ബംഗളുരു: കർണാടകയിൽ എൻഡിഎ സഖ്യം കൂടുതൽ ശക്തമാക്കാനും ഭാവി തിരഞ്ഞെടുപ്പുകളെ ഒറ്റക്കെട്ടായി നേരിടാനുമുള്ള തീരുമാനവുമായി ബിജെപി, ജെഡിഎസ് മുതിർന്ന നേതാക്കളായ ബി.എസ്. യെഡിയൂരപ്പയും എച്ച്.ഡി. ദേവഗൗഡയും രംഗത്തെത്തി. 2028-ലെ നിയമസഭാ തിരഞ്ഞെടുപ്പ് ലക്ഷ്യമിട്ടാണ് ഇരുപാർട്ടികളും തമ്മിലുള്ള പുതിയ രാഷ്ട്രീയ നീക്കം.
തദ്ദേശ സ്വയംഭരണ സ്ഥാപനങ്ങൾ, ഉപതിരഞ്ഞെടുപ്പുകൾ, പൊതുതിരഞ്ഞെടുപ്പുകൾ എന്നിവയിലെല്ലാം ബിജെപിയും ജെഡിഎസും ഇനി എൻഡിഎ ബാനറിനു കീഴിൽ ഒറ്റക്കെട്ടായി മത്സരിക്കും.
സംസ്ഥാനത്ത് ഭരണത്തിലിരിക്കുന്ന കോൺഗ്രസ് പാർട്ടിയെ പരാജയപ്പെടുത്താൻ ലക്ഷ്യമിട്ട്, 2028-ലെ നിയമസഭാ തിരഞ്ഞെടുപ്പിൽ 140 മുതൽ 150 സീറ്റുകൾ നേടുക എന്നതാണ് സഖ്യത്തിന്റെ പ്രധാന ലക്ഷ്യം.
അടുത്തിടെ നടന്ന കർണാടക ലെജിസ്ലേറ്റീവ് കൗൺസിൽ (എംഎൽസി) തിരഞ്ഞെടുപ്പിൽ നാല് സീറ്റുകളും എൻഡിഎ തൂത്തുവാരിയ ആത്മവിശ്വാസത്തിലാണ് നേതാക്കൾ ഈ നീക്കം നടത്തിയത്.
താഴെത്തട്ടിൽ ഉണ്ടാകാനിടയുള്ള ചെറിയ അഭിപ്രായവ്യത്യാസങ്ങൾ പരസ്യമായി പ്രസ്താവനകൾ നടത്തുന്നതിന് പകരം പാർട്ടി സംവിധാനത്തിനുള്ളിൽ തന്നെ പരിഹരിക്കാൻ നേതാക്കൾ കർശന നിർദ്ദേശം നൽകിയിട്ടുണ്ട്.
Photo Courtesy - Google
