ന്യൂഡൽഹി: നീറ്റ് ചോദ്യപേപ്പർ ചോർച്ചയുമായി ബന്ധപ്പെട്ട പ്രതിഷേധങ്ങളും സി.ജെ.പി.യുടെ സമരവും ശക്തമായ പശ്ചാത്തലത്തിൽ കേന്ദ്ര മന്ത്രിസഭാ പുനഃസംഘടനയിൽ അവസാന നിമിഷ തിരുത്തലുകൾ നടന്നതായി രാഷ്ട്രീയവൃത്തങ്ങളിൽ സൂചന. വിദ്യാഭ്യാസമന്ത്രി ധർമേന്ദ്ര പ്രധാനെ മന്ത്രിസഭയിൽ നിന്ന് ഒഴിവാക്കുന്നതിന് പകരം വകുപ്പുമാറ്റം നടത്തിയേക്കുമെന്നാണ് വിലയിരുത്തൽ. നേരത്തെ ധർമേന്ദ്ര പ്രധാനും പരിസ്ഥിതി മന്ത്രി ഭൂപേന്ദ്ര യാദവും സംഘടനാ പ്രവർത്തനത്തിലേക്ക് മടങ്ങുമെന്നും മുൻമന്ത്രി അനുരാഗ് ഠാക്കൂർ വീണ്ടും മന്ത്രിസഭയിലെത്തുമെന്നും അഭ്യൂഹങ്ങളുണ്ടായിരുന്നു. എന്നാൽ നിലവിലെ സാഹചര്യത്തിൽ പ്രധാനെ മന്ത്രിസഭയിൽ നിന്ന് പൂർണമായും ഒഴിവാക്കിയാൽ പ്രതിഷേധത്തിന് മുന്നിൽ സർക്കാർ വഴങ്ങിയെന്ന സന്ദേശം പുറത്തുപോകുമെന്ന ആശങ്കയാണ് നേതൃത്വത്തിനുള്ളതെന്നാണ് റിപ്പോർട്ടുകൾ. അതിനാലാണ് വകുപ്പുമാറ്റം മാത്രമെന്ന സാധ്യത ശക്തമാകുന്നത്.

അതേസമയം, വിദ്യാഭ്യാസ വകുപ്പിന്റെ ചുമതല ധനമന്ത്രി നിർമല സീതാരാമന് നൽകുമോയെന്ന ചർച്ചകളും സജീവമാണ്. ഇതോടെ ധനമന്ത്രിസ്ഥാനത്തേക്ക് മുൻ ആർബിഐ ഗവർണറും നിലവിൽ പ്രധാനമന്ത്രിയുടെ പ്രിൻസിപ്പൽ സെക്രട്ടറിയുമായ ശക്തികാന്ത് ദാസിന്റെ പേര് ഉയർന്നുവരുന്നു. ധനകാര്യ രംഗത്തെ അനുഭവസമ്പത്ത് അദ്ദേഹത്തിന് അനുകൂല ഘടകമായാണ് വിലയിരുത്തപ്പെടുന്നത്. മുൻപ് ഇടക്കാലത്ത് ധനമന്ത്രിയുടെ ചുമതല വഹിച്ചിരുന്ന വാണിജ്യമന്ത്രി പീയൂഷ് ഗോയലിന്റെ പേരും പരിഗണനയിലുണ്ടെന്നാണ് വിവരം.

പുതിയ ബിജെപി സംഘടനാ നേതൃത്വം രൂപീകരിക്കാനും അടുത്തിടെ എൻഡിഎയിൽ ചേർന്ന സഖ്യകക്ഷികൾക്ക് മന്ത്രിസ്ഥാനം നൽകാനുമുള്ള നീക്കങ്ങളുടെ ഭാഗമായാണ് പുനഃസംഘടന ആലോചിക്കുന്നതെന്നും റിപ്പോർട്ടുകളുണ്ട്. മന്ത്രി ജോർജ് കുര്യൻ സ്ഥാനം ഒഴിഞ്ഞതും കഴിഞ്ഞയാഴ്ച 17 മുതിർന്ന ഉദ്യോഗസ്ഥരുടെ ചുമതലമാറ്റവും ഇതിന്റെ മുന്നൊരുക്കമായിരുന്നുവെന്നാണ് രാഷ്ട്രീയവൃത്തങ്ങളുടെ വിലയിരുത്തൽ.

എഎപിയിൽ നിന്ന് എൻഡിഎയിലേക്ക് എത്തിയ രാഘവ് ഛദ്ദ മന്ത്രിസഭയിലെത്തുമെന്ന അഭ്യൂഹങ്ങളും ശക്തമാണ്. മഹാരാഷ്ട്ര ഉപമുഖ്യമന്ത്രി ഏകനാഥ് ഷിൻഡേയുടെ മകനും എംപിയുമായ ഡോ. ശ്രീകാന്ത് ഷിൻഡേയ്ക്കും മന്ത്രിസ്ഥാനം ലഭിച്ചേക്കുമെന്നാണ് സൂചന. അടുത്തിടെ ടിഎംസിയിൽ നിന്നെത്തിയ നേതാക്കൾക്കും ജെഡിയുവിന്റെ ആവശ്യങ്ങൾ പരിഗണിച്ചുള്ള അധിക പ്രാതിനിധ്യത്തിനും സാധ്യതയുണ്ടെന്നാണ് റിപ്പോർട്ടുകൾ.

അമിത് ഷായെ ഉപപ്രധാനമന്ത്രിയാക്കുമോ?

മന്ത്രിസഭാ പുനഃസംഘടനയുമായി ബന്ധപ്പെട്ട ചർച്ചകളിൽ ഏറ്റവും കൂടുതൽ ശ്രദ്ധ നേടുന്നത് ഉപപ്രധാനമന്ത്രി പദവിയാണ്. കേന്ദ്ര ആഭ്യന്തരമന്ത്രി അമിത് ഷായെ ഉപപ്രധാനമന്ത്രിയാക്കുമെന്ന അഭ്യൂഹങ്ങൾ ശക്തമാണ്. അങ്ങനെ സംഭവിച്ചാൽ ബിജെപിയുടെ ഭാവി നേതൃത്വത്തിലേക്കുള്ള സൂചനയായും അത് വിലയിരുത്തപ്പെടും. എന്നാൽ ഇക്കാര്യത്തിൽ ആർഎസ്എസിന്റെ നിലപാടും രാഷ്ട്രീയ സാഹചര്യങ്ങളും നിർണായകമാകുമെന്നാണ് വിലയിരുത്തൽ.

അതേസമയം, ഇതുവരെ കേന്ദ്രസർക്കാരോ ബിജെപി നേതൃത്വമോ മന്ത്രിസഭാ പുനഃസംഘടനയെക്കുറിച്ചോ വകുപ്പുമാറ്റങ്ങളെക്കുറിച്ചോ ഔദ്യോഗിക സ്ഥിരീകരണം നൽകിയിട്ടില്ല. നിലവിൽ പ്രചരിക്കുന്നത് രാഷ്ട്രീയവൃത്തങ്ങളിൽ നിന്നുള്ള റിപ്പോർട്ടുകളും അഭ്യൂഹങ്ങളുമാണ്.