കേരള സർവകലാശാലയിലെ സംസ്കൃതം വിഭാഗത്തിൽ ജാതിയധിക്ഷേപമെന്ന പരാതി. പിഎച്ച്ഡി വിദ്യാർത്ഥി വിപിൻ വിജയനാണ് ഗുരുതരമായ ആരോപണം ഉന്നയിച്ച് രംഗത്തെത്തിയത്. സംസ്കൃതം വിഭാഗ മേധാവി സി.എൻ. വിജയകുമാരി തനിക്കെതിരെ ജാതിപരമായ അധിക്ഷേപം നടത്തിയെന്നാണ് വിപിൻ വിജയൻ ആരോപിക്കുന്നത്. സംഭവത്തിൽ വൈസ്ചാൻസലർക്കും കഴക്കൂട്ടം എസ്പിക്കും വിപിൻ പരാതി നൽകിയിട്ടുണ്ട്.
എംഫിൽ പഠനകാലത്തുതന്നെ അധ്യാപിക തനിക്കെതിരെ ജാതി അടിസ്ഥാനത്തിൽ വേർതിരിവ് കാണിച്ചുവെന്നാണ് വിപിൻ ആരോപിക്കുന്നത് . “പുലയന്മാർക്കും പറയന്മാർക്കും പഠിക്കാനുള്ളതല്ല സംസ്കൃതം” എന്ന പരാമർശം ഉൾപ്പെടെ നിരവധി അധിക്ഷേപങ്ങളാണ് നേരിട്ടതെന്ന് വിപിൻ മാധ്യമങ്ങളോട് പറഞ്ഞു. “പിഎച്ച്ഡി ലഭിക്കുന്നത് കാണണമെന്ന് പറഞ്ഞ് ഭീഷണിപ്പെടുത്തി, സുഹൃത്തുക്കൾക്കു മുന്നിൽ നാണംകെടുത്തി. നിയമപരമായി നീതി തേടും,” അദ്ദേഹം കൂട്ടിച്ചേർത്തു.
അധ്യാപിക വിജയകുമാരി ആരോപണങ്ങൾ മുഴുവൻ നിഷേധിച്ചു. അക്കാദമിക കാര്യങ്ങൾ മാത്രമേ താൻ ചെയ്തിട്ടുള്ളൂവെന്നും സർവകലാശാലയുടെ വിധേയയാണെന്നും അവർ വ്യക്തമാക്കി. “ജാതിയധിക്ഷേപം എന്ന വിഷയത്തിൽ ഇടപെടുന്നില്ല. സർവകലാശാല എന്ത് നടപടിയെടുത്താലും അംഗീകരിക്കും. ഞാൻ ധർമപക്ഷത്ത് നിൽക്കുന്നയാളാണ്,” വിജയകുമാരി പ്രതികരിച്ചു.
എന്നാൽ വിപിൻ ആരോപണങ്ങൾ കൂടുതൽ ഗൗരവകരമാണ്. മറ്റൊരു പിഎച്ച്ഡി വിദ്യാർത്ഥിയോടും മുസ്‌ലിം പെൺകുട്ടിയോടും അധ്യാപിക ജാതിപരമായ പരാമർശങ്ങൾ നടത്തിയിട്ടുണ്ടെന്നും ഒരു വിദ്യാർത്ഥി മുറിയിൽ കയറിയപ്പോൾ വെള്ളം തളിച്ച് ശുദ്ധീകരിച്ചിട്ടുണ്ടെന്നും വിപിൻ ആരോപിച്ചു. “ഞാൻ കേരളത്തിലെ രോഹിത് വെമുലയാകുമെന്നാണ് എന്റെ ഭയം,” വിപിൻ പറഞ്ഞു.
സംഭവത്തെ തുടർന്ന് സർവകലാശാലയിൽ ആഭ്യന്തര അന്വേഷണം നടക്കുമെന്ന സൂചനകളുണ്ട്. വിദ്യാർത്ഥിയും അധ്യാപികയും പരസ്പരം ഉന്നയിച്ച ആരോപണങ്ങൾ സാമൂഹ്യ മാദ്ധ്യമങ്ങളിലൂടെ വലിയ ചർച്ചയായി മാറിയിരിക്കുകയാണ്.
