06:21pm 22 November 2026
NEWS
മരണംവരെ സംഭവിക്കാം; ഫ്രോസൺ ബെറി ഉൽപന്നങ്ങൾ ഏറ്റവും ഉയർന്ന അപകടസാധ്യതാ വിഭാഗത്തിൽ; 17 പേർക്ക് രോഗബാധ
22/11/2026  05:23 AM IST
nila
മരണംവരെ സംഭവിക്കാം; ഫ്രോസൺ ബെറി ഉൽപന്നങ്ങൾ ഏറ്റവും ഉയർന്ന അപകടസാധ്യതാ വിഭാഗത്തിൽ; 17 പേർക്ക് രോഗബാധ

 

വാഷിങ്ടൺ: മാരകമായേക്കാവുന്ന ഇ.കോളി ബാക്ടീരിയയുടെ സാന്നിധ്യം സംശയിക്കുന്നതിനെ തുടർന്ന് അമേരിക്കയിൽ തിരിച്ചുവിളിച്ച ഫ്രോസൺ ബെറി ഉൽപന്നങ്ങൾക്ക് ഏറ്റവും ഉയർന്ന അപകടസാധ്യതാ മുന്നറിയിപ്പ് നൽകി ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ). വാൾമാർട്ടിലും ട്രേഡർ ജോസിലും വിൽപ്പന നടത്തിയിരുന്ന മൂന്ന് ഉൽപന്നങ്ങളെയാണ് ഏറ്റവും ഗുരുതരമായ റിസ്ക് വിഭാഗമായ ക്ലാസ് 1ൽ ഉൾപ്പെടുത്തിയത്. ഉൽപന്നങ്ങൾ ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങൾക്കോ മരണത്തിനോ കാരണമാകാൻ ന്യായമായ സാധ്യതയുണ്ടെന്നാണ് ഈ വിഭാഗം സൂചിപ്പിക്കുന്നത്.

ഇ.കോളി ബാക്ടീരിയയുടെ സാന്നിധ്യമാണ് ആരോഗ്യവകുപ്പ് അധികൃതരെ ആശങ്കയിലാക്കുന്നത്. രക്തം കലർന്ന വയറിളക്കത്തിന് കാരണമാകുന്ന ഈ ബാക്ടീരിയ അപൂർവ സാഹചര്യങ്ങളിൽ രക്തത്തിൽ അണുബാധയ്ക്കും (സെപ്സിസ്) ഇടയാക്കാം. ചെറിയ കുട്ടികൾക്കും പ്രായമായവർക്കുമാണ് അണുബാധ കൂടുതൽ അപകടകരം.

വാൾമാർട്ടിന്റെ ഗ്രേറ്റ് വാല്യു ഓർഗാനിക് ട്രിപ്പിൾ ബെറി ബ്ലെൻഡ് (10 ഔൺസ്), ഗ്രേറ്റ് വാല്യു ഓർഗാനിക് ബ്ലൂബെറീസ് (10 ഔൺസ്), ട്രേഡർ ജോസിന്റെ ഓർഗാനിക് മിക്സഡ് ബെറി ബ്ലെൻഡ് (12 ഔൺസ്) എന്നിവയാണ് തിരിച്ചുവിളിച്ച ഉൽപന്നങ്ങൾ.

ചിലി ആസ്ഥാനമായി പ്രവർത്തിക്കുന്ന ഫ്രൂട്ടാസ് വൈ ഹോർട്ടാലിസാസ് ഡെൽ സുർ എസ്എ (Frutas y Hortalizas del Sur SA) എന്ന കമ്പനിയാണ് ഒക്ടോബറിൽ ആദ്യമായി ഈ ഉൽപന്നങ്ങൾ തിരിച്ചുവിളിക്കുന്നതായി അറിയിച്ചത്. ആകെ 1.54 ലക്ഷം പാക്കറ്റ് ഫ്രോസൺ ബെറികളാണ് വിപണിയിൽനിന്ന് പിൻവലിച്ചത്. അമേരിക്കയിലെ തെക്കൻ മേഖല, വടക്കുകിഴക്കൻ മേഖല, മധ്യപടിഞ്ഞാറൻ മേഖല എന്നിവിടങ്ങളിലായി 30 സംസ്ഥാനങ്ങളിലാണ് ഇവ വിൽപ്പന നടത്തിയത്. അടുത്ത വർഷം ജൂൺ വരെ ഉപയോഗിക്കാവുന്ന തീയതി രേഖപ്പെടുത്തിയ പാക്കറ്റുകളും ഇതിൽ ഉൾപ്പെടുന്നു.

