​ദോഹ: യുഎസ്-ഇറാൻ യുദ്ധത്തിന്റെ പശ്ചാത്തലത്തിൽ ഗൾഫ് മേഖലയിൽ പ്രഖ്യാപിച്ച വെടിനിർത്തൽ കരാർ തകർച്ചയുടെ വക്കിൽ. ഖത്തർ, കുവൈറ്റ്, യുഎഇ എന്നീ രാജ്യങ്ങളിൽ ഇന്ന് നടന്ന ഡ്രോൺ ആക്രമണങ്ങളാണ് മേഖലയെ വീണ്ടും യുദ്ധഭീതിയിലാഴ്ത്തിയത്. ഏപ്രിൽ 8-ന് നിലവിൽ വന്ന വെടിനിർത്തലിന് ശേഷം ഉണ്ടാകുന്ന ഏറ്റവും വലിയ പ്രകോപനമാണിത്.യുഎഇ തലസ്ഥാനമായ അബുദാബിയിൽ നിന്നും ഖത്തറിലെ മിസൈദ് തുറമുഖത്തേക്ക് വരികയായിരുന്ന ചരക്കുകപ്പലിന് നേരെയാണ് ഞായറാഴ്ച ഡ്രോൺ ആക്രമണമുണ്ടായത്. ആക്രമണത്തിൽ കപ്പലിന് തീപിടിച്ചെങ്കിലും വലിയ നാശനഷ്ടങ്ങളില്ലാതെ രക്ഷപ്പെട്ടു. ഇതിന് പിന്നാലെ തങ്ങളുടെ ആകാശസീമയിൽ കടന്നുകയറിയ ഡ്രോണുകളെ പ്രതിരോധ സംവിധാനങ്ങൾ ഉപയോഗിച്ച് തകർത്തതായി കുവൈറ്റും യുഎഇയും സ്ഥിരീകരിച്ചു. ഇറാനിൽ നിന്നാണ് ഡ്രോണുകൾ വിക്ഷേപിച്ചതെന്ന് യുഎഇ പ്രതിരോധ മന്ത്രാലയം ആരോപിച്ചു.
ലോകത്തെ എണ്ണവ്യാപാരത്തിന്റെ ജീവനാഡിയായ ഹോർമുസ് കടലിടുക്കിൽ ഇറാൻ നിയന്ത്രണം കടുപ്പിച്ചതും, ഇറാനിയൻ തുറമുഖങ്ങൾ അമേരിക്ക ഉപരോധിച്ചതുമാണ് നിലവിലെ സംഘർഷങ്ങളുടെ കാതൽ. കഴിഞ്ഞ വെള്ളിയാഴ്ച ഉപരോധം ലംഘിക്കാൻ ശ്രമിച്ച രണ്ട് ഇറാനിയൻ എണ്ണക്കപ്പലുകൾ അമേരിക്ക തകർത്തിരുന്നു. ഇതിന് മറുപടിയായി മേഖലയിലെ യുഎസ് സൈനിക താവളങ്ങൾക്ക് നേരെ അതിശക്തമായ തിരിച്ചടി നൽകുമെന്ന് ഇറാന്റെ റെവല്യൂഷണറി ഗാർഡ് (IRGC) മുന്നറിയിപ്പ് നൽകി.
യുദ്ധം അവസാനിപ്പിക്കാൻ അമേരിക്ക മുന്നോട്ടുവെച്ച സമാധാന നിർദ്ദേശങ്ങളിൽ പാകിസ്താൻ വഴി ഇറാൻ മറുപടി നൽകിയിട്ടുണ്ട്. ചർച്ചകൾ തുടരുമ്പോഴും അമേരിക്കൻ വിദേശകാര്യ സെക്രട്ടറി മാർക്ക് റൂബിയോയുമായും ഇറാൻ വിദേശകാര്യ മന്ത്രിയുമായും ഖത്തർ ചർച്ചകൾ നടത്തിവരികയാണ്. മേഖലയിലെ സമാധാനം നിലനിർത്താൻ ഹോർമുസ് കടലിടുക്കിനെ സമ്മർദ്ദ തന്ത്രമായി ഉപയോഗിക്കുന്നത് ഇറാൻ ഒഴിവാക്കണമെന്ന് ഖത്തർ പ്രധാനമന്ത്രി ആവശ്യപ്പെട്ടു.യുദ്ധം ജനതയുടെ അവകാശങ്ങൾ സംരക്ഷിക്കാനാണെന്ന് ഇറാൻ പ്രസിഡന്റ് മസൂദ് പെസെഷ്കിയൻ അവകാശപ്പെടുമ്പോഴും, രാജ്യത്തെ സാമ്പത്തിക നില പരുങ്ങലിലാണ്. കുതിച്ചുയരുന്ന വിലക്കയറ്റവും അവശ്യസാധനങ്ങളുടെ ദൗർലഭ്യവും ഇറാനിയൻ ജനതയുടെ ഇടയിൽ വലിയ പ്രതിഷേധത്തിന് കാരണമാകുന്നുണ്ട്.