വാഷിങ്ടൺ: അമേരിക്കയിലെ റോഡ് ഐലൻഡ് സംസ്ഥാനത്തെ ബ്രൗൺ സർവകലാശാല കാമ്പസിൽ ശനിയാഴ്ച വൈകിട്ട് നടന്ന വെടിവെപ്പിൽ രണ്ടുപേർ കൊല്ലപ്പെട്ടു. അക്രമി സംഭവസ്ഥലത്തുനിന്നും രക്ഷപെട്ടു എന്നാണ് വിവരം. ഒട്ടേറെപേർക്ക് പരുക്കേറ്റിട്ടുണ്ട്.
പ്രാദേശിക സമയം വൈകിട്ട് 4.15-ഓടെയാണ് അക്രമമുണ്ടായത്. ഉടൻതന്നെ സർവകലാശാല അധികൃതർ ജാഗ്രതാനിർദേശം പുറപ്പെടുവിച്ചു. എല്ലാവരെയും സുരക്ഷിത കേന്ദ്രങ്ങളിൽ എത്തിച്ച് മൊബൈൽ ഫോണുകൾ സൈലന്റ് നിലയിൽ സൂക്ഷിക്കാൻ നിർദേശിച്ചു.
ആദ്യം അക്രമിയെ കസ്റ്റഡിയിൽ എടുത്തുവെന്ന് പൊലീസും പ്രസിഡന്റ് ഡൊണാൾഡ് ട്രംപും അറിയിച്ചു. എന്നാൽ പിന്നീട് അത് തിരുത്തി. അക്രമി ഇപ്പോഴും പിടിയിലല്ലെന്നതാണ് പുതിയ വിവരം. പല പേർക്കും വെടിയേറ്റതായി പൊലീസ് സ്ഥിരീകരിച്ചു.
എഫ്ബിഐ ഉൾപ്പെടെയുള്ള അന്വേഷണം ഉടൻ ആരംഭിച്ചു. സംഭവത്തിന്റെ പശ്ചാത്തലവും കാരണങ്ങളും വ്യക്തമായി അറിയാത്തതിനാൽ, സർവകലാശാല കാമ്പസിലെ സുരക്ഷാ നടപടികൾ ശക്തമാക്കിയിട്ടുണ്ട്.