ബെറികളുമായി ബന്ധപ്പെട്ട ഇ.കോളി ബാധയെ തുടർന്ന് 17 പേർക്ക് രോഗം സ്ഥിരീകരിക്കുകയും ആറുപേരെ ആശുപത്രിയിൽ പ്രവേശിപ്പിക്കുകയും ചെയ്തു. ഫ്ലോറിഡ, ജോർജിയ സംസ്ഥാനങ്ങളിലാണ് രോഗബാധ റിപ്പോർട്ട് ചെയ്തത്. മരണങ്ങളൊന്നും റിപ്പോർട്ട് ചെയ്തിട്ടില്ല. മറ്റ് ബെറി ഉൽപന്നങ്ങളുമായി ബന്ധപ്പെട്ട് രോഗബാധയോ മരണമോ കണ്ടെത്തിയിട്ടില്ലെന്നാണ് അധികൃതർ വ്യക്തമാക്കുന്നത്.

തിരിച്ചുവിളിച്ച ഉൽപന്നങ്ങൾ തിരിച്ചറിയാൻ പാക്കറ്റിലെ ബാർകോഡിന് സമീപമുള്ള യുപിസി നമ്പറുകൾ പരിശോധിക്കണമെന്ന് നിർദേശമുണ്ട്. ഗ്രേറ്റ് വാല്യു ഓർഗാനിക് ട്രിപ്പിൾ ബെറി ബ്ലെൻഡിന്റെ കോഡുകൾ 6 031 01, 6 041 01 എന്നിവയാണ്. ഗ്രേറ്റ് വാല്യു ഓർഗാനിക് ബ്ലൂബെറീസിന് 6 019 01, 6 040 01, 6 163 01 എന്നീ കോഡുകളാണുള്ളത്. ട്രേഡർ ജോസിന്റെ മിക്സഡ് ബെറി ബ്ലെൻഡിന്റെ കോഡ് 6 051 01 ആണ്.

ഉപഭോക്താക്കൾ ഈ ഉൽപന്നങ്ങൾ ഉപയോഗിക്കരുതെന്നും ഉടൻ കളയുകയോ വാങ്ങിയ കടകളിൽ തിരികെ നൽകി മുഴുവൻ തുകയും തിരികെ വാങ്ങുകയോ ചെയ്യണമെന്നും അധികൃതർ നിർദേശിച്ചു.

ബെറികളുമായി ബന്ധപ്പെട്ട ആദ്യ മുന്നറിയിപ്പ് ജൂലൈയിലാണ് പുറത്തുവന്നത്. അന്ന് പബ്ലിക്സ് സ്റ്റോറുകളിൽ വിറ്റിരുന്ന 10 ഔൺസ് പാക്കറ്റുകളിലുള്ള ഫ്രോസൺ ഗ്രീൻവൈസ് ഓർഗാനിക് ഐക്യുഎഫ് ബ്ലൂബെറീസിലും ഇ.കോളി സാന്നിധ്യമുണ്ടാകാമെന്ന് നിർമാതാക്കൾ മുന്നറിയിപ്പ് നൽകിയിരുന്നു. തെക്കൻ മേഖലയിലെ എട്ട് സംസ്ഥാനങ്ങളിലായിരുന്നു ഇവയുടെ വിൽപ്പന.

തുടർന്ന് ജൂലൈയിൽ തന്നെ ഗ്രീൻവൈസ് ഓർഗാനിക് ഫ്രോസൺ ഹോൾ ബ്ലൂബെറീസ്, ഹോൾ മിക്സഡ് ബെറീസ് എന്നിവയും തിരിച്ചുവിളിച്ചു. 10 ഔൺസ്, 48 ഔൺസ് പാക്കറ്റുകൾ ഇതിൽ ഉൾപ്പെട്ടിരുന്നു.

