.
പരിസ്ഥിതി സംരക്ഷണം ഇന്നത്തെ കാലഘട്ടത്തിൽ ഒരു തിരഞ്ഞെടുപ്പല്ല, മറിച്ച് ഓരോ മനുഷ്യന്റെയും സാമൂഹിക ഉത്തരവാദിത്വമാണെന്ന സന്ദേശമാണ് ഫോറം ഉയർത്തിക്കാട്ടിയത്. പ്രകൃതിയെയും വികസനത്തെയും പരസ്പര വിരുദ്ധങ്ങളായി കാണാതെ, സുസ്ഥിര വികസനത്തിലൂടെ രണ്ടിനെയും ഒരുമിച്ച് മുന്നോട്ട് കൊണ്ടുപോകേണ്ടതിന്റെ ആവശ്യകത ചർച്ചയിൽ പങ്കെടുത്തവർ ഊന്നിപ്പറഞ്ഞു.
ചാലിയാർ ദോഹ ജനറൽ സെക്രട്ടറി സാബിക് എടവണ്ണ സ്വാഗതം ആശംസിച്ച ചടങ്ങിൽ പ്രസിഡന്റ് സി.ടി. സിദ്ധീഖ് അധ്യക്ഷത വഹിച്ചു. പരിസ്ഥിതി സംരക്ഷണ പ്രവർത്തനങ്ങൾ സമൂഹത്തിന്റെ അടിത്തട്ടിലേക്ക് വ്യാപിപ്പിക്കേണ്ടത് കാലത്തിന്റെ ആവശ്യകതയാണെന്നും, വരും തലമുറകൾക്ക് സുരക്ഷിതവും ഹരിതാഭവുമായ ഭൂമി കൈമാറേണ്ടത് നമ്മുടെ ബാധ്യതയാണെന്നും അദ്ദേഹം പറഞ്ഞു.
ഖത്തർ യൂണിവേഴ്സിറ്റിയിലെ എൻവിറോണ്മെന്റൽ സയൻസ് ലക്ചററും ഗവേഷകനുമായ ഡോ. നയീം മുള്ളുങ്ങൾ മോഡറേറ്ററായ ചർച്ചയിൽ, കാലാവസ്ഥാ വ്യതിയാനത്തിന്റെ ആഗോള പ്രത്യാഘാതങ്ങൾ മുതൽ പ്രാദേശിക തലത്തിലെ പരിസ്ഥിതി വെല്ലുവിളികൾ വരെ വിശദമായി വിലയിരുത്തി. പരിസ്ഥിതി ഗവേഷക ഡോ. പ്രതിഭ, വേൾഡ് മലയാളി കൗൺസിൽ പ്രസിഡന്റ് സിയാദ് ഉസ്മാൻ, മജസ്റ്റിക് പ്രസിഡന്റ് നിഹാദ് അലി, ഇന്ത്യൻ ഫാർമസി അസോസിയേഷൻ പ്രസിഡന്റ് നൗഫൽ കട്ടയാട്ട്, മലബാർ അടുക്കള അഡ്മിൻ ശഹാന ഇല്യാസ് ചാലിയാർ ദോഹ ചീഫ് അഡ്വൈസർ സമീൽ അബ്ദുൽവാഹിദ്, മുഖ്യ രക്ഷാധികാരി ഷൗക്കത്ത് അലി താജ്, ഫൗണ്ടർ പ്രസിഡന്റ് വി.സി. മഷൂദ്, ഫൗണ്ടർ മെമ്പർ സിദ്ധീഖ് വാഴക്കാട്, മുൻ പ്രസിഡന്റ് അബ്ദുൽലത്തീഫ് ഇ.കെ., ഇന്ത്യൻ ഫാർമസിസ്റ്റ് പ്രതിനിധി അസീസ് പുറായിൽ, വനിതാ വിഭാഗം പ്രസിഡന്റ് മുഹ്സിന സമീൽ, വനിതാ വിഭാഗം ട്രഷറർ ഷാന നസ്രി ഉൾപ്പെടെയുള്ള പ്രമുഖർ വിവിധ കാഴ്ചപ്പാടുകൾ പങ്കുവെച്ചു.
പരിസ്ഥിതി സംരക്ഷണ സന്ദേശം ജനങ്ങളിലേക്കെത്തിക്കുന്നതിൽ പ്രവാസി സമൂഹത്തിനും സംഘടനകൾക്കും നിർണായക പങ്കുണ്ടെന്നും, വൃക്ഷത്തൈ നട്ടുപിടിപ്പിക്കൽ, മാലിന്യ സംസ്കരണം, ജലസംരക്ഷണം, പരിസ്ഥിതി വിദ്യാഭ്യാസം തുടങ്ങിയ മേഖലകളിൽ കൂടുതൽ പ്രവർത്തനങ്ങൾ സംഘടിപ്പിക്കണമെന്നും പാനലിസ്റ്റുകൾ അഭിപ്രായപ്പെട്ടു.
ചാലിയാർ ദോഹയുടെ നേതൃത്വത്തിലുള്ള ഈ സംരംഭം ഒരു ദിനാചരണ പരിപാടിയെന്നതിലുപരി, ഹരിത ഭാവിക്കായുള്ള കൂട്ടായ ചിന്തയുടെയും പ്രവർത്തന പ്രതിജ്ഞയുടെയും വേദിയായി മാറി.
ചാലിയാർ ദോഹ ട്രഷറർ അബ്ദുൽ അസീസ് നന്ദിപ്രമേയം അവതരിപ്പിച്ചു.
പരിസ്ഥിതി സംരക്ഷണത്തിന്റെ സന്ദേശം സമൂഹത്തിന്റെ എല്ലാ തലങ്ങളിലേക്കും വ്യാപിപ്പിക്കാനും, അതിനായി പ്രായോഗിക പദ്ധതികൾ നടപ്പാക്കാനും പ്രതിജ്ഞയെടുത്താണ് “ഗ്രീൻ കോൺഫ്ലൂൻസ് 2026” സമാപിച്ചത്.