ന്യൂഡൽഹി: രാജ്യത്തെ എല്ലാ മേഖലകളിലും ഏകീകൃത സമയക്രമം ഉറപ്പാക്കാൻ കേന്ദ്രസർക്കാരിന്റെ പുതിയ നീക്കം. ‘ഒരു രാജ്യം, ഒരു സമയം’ എന്ന ലക്ഷ്യത്തോടെ ഇന്ത്യൻ സ്റ്റാൻഡേർഡ് സമയം രാജ്യത്തെ നിയമപരവും വാണിജ്യപരവും ഡിജിറ്റലും ഭരണപരവുമായ പ്രവർത്തനങ്ങൾക്ക് നിർബന്ധമാക്കുന്ന ചട്ടങ്ങൾ കേന്ദ്രം വിജ്ഞാപനം ചെയ്തു. 2027 മാർച്ച് മുതൽ എല്ലാ സ്ഥാപനങ്ങൾക്കും  ഇന്ത്യൻ സ്റ്റാൻഡേർഡ് സമയം ഉപയോഗം നിർബന്ധമാകും.

ലീഗൽ മെട്രോളജി (ഇന്ത്യൻ സ്റ്റാൻഡേർഡ് സമയം) ചട്ടങ്ങൾ, 2026 പ്രകാരമാണ് പുതിയ സംവിധാനം നടപ്പാക്കുന്നത്. രാജ്യത്ത് വിവിധ ആവശ്യങ്ങൾക്കായി വ്യത്യസ്ത സമയസ്രോതസ്സുകളെ ആശ്രയിക്കുന്ന സാഹചര്യം ഒഴിവാക്കി ഒരൊറ്റ ഔദ്യോഗിക സമയക്രമം ഉറപ്പാക്കുകയാണ് കേന്ദ്രത്തിന്റെ ലക്ഷ്യം.

നിലവിൽ ഡിജിറ്റൽ സംവിധാനങ്ങൾ, ടെലികോം സേവനങ്ങൾ, ഇന്റർനെറ്റ് സേവനദാതാക്കൾ തുടങ്ങിയ മേഖലകളിൽ ജിപിഎസ് ഉൾപ്പെടെയുള്ള വിദേശ സമയസ്രോതസ്സുകളുടെ ഉപയോഗമുണ്ട്. നിർണായക സംവിധാനങ്ങളിൽ ഇത്തരം ആശ്രിതത്വം കുറയ്ക്കുന്നതിനും രാജ്യത്തിന്റെ സമയ അടിസ്ഥാന സൗകര്യം കൂടുതൽ സുരക്ഷിതമാക്കുന്നതിനുമാണ് പുതിയ ചട്ടങ്ങൾ.

നിയമപരമായ രേഖകൾ തയ്യാറാക്കുന്നതിലും വാണിജ്യ ഇടപാടുകളിലും ഡിജിറ്റൽ സംവിധാനങ്ങളിലും സർക്കാർ നടപടികളിലും ഒരേ സമയസ്രോതസ്സ് ഉപയോഗിക്കുന്നത് സമയവ്യത്യാസം മൂലമുള്ള ആശയക്കുഴപ്പങ്ങൾ ഒഴിവാക്കുമെന്ന് കേന്ദ്രം ചൂണ്ടിക്കാട്ടുന്നു.

ഡിജിറ്റൽ സുരക്ഷയ്ക്കും പ്രാധാന്യം

ഏകീകൃത ഇന്ത്യൻ സ്റ്റാൻഡേർഡ് സമയം ഉപയോഗിക്കുന്നത് ഡിജിറ്റൽ ഇടപാടുകളുടെ കൃത്യതയും സുരക്ഷയും വർധിപ്പിക്കാൻ സഹായിക്കുമെന്നാണ് സർക്കാർ വിലയിരുത്തൽ. സൈബർ കുറ്റകൃത്യങ്ങൾ തടയുന്നതിലും ഡിജിറ്റൽ സംവിധാനങ്ങളുടെ പ്രവർത്തനം കൂടുതൽ കാര്യക്ഷമമാക്കുന്നതിലും കൃത്യമായ സമയക്രമം നിർണായകമാണ്.

ഗതാഗതം, ടെലികോം, ആശയവിനിമയ ശൃംഖലകൾ, മറ്റ് നിർണായക അടിസ്ഥാന സൗകര്യങ്ങൾ എന്നിവയിലും ഏകോപിതമായ സമയക്രമം ഉറപ്പാക്കാൻ പുതിയ സംവിധാനം സഹായിക്കും. രാജ്യത്തിന്റെ വിവിധ മേഖലകളെ ഒരൊറ്റ സമയസ്രോതസ്സിന് കീഴിൽ കൊണ്ടുവരുന്നതിലൂടെ സമയത്തിന്റെ കൃത്യതയ്ക്കൊപ്പം ദേശീയ ഡിജിറ്റൽ സുരക്ഷയും ശക്തിപ്പെടുത്തുകയാണ് കേന്ദ്രത്തിന്റെ ലക്ഷ്യം.