സെക്രട്ടേറിയറ്റിനു മുന്നിലെ സമരക്കാർക്കെതിരെ കേസ്; വളർമതി ഒന്നാം പ്രതി; 58 പേരെ പ്രതിപ്പട്ടികയിൽ ഉൾപ്പെടുത്തി പൊലീസ് നടപടി
തിരുവനന്തപുരം: സെക്രട്ടേറിയറ്റിനു മുന്നിൽ സമരം നടത്തുന്ന എൽപിഎസ്ടി റാങ്ക് ഹോൾഡേഴ്‌സ് പ്രവർത്തകർക്കെതിരെ പൊലീസ് കേസെടുത്തു. സെക്രട്ടേറിയറ്റിന്റെ മെയിൻ ഗേറ്റിനു മുന്നിൽ നടത്തിയ പ്രതിഷേധവുമായി ബന്ധപ്പെട്ട് സമരസമിതി നേതാവ് വളർമതിയെ ഒന്നാം പ്രതിയാക്കിയാണ് കന്റോൺമെന്റ് പൊലീസ് എഫ്‌ഐആർ രജിസ്റ്റർ ചെയ്തത്.
സെക്രട്ടേറിയറ്റ് ഗേറ്റിനു മുന്നിൽ മുദ്രാവാക്യം വിളിച്ച് പ്രതിഷേധിക്കുകയും പൊതുജനങ്ങൾക്ക് ബുദ്ധിമുട്ടുണ്ടാക്കുകയും ചെയ്തെന്നാണ് എഫ്‌ഐആറിലെ ആരോപണം. കണ്ടാലറിയാവുന്ന എട്ടുപേർക്കും തിരിച്ചറിയാത്ത 50 പേർക്കുമെതിരെയാണ് കേസ്. ആകെ 58 പേരെയാണ് പ്രതിപ്പട്ടികയിൽ ഉൾപ്പെടുത്തിയിരിക്കുന്നത്.
അതേസമയം, പൊലീസ് ആരോപണം വളർമതി നിഷേധിച്ചു. പൊതുജനങ്ങൾക്ക് വഴിതടസ്സമുണ്ടാക്കുന്ന തരത്തിൽ സമരം നടത്തിയിട്ടില്ലെന്നും സുരക്ഷാ ക്രമീകരണങ്ങളുടെ ഭാഗമാണെന്ന് പറഞ്ഞ് ശേഖരിച്ച പേരുകൾ പിന്നീട് എഫ്‌ഐആറിൽ ഉൾപ്പെടുത്തുകയായിരുന്നുവെന്നും അവർ ആരോപിച്ചു.
സമരപ്പന്തലിൽ ഇന്നലെ മുപ്പതോളം പേർ മാത്രമാണ് ഉണ്ടായിരുന്നത്. എന്നാൽ 58 പേർക്കെതിരെയാണ് പൊലീസ് കേസെടുത്തിരിക്കുന്നത്. യൂണിവേഴ്‌സിറ്റി കോളജിൽ സംഘർഷമുണ്ടായപ്പോൾ കോൺഗ്രസ് നേതാക്കൾക്കെതിരെ കേസെടുക്കാതിരുന്നവരാണ് ഇപ്പോൾ സമരക്കാർക്കെതിരെ നടപടിയെടുക്കുന്നതെന്നും വളർമതി വിമർശിച്ചു.
