തിരുവനന്തപുരം: റവന്യൂ മന്ത്രി എ.പി. അനിൽകുമാറിന്റെ സ്റ്റാഫ് സെക്രട്ടറിമാരിൽ സഭ നിർദേശിച്ചയാളെ ഉൾപ്പെടുത്തിയതിൽ മന്ത്രിക്ക് പരസ്യമായി നന്ദി അറിയിച്ച് തലശ്ശേരി അതിരൂപത ആർച്ച് ബിഷപ്പ് മാർ ജോസഫ് പാംപ്ലാനി. റവന്യൂ വകുപ്പിലെ സ്റ്റാഫ് നിയമനവുമായി ബന്ധപ്പെട്ട് മന്ത്രി നൽകിയ ഉറപ്പ് പാലിച്ചെന്നും ഇതോടെ ഭൂപ്രശ്നങ്ങളിൽ സഭയ്ക്ക് ഇടപെടാൻ സാധിക്കുന്നുണ്ടെന്നും അദ്ദേഹം പറഞ്ഞു.
റവന്യൂ വകുപ്പിൽ സഭയ്ക്ക് സ്വീകാര്യനായ ആരെയെങ്കിലും നിർദേശിച്ചാൽ നിയമിക്കാമെന്ന് മന്ത്രി നേരത്തെ ഉറപ്പുനൽകിയിരുന്നു. എന്നാൽ മന്ത്രി പറഞ്ഞത് വെറുമൊരു ഭംഗിവാക്കാണെന്നായിരുന്നു ആദ്യം കരുതിയതെന്ന് പാംപ്ലാനി വെളിപ്പെടുത്തി. എന്നാൽ വാഗ്ദാനം പാലിച്ച് സഭ നിർദേശിച്ചയാളെ നിയമിക്കാൻ മന്ത്രി തയ്യാറായെന്നും അദ്ദേഹം കൂട്ടിച്ചേർത്തു.
കാസർകോട് നടന്ന ജെൻസി യുവജന ