തൃപ്പൂണിത്തുറ:തൃപ്പൂണിത്തുറ മണ്ഡലത്തിൽ വരാനിരിക്കുന്ന തിരഞ്ഞെടുപ്പിൽ താൻ മത്സരിക്കാനില്ലെന്ന തീരുമാനം കെ. ബാബു എംഎൽഎ ഔദ്യോഗികമായി അറിയിച്ചതോടെ, മണ്ഡലത്തിൽ പുതിയ പകരക്കാരനെ കണ്ടെത്തുന്നതിനുള്ള ചർച്ചകൾ പാർട്ടിയിൽ രൂക്ഷമായിരിക്കുകയാണ്മണ്ഡലത്തിൽ പുറത്തുനിന്നുള്ള ആരെയും സ്ഥാനാർത്ഥിയാക്കരുതെന്ന കാര്യത്തിൽ കെ. ബാബു കണിശമായ നിലപാടാണ് സ്വീകരിച്ചിരിക്കുന്നത്. മണ്ഡലവുമായോ ജില്ലയുമായോ ദീർഘകാലമായി ബന്ധമില്ലാത്തവരെ സ്ഥാനാർത്ഥികളാക്കുന്നത് ഗുണം ചെയ്യില്ലെന്നും, തദ്ദേശീയരായ പാർട്ടിക്കാർക്ക് തന്നെ അവസരം നൽകണമെന്നുമാണ് അദ്ദേഹം നേതൃത്വത്തിന് നൽകിയിരിക്കുന്ന കർശന നിർദ്ദേശം.
പാർട്ടി നേതൃത്വം ലിജുവിനെ തൃപ്പൂണിത്തുറയിൽ മത്സരിപ്പിക്കാൻ നീക്കങ്ങൾ നടത്തുമ്പോൾ, അതിനെതിരെ പരസ്യമായ എതിർപ്പുമായി കെ. ബാബു രംഗത്തെത്തിയത് നേതൃത്വത്തെ വലിയ പ്രതിസന്ധിയിലാക്കിയിരിക്കുകയാണ്. മണ്ഡലത്തിലെ പ്രവർത്തകർക്കിടയിൽ എം.ലിജുവിന് വലിയ സ്വീകാര്യതയില്ലെന്നും, പുറത്തുനിന്നുള്ള ഒരാൾ മത്സരിക്കുന്നത് തിരഞ്ഞെടുപ്പിൽ വലിയ തിരിച്ചടിയാകുമെന്നുമാണ് ബാബുവിന്റെ വിലയിരുത്തൽ. ഈ സാഹചര്യത്തിൽ താൻ നിർദ്ദേശിക്കുന്ന വ്യക്തിയെ സ്ഥാനാർത്ഥിയാക്കണമെന്ന കാര്യത്തിൽ അദ്ദേഹം നേതൃത്വത്തിന് മേൽ സമ്മർദ്ദം ചെലുത്തുകയാണ്. മണ്ഡലത്തിന്റെ വികസന തുടർച്ചയ്ക്കും സംഘടനാപരമായ കെട്ടുറപ്പിനും താൻ നിർദ്ദേശിക്കുന്ന വ്യക്തി തന്നെ വേണമെന്നാണ് അദ്ദേഹത്തിന്റെ പക്ഷം. കെ. ബാബുവിന്റെ ഈ ശക്തമായ ഇടപെടൽ സ്ഥാനാർത്ഥി നിർണ്ണയത്തിൽ നേതൃത്വത്തെ വലിയ വെല്ലുവിളിയിലാണ് എത്തിച്ചിരിക്കുന്നത്. ഒരു വശത്ത് നേതൃത്വത്തിന്റെ ഔദ്യോഗിക നീക്കങ്ങളും മറുവശത്ത് മണ്ഡലത്തിലെ സ്വാധീനമുള്ള നേതാവിന്റെ എതിർപ്പും പാർട്ടിയെ പ്രതിരോധത്തിലാക്കുമ്പോൾ, വരും ദിവസങ്ങളിൽ മണ്ഡലത്തിലെ രാഷ്ട്രീയ സമവാക്യങ്ങൾ എങ്ങനെ മാറുമെന്നതാണ് തൃപ്പൂണിത്തുറ ഉറ്റുനോക്കുന്നത്.
