തിരുവനന്തപുരം: ആറ് ലക്ഷം രൂപ കടം വാങ്ങിയതിന് 40 ലക്ഷത്തോളം രൂപ പലിശ ഈടാക്കുകയും ഭീഷണിപ്പെടുത്തുകയും ചെയ്ത കൊള്ളപ്പലിശക്കാരുടെ പീഡനം സഹിക്കാനാവാതെ ഗുരുവായൂരിലെ വ്യാപാരി മുസ്തഫ ജീവനൊടുക്കിയ സംഭവം കേരളത്തിലെ ബ്ലേഡ് മാഫിയയുടെ പിടിമുറുക്കുന്ന ഭീകരതയുടെ ഒടുവിലത്തെ ഉദാഹരണമാണ്. സംഭവം നടന്ന് രണ്ടാഴ്ച കഴിഞ്ഞും ബന്ധുക്കൾ മാധ്യമങ്ങളിൽ പരാതിപ്പെട്ടതിന് ശേഷവുമാണ് പൊലീസ് കേസെടുത്തതും പ്രതിക്കായി തെരച്ചിൽ ആരംഭിച്ചതും.
​മുസ്തഫയുടെ ആത്മഹത്യാക്കുറിപ്പിൽ, ഒന്നര വർഷം കൊണ്ട് 40 ലക്ഷം രൂപ പലിശയായി നൽകിയെന്നും, ഭീഷണിപ്പെടുത്തി സ്ഥലവും എഴുതി വാങ്ങിയെന്നും വ്യക്തമാക്കുന്നു. ഭാര്യയുടെയും മക്കളുടെയും മുന്നിലിട്ട് മർദ്ദിച്ചതായും മറ്റു സംസ്ഥാനങ്ങളിൽ കൊണ്ടുപോയി കേസ് കൊടുക്കുമെന്ന് ഭീഷണിപ്പെടുത്തിയതായും ബന്ധുക്കൾ ആരോപിക്കുന്നു. പ്രതിയുടെ വീട്ടിൽ നടത്തിയ പരിശോധനയിൽ മുസ്തഫയുടെ ഭൂമിയുടെ രേഖകൾ അടക്കം നിർണ്ണായക തെളിവുകൾ കണ്ടെടുത്തതായി പൊലീസ് അറിയിച്ചു.

​ബ്ലേഡ് മാഫിയ നാടൻ മുതൽ ഓൺലൈൻ വരെ:

​കേരളത്തിലെ നഗരങ്ങളിലും ഗ്രാമങ്ങളിലും ബ്ലേഡ് മാഫിയ ശക്തമാവുകയാണ്. ഇരകൾ ആത്മഹത്യ ചെയ്യുമ്പോൾ മാത്രമാണ് പലപ്പോഴും ഇത്തരം സംഭവങ്ങൾ പുറത്തുവരുന്നത്. നാടൻ വട്ടിപ്പലിശക്കാർ ഗുണ്ടാസംഘങ്ങളെ ഉപയോഗിച്ച് ഭീഷണിപ്പെടുത്തുമ്പോൾ, ഓൺലൈൻ മാഫിയകൾ അതിലും അപകടകരമായ രീതിയിൽ വലവിരിക്കുന്നു.

​ചൈനീസ് ആപ്പുകൾ പോലുള്ള ഓൺലൈൻ ലോൺ പ്ലാറ്റ്‌ഫോമുകൾ ആകർഷകമായ പരസ്യങ്ങളിലൂടെയാണ് ആളുകളെ കുടുക്കുന്നത്. ലോൺ നൽകുന്നതിനായി ഉപഭോക്താവിന്റെ ആധാർ, പാൻ, ബാങ്ക് വിവരങ്ങൾക്കൊപ്പം മൊബൈലിലെ സ്വകാര്യ വിവരങ്ങൾ, ഫോട്ടോകൾ, കോൺടാക്റ്റുകൾ എന്നിവയെല്ലാം ഇവർ കൈക്കലാക്കുന്നു. പണം തിരിച്ചടയ്ക്കാൻ വൈകിയാൽ, മോഷ്ടിച്ചെടുക്കുന്ന സ്വകാര്യ ചിത്രങ്ങളും വീഡിയോകളും പ്രചരിപ്പിക്കുമെന്ന് ഭീഷണിപ്പെടുത്തുകയും അത് നടപ്പിലാക്കുകയും ചെയ്യുന്ന സംഭവങ്ങൾ നിരവധിയാണ്. നാട്ടിലെ ബ്ലേഡ് കമ്പനിക്കാരെക്കാൾ പതിൻമടങ്ങ് അപകടകാരികളാണ് ഈ ഓൺലൈൻ സംഘങ്ങൾ.

​പതിറ്റാണ്ടുകളായി വട്ടിപ്പലിശക്കാർ കേരളത്തിൽ സജീവമാണ്. നിയമനടപടികളുടെ കുറവും, ധനകാര്യ സ്ഥാപനങ്ങൾ സ്ഥിരവരുമാനമില്ലാത്തവരെ ഒഴിവാക്കുന്നതും ഇവർക്ക് സഹായകരമാകുന്നു. പത്ത് വർഷം മുൻപ് നടത്തിയ ‘ഓപ്പറേഷൻ കുബേര’ പോലുള്ള പൊലീസ് റെയ്ഡുകൾ അനധികൃത പണമിടപാടുകാരെ ഒതുക്കാൻ സഹായിച്ചിരുന്നു. എന്നാൽ ചില പൊലീസ് ഉദ്യോഗസ്ഥർ വൻകിടക്കാരെ രക്ഷപ്പെടുത്തുന്ന പ്രവണതയും അന്നുണ്ടായി.

​വലിപ്പച്ചെറുപ്പം നോക്കാതെ ഈ കൊള്ളപ്പലിശ - ബ്ലേഡ് മാഫിയകളെ അടിച്ചമർത്തിയില്ലെങ്കിൽ കൂടുതൽ വിലപ്പെട്ട ജീവനുകൾ നഷ്ടമാകുമെന്ന മുന്നറിയിപ്പാണ് ഗുരുവായൂരിലെ സംഭവം നൽകുന്നത്.