തിരുവനന്തപുരം∙ തിരുവനന്തപുരം കോർപറേഷൻ കൗൺസിലർ ആർ. ശ്രീലേഖ രാജിവച്ചെന്ന വാർത്ത തള്ളി ബിജെപി നേതാവ് എസ്. സുരേഷ്. ശ്രീലേഖ കൗൺസിലർ സ്ഥാനം രാജിവച്ചിട്ടില്ലെന്നും പ്രചരിക്കുന്ന വാർത്തകൾ വസ്തുതാവിരുദ്ധമാണെന്നും സുരേഷ് വ്യക്തമാക്കി.
ശാരീരിക അസ്വസ്ഥതകളെ തുടർന്ന് ശ്രീലേഖ നിലവിൽ ആശുപത്രിയിൽ ചികിത്സയിലാണെന്നും സുരേഷ് ഫെയ്സ്ബുക്കിൽ പങ്കുവച്ച കുറിപ്പിൽ പറഞ്ഞു. ആരോഗ്യപ്രശ്നങ്ങൾ കാരണം ജനപ്രതിനിധിയുടെ ചുമതലകൾ നിർവഹിക്കാൻ കഴിയുമോ എന്ന ആശങ്ക മാത്രമാണ് ബന്ധപ്പെട്ടവരുടെ ശ്രദ്ധയിൽപ്പെടുത്തിയതെന്നും അദ്ദേഹം വിശദീകരിച്ചു.
ശ്രീലേഖ രാജിവച്ചുവെന്ന തരത്തിൽ പുറത്തുവന്ന റിപ്പോർട്ടുകൾ ഇതോടെ ബിജെപി നേതൃത്വം തന്നെ നിഷേധിച്ചിരിക്കുകയാണ്. ആരോഗ്യസ്ഥിതിയുമായി ബന്ധപ്പെട്ട ആശങ്ക മാത്രമാണ് വിഷയമായതെന്നും രാജി സംബന്ധിച്ച തീരുമാനം ഉണ്ടായിട്ടില്ലെന്നുമാണ് സുരേഷിന്റെ വിശദീകരണം.
ഫെയ്സ്ബുക്ക് കുറിപ്പിന്റെ പൂർണരൂപം
ശ്രീലേഖ ചേച്ചിയെ ആശുപത്രിയിൽ സന്ദർശിച്ചു.. കുറച്ചു ദിവസങ്ങളായി ശാരീരിക അസ്വാസ്‌ഥ്യം അവരെ അലട്ടുന്നു. അതുകാരണം ജനപ്രതിനിധി എന്ന നിലയിലുള്ള ചുമതല വേണ്ടവണ്ണം നിർവ്വഹിക്കാൻ കഴിയില്ലേ എന്ന ചിന്ത യും ഉത്കണ്ടയും ഉണ്ട്, അത് ഏറ്റവും വേണ്ടപ്പെട്ടവരുടെ ശ്രദ്ധയിൽപ്പെടുത്തി എന്നു മാത്രം, ദൗർഭാഗ്യവശാൽ അത് മാധ്യമ ചർച്ചക്ക് കാരണമായി. ആർ. ശ്രീലേഖ രാജിവച്ചു എന്ന വാർത്ത ശരിയല്ല.
അവർ മറ്റു രാഷ്ട്രീയപാർട്ടികളിൽ ചേർന്നേക്കും, എന്തോ പോസ്റ്റ് കിട്ടാത്തതുകൊണ്ടാണ്, പാർട്ടിയുമായി വിലപേശുകയാണ് എന്ന നിലയിലൊക്കെ ചിലമാധ്യമങ്ങൾ കഥകളുണ്ടാക്കിയത് സമാന്യമര്യാദക്ക് നിരക്കുന്നതല്ല. ചിലർ ബിജെപിയുടെ കോർപറേഷൻ ഭരണം ഇപ്പോ താഴെ പോകും എന്നൊക്കെ ദിവാസ്വപ്നം കണ്ടുതുടങ്ങി. ആ വെള്ളം വാങ്ങിവച്ചോളൂ അഞ്ചു വർഷം മാത്രമല്ല തുടർന്നും തിരുവനന്തപുരം ബിജെപി തന്നെ ഭരിക്കും. കേരളത്തിലെ ആദ്യവനിത ഐപിഎസ്കാരിയും ഡിജിപിയും എന്ന നിലയ്ക്ക് അവരെ ശ്രീ.കെ. സുരേന്ദ്രൻ ആണ് ബിജെപിയിൽ ചേർത്തത്. തുടർന്ന് പാർട്ടിയോടുള്ള പ്രതിബദ്ധത അവർ എപ്പോഴും കാത്ത് സൂക്ഷിച്ചിട്ടുണ്ട്. പാർട്ടി സംസ്ഥാന വൈസ് പ്രസിഡന്റ് എന്ന നിലയിൽ മികവുറ്റ പ്രവർത്തനമാണ് നടത്തുന്നത്. പാർട്ടി ആവശ്യപ്പെട്ടപ്പോൾ കൗൺസിലർ സ്ഥാനാർത്ഥിയായി മത്സരിക്കാൻ തയ്യാറായതും അവർക്ക് പാർട്ടിയോടുള്ള വിധേയത്വം തെളിയിക്കുന്നു. പാർട്ടിയുടെ മൂന്നു ദിവസം നീണ്ടുനിന്ന ജില്ലാതല പഠനശിബിരത്തിൽ ഒരു സാധാരണ പ്രവർത്തകയെ പോലെ ശ്രീലേഖയുണ്ടായിരുന്നു അഴിമതിക്കെതിരെ എന്നും പോരാടിയിട്ടുള്ള ആർ.ശ്രീലേഖക്ക് അനധികൃത സമ്പാദ്യമൊന്നുമില്ല, സ്വന്തം പെൻഷൻ പണമെടുത്താണ് അവർ വാർഡിലെ ജനങ്ങളെ സേവിക്കുന്നത്.
പരമ്പരാഗത രാഷ്ട്രീയക്കാരിയല്ല ആർ. ശ്രീലേഖ, അവർ ഒരു സ്ത്രീയാണ്, ഒരു അമ്മയാണ്. അവർ എന്നും ജനങ്ങൾക്കൊപ്പം സേവനനിരതയായി നിലകൊള്ളും.എത്രയും പെട്ടെന്ന് ആരോഗ്യം വീണ്ടെടുക്കട്ടെ എന്ന് ആശംസിക്കുന്നു.. എന്നോടൊപ്പം സംസ്ഥാന വൈസ് പ്രസിഡന്റ് കെ.സോമൻ ഉണ്ടായിരുന്നു. ജില്ലാ പ്രസിഡന്റ് കരമന ജയനും മേയർ വി.വി. രാജേഷും അവരെ അശുപത്രിയിലെത്തി കണ്ടു.
