​ന്യൂഡൽഹി: ആദായനികുതി നിയമത്തിലെ വ്യവസ്ഥകൾക്ക് വിരുദ്ധമാകുമ്പോൾ, സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) പുറപ്പെടുവിക്കുന്ന സർക്കുലറുകൾ കോടതികളെ ബാധകമല്ലെന്ന് സുപ്രീം കോടതി വ്യക്തമാക്കി. കയറ്റുമതി ക്വാട്ട വിൽപ്പനയിലൂടെ ലഭിച്ച പ്രീമിയത്തിന് ആദായനികുതി നിയമത്തിലെ സെക്ഷൻ 80എച്ച്എച്ച്സി പ്രകാരമുള്ള ഇളവുകൾ ആവശ്യപ്പെട്ട് ഗാർമെന്റ് കയറ്റുമതിക്കാർ നൽകിയ അപ്പീലുകൾ തള്ളിക്കൊണ്ടാണ് ജസ്റ്റിസ് എസ്.വി.എൻ. ഭട്ടി, ജസ്റ്റിസ് എൻ.വി. അഞ്ചരിയ എന്നിവരടങ്ങിയ ബെഞ്ചിന്റെ ഈ നിരീക്ഷണം.
​2000-01, 2001-02 വർഷങ്ങളിലെ നികുതി വിലയിരുത്തലുമായി ബന്ധപ്പെട്ടതാണ് കേസ്. റെഡിമെയ്ഡ് വസ്ത്രങ്ങൾ നിർമ്മിച്ച് കയറ്റുമതി ചെയ്യുന്ന ഇവർ, കയറ്റുമതി ക്വാട്ട പ്രീമിയം ഇറക്കുമതി ലൈസൻസുകൾ, പണ സഹായം തുടങ്ങിയവയുടെ വിൽപ്പനയിലൂടെയുള്ള ലാഭത്തിന് തുല്യമായി കണക്കാക്കാമെന്ന 1998-ലെ സിബിഡിടി സർക്കുലറിനെ ആശ്രയിക്കുകയായിരുന്നു.
​എന്നാൽ, കയറ്റുമതി ക്വാട്ട വിറ്റഴിച്ചുണ്ടാക്കുന്ന പ്രീമിയം തുക വിദേശനാണ്യം നേടിത്തരുന്നില്ലെന്നും, അതിനാൽ അത് കയറ്റുമതിയിൽ നിന്നുള്ള വരുമാനമായി കണക്കാക്കാനാവില്ലെന്നും കോടതി വ്യക്തമാക്കി. തൽഫലമായി സെക്ഷൻ 80എച്ച്എച്ച്സി പ്രകാരമുള്ള നികുതിയിളവിന് ഇത് അർഹമല്ല.
​ആദ്യം അസസിംഗ് ഓഫീസർ ഈ ഇളവ് അനുവദിച്ചിരുന്നെങ്കിലും, കമ്മീഷണർ ഓഫ് ഇൻകം ടാക്സ് സെക്ഷൻ 263 പ്രകാരം ആ തീരുമാനം പുനഃപരിശോധിച്ചു. പിന്നീട് ഇൻകം ടാക്സ് അപ്പീലേറ്റ് ട്രിബ്യൂണൽ അനുകൂല വിധി പുറപ്പെടുവിച്ചെങ്കിലും ഡൽഹി ഹൈക്കോടതി ഇത് റദ്ദാക്കിയിരുന്നു. ഹൈക്കോടതി വിധി ശരിവെച്ച സുപ്രീം കോടതി, നിയമപരമായ വ്യവസ്ഥകൾക്ക് വിരുദ്ധമായി വ്യാഖ്യാനം നൽകാൻ ഭരണപരമായ സർക്കുലറുകൾക്ക് കോടതികളെ നിർബന്ധിക്കാനാവില്ലെന്നും വ്യക്തമാക്കി.