മേയ് 11 മുതൽ ഓഗസ്റ്റ് 2 വരെയുള്ള കാലയളവിലാണ് രോഗബാധിതർക്ക് ലക്ഷണങ്ങൾ കണ്ടുതുടങ്ങിയത്. ആരോഗ്യവകുപ്പ് അധികൃതർ അഭിമുഖം നടത്തിയ 13 പേരിൽ 11 പേരും രോഗലക്ഷണങ്ങൾ പ്രകടമാകുന്നതിന് മുൻപുള്ള ഒരാഴ്ചയ്ക്കിടെ ഫ്രോസൺ ബ്ലൂബെറീസ് കഴിച്ചിരുന്നതായി മൊഴി നൽകി. ഒക്ടോബറിൽ രോഗവ്യാപനം അവസാനിച്ചതായി യുഎസ് സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) പ്രഖ്യാപിച്ചിരുന്നു.

ഒക്ടോബറിലെ തിരിച്ചുവിളിക്കലിൽ ഉൾപ്പെട്ട ഗ്രേറ്റ് വാല്യു ഉൽപന്നങ്ങൾ അമേരിക്കയിലെ 30 സംസ്ഥാനങ്ങളിലെ തിരഞ്ഞെടുത്ത വാൾമാർട്ട് സ്റ്റോറുകളിലും പ്യൂർട്ടോ റിക്കോയിലുമാണ് വിതരണം ചെയ്തത്. ട്രേഡർ ജോസിന്റെ ഉൽപന്നങ്ങൾ 26 സംസ്ഥാനങ്ങളിലെയും വാഷിങ്ടൺ ഡിസിയിലെയും സ്റ്റോറുകളിൽ വിൽപ്പനയ്ക്കെത്തിച്ചിരുന്നു. ജൂലൈയിലെ ആദ്യ തിരിച്ചുവിളിക്കൽ അലബാമ, ഫ്ലോറിഡ, ജോർജിയ, കെന്റക്കി, നോർത്ത് കരോലിന, സൗത്ത് കരോലിന, ടെന്നസി, വിർജീനിയ എന്നീ എട്ട് സംസ്ഥാനങ്ങളിലേക്കാണ് ബാധകമായിരുന്നത്.

ഇ.കോളിയുടെ കൂടുതൽ ഗുരുതരമായ രോഗബാധയ്ക്ക് കാരണമാകാൻ സാധ്യതയുള്ള O145:H28 എന്ന വകഭേദമാണ് ആശങ്കയ്ക്ക് ഇടയാക്കുന്നത്. ഈ ബാക്ടീരിയ ബാധിച്ചാൽ രക്തം കലർന്ന വയറിളക്കവും മറ്റ് ഗുരുതരമായ ലക്ഷണങ്ങളും ഉണ്ടാകാനുള്ള സാധ്യത കൂടുതലാണ്. തിരിച്ചുവിളിക്കലുമായി ബന്ധപ്പെട്ട് ആരോഗ്യ ഏജൻസികളുമായി സഹകരിച്ച് പ്രവർത്തിച്ചുവരികയാണെന്ന് നിർമാതാക്കളായ ഫ്രൂട്ടാസ് വൈ ഹോർട്ടാലിസാസ് ഡെൽ സുർ അറിയിച്ചു.

പഴങ്ങൾ എങ്ങനെയാണ് ബാക്ടീരിയ ബാധയ്ക്ക് ഇരയായതെന്ന് വ്യക്തമായിട്ടില്ല. മൃഗങ്ങളുടെ വിസർജ്യം കലർന്ന വെള്ളം ഉപയോഗിച്ച് പഴങ്ങൾ കഴുകുകയോ സംസ്കരിക്കുകയോ ചെയ്യുമ്പോൾ ഇത്തരത്തിൽ മലിനീകരണം സംഭവിക്കാം.

7.5 ഡിഗ്രി സെൽഷ്യസിന് താഴെയുള്ള താപനിലയിൽ ഇ.കോളി ബാക്ടീരിയയുടെ വളർച്ച നിലയ്ക്കുമെങ്കിലും തണുപ്പിച്ച് സൂക്ഷിക്കുന്നതിലൂടെ ഇവ നശിക്കണമെന്നില്ല. മൈനസ് 80 ഡിഗ്രി സെൽഷ്യസിന് താഴെയുള്ള അതിശൈത്യത്തിലും ബാക്ടീരിയയ്ക്ക് അതിജീവിക്കാനാകും. പിന്നീട് സാധാരണ താപനിലയിലേക്ക് എത്തുമ്പോൾ വീണ്ടും സജീവമാകുകയും പെരുകുകയും ചെയ്യാം. ഇതുവഴി അണുബാധയുണ്ടാകാനുള്ള സാധ്യതയുണ്ട്.

