മീററ്റ്: രാജ്യം നടുങ്ങിയ സൗരഭ് രാജ്പുത് കൊലപാതകക്കേസിൽ ഭാര്യ മുസ്‌കാൻ രസ്തോഗിക്കും കാമുകൻ സാഹിൽ ശുക്ലയ്ക്കും വധശിക്ഷ. ഉത്തർപ്രദേശിലെ മീററ്റ് ജില്ലാ സെഷൻസ് കോടതിയാണ് ഇരുവർക്കും പരമാവധി ശിക്ഷ വിധിച്ചത്. ജഡ്ജി അരവിന്ദ് കുമാർ മിശ്രയാണ് വിധി പ്രസ്താവിച്ചത്. മർച്ചന്റ് നേവി ഉദ്യോഗസ്ഥനായ സൗരഭിനെ ഭാര്യയും അവരുടെ കാമുകനും ചേർന്ന് കൊലപ്പെടുത്തി മൃതദേഹം കഷണങ്ങളാക്കി  നീല ഡ്രമ്മിലിട്ട് സിമന്റ് നിറച്ച് ഒളിപ്പിച്ചെന്നാണ് കേസ്. 

2025 മാർച്ച് നാലിനാണ് സൗരഭ് രാജ്പുത് കൊല്ലപ്പെട്ടത്. ഭാര്യ മുസ്‌കാനും കാമുകൻ സാഹിൽ ശുക്ലയും ചേർന്ന് സൗരഭിനെ കൊലപ്പെടുത്തിയെന്നാണ് പ്രോസിക്യൂഷൻ കേസ്. കൊലപാതകത്തിനുശേഷം മൃതദേഹം കഷണങ്ങളാക്കി സിമന്റ് നിറച്ച നീല ഡ്രമ്മിനുള്ളിൽ ഒളിപ്പിച്ചെന്നും അന്വേഷണത്തിൽ കണ്ടെത്തിയതായി പൊലീസ് അറിയിച്ചു.

മീററ്റിലെ ബ്രഹ്മപുരി മേഖലയിലുള്ള ദമ്പതികളുടെ വീട്ടിൽനിന്ന് മൃതദേഹാവശിഷ്ടങ്ങൾ കണ്ടെത്തിയതോടെയാണ് സംഭവം പുറത്തറിയുന്നത്. മൃതദേഹം ഒളിപ്പിക്കാൻ ഉപയോഗിച്ച നീല ഡ്രം കേസിലെ പ്രധാന തെളിവുകളിലൊന്നായി മാറി. പിന്നാലെ മുസ്‌കാനെയും സാഹിലിനെയും പൊലീസ് അറസ്റ്റ് ചെയ്തു.

ഏകദേശം 13 മാസം നീണ്ട വിചാരണയ്ക്കിടെ പ്രോസിക്യൂഷൻ 22 സാക്ഷികളെ വിസ്തരിച്ചു. കൊലപാതകത്തിന് ഉപയോഗിച്ചുവെന്ന് പറയുന്ന നീല ഡ്രം, സിമന്റ്, കത്തി, പാത്രങ്ങൾ എന്നിവ വാങ്ങിയതുമായി ബന്ധപ്പെട്ടവരും സാക്ഷിപ്പട്ടികയിലുണ്ടായിരുന്നു. പ്രതികൾ വിവിധ സ്ഥലങ്ങളിൽ താമസിച്ചിരുന്നതായി സ്ഥിരീകരിക്കുന്നതിനായി ഹോട്ടൽ മാനേജർമാരെയും വിസ്തരിക്കുകയും ബന്ധപ്പെട്ട രേഖകൾ പരിശോധിക്കുകയും ചെയ്തു.

സെപ്റ്റംബർ 30-നാണ് മുസ്‌കാനും സാഹിലും കുറ്റക്കാരാണെന്ന് കോടതി കണ്ടെത്തിയത്. തുടർന്ന് ശിക്ഷയെക്കുറിച്ചുള്ള വാദങ്ങൾ കേൾക്കുന്നതിനായി പ്രതികൾക്ക് 15 ദിവസത്തെ സമയം അനുവദിച്ചു. കുറ്റകൃത്യത്തിന്റെ ക്രൂരതയും വിചാരണയിൽ ഹാജരാക്കിയ തെളിവുകളും ചൂണ്ടിക്കാട്ടി ഇരുവർക്കും പരമാവധി ശിക്ഷ നൽകണമെന്നാണ് പ്രോസിക്യൂഷൻ ആവശ്യപ്പെട്ടത്.

കോടതി വിധിക്കുശേഷം സൗരഭിന്റെ അമ്മ വൈകാരികമായാണ് പ്രതികരിച്ചത്. ഒരുമിച്ച് ജീവിക്കാൻ താൽപര്യമില്ലെങ്കിൽ വേർപിരിയാമായിരുന്നുവെന്നും അതിനു പകരം മറ്റൊരാളുടെ മകനെ കൊലപ്പെടുത്തിയത് അംഗീകരിക്കാനാവില്ലെന്നും അവർ പറഞ്ഞു. ഇത്തരം ക്രൂരമായ കുറ്റകൃത്യങ്ങൾ ചെയ്യുന്നവർ വധശിക്ഷ നേരിടേണ്ടിവരുമെന്നും സൗരഭിന്റെ അമ്മ പ്രതികരിച്ചു.

സൗരഭിന്റെ കൊലപാതകവും മൃതദേഹം നീല ഡ്രമ്മിൽ ഒളിപ്പിച്ച രീതിയും പുറത്തുവന്നതോടെ ദേശീയതലത്തിൽ വലിയ ചർച്ചകൾക്ക് വഴിവെച്ച കേസിനാണ് കോടതി ശിക്ഷാവിധിയിലൂടെ നിർണായക ഘട്ടം കുറിച്ചത്.