ഷിഗ ടോക്സിൻ ഉൽപാദിപ്പിക്കുന്ന ഇ.കോളി ബാക്ടീരിയ ബാധിച്ചാൽ സാധാരണയായി രണ്ട് മുതൽ എട്ട് ദിവസത്തിനുള്ളിൽ രോഗലക്ഷണങ്ങൾ പ്രകടമാകും. രക്തം കലർന്ന വയറിളക്കം, ഛർദി, വയറുവേദന, വയറ്റിൽ മുറിവുപോലുള്ള വേദന എന്നിവയാണ് പ്രധാന ലക്ഷണങ്ങൾ. മിക്കവരും ഒരാഴ്ചയ്ക്കുള്ളിൽ സുഖം പ്രാപിക്കുമെങ്കിലും ചിലരിൽ ഹീമോലിറ്റിക് യൂറീമിക് സിൻഡ്രോം (എച്ച്യുഎസ്) എന്ന ഗുരുതരമായ വൃക്കരോഗം ഉണ്ടാകാം. ഇത് ജീവന് ഭീഷണിയായേക്കാം.

അഞ്ച് വയസ്സിൽ താഴെയുള്ള കുട്ടികൾക്കും പ്രതിരോധശേഷി കുറഞ്ഞവർക്കുമാണ് രോഗബാധയുടെ ഏറ്റവും ഉയർന്ന അപകടസാധ്യത. വൃക്കകളുടെ പ്രവർത്തനം തകരാറിലാക്കുന്ന എച്ച്യുഎസ് കുട്ടികളിലും പ്രായമായവരിലും പ്രതിരോധശേഷി കുറഞ്ഞവരിലുമാണ് കൂടുതലായി കണ്ടുവരുന്നത്. എളുപ്പത്തിൽ ശരീരത്തിൽ ചതവുകൾ ഉണ്ടാകുക, മൂത്രത്തിന്റെ അളവ് കുറയുക, വിളർച്ചയോ വിളറിയ രൂപമോ പ്രകടമാകുക എന്നിവയാണ് പ്രധാന ലക്ഷണങ്ങൾ. ഗുരുതരമായ സാഹചര്യങ്ങളിൽ വൃക്കമാറ്റിവയ്ക്കൽ ശസ്ത്രക്രിയ വരെ ആവശ്യമായി വന്നേക്കാം.

അമേരിക്കയിലും ബ്രിട്ടനിലുമായി പ്രതിവർഷം ഏകദേശം 90,000 അമേരിക്കക്കാരും കുറഞ്ഞത് 1,500 ബ്രിട്ടീഷുകാരും ഇ.കോളി ബാധിതരാകുന്നുണ്ടെന്നാണ് കണക്ക്. ഇരു രാജ്യങ്ങളിലുമായി പ്രതിവർഷം നൂറോളം പേർ ഈ അണുബാധയെ തുടർന്ന് മരിക്കുന്നതായും റിപ്പോർട്ടുകളുണ്ട്. എന്നാൽ രോഗം ബാധിക്കുന്നവരിൽ ഭൂരിഭാഗവും ഗുരുതരമായ സങ്കീർണതകളില്ലാതെ സുഖം പ്രാപിക്കുകയും പരിശോധന നടത്താതിരിക്കുകയും ചെയ്യുന്നതിനാൽ യഥാർഥ രോഗികളുടെ എണ്ണം ഇതിലും കൂടുതലായിരിക്കാമെന്നാണ് വിലയിരുത്തൽ.

ഇവിടെ പോസ്റ്റുചെയ്യുന്ന അഭിപ്രായങ്ങള്‍ കേരളശബ്‌ദത്തിന്റേതല്ല . അഭിപ്രായങ്ങളുടെ പൂര്‍ണ്ണ ഉത്തരവാദിത്വം രചയിതാവിനായിരിക്കും. കേന്ദ്ര സർക്കാരിന്റെ ഐ.ടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളൂം നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
WORLD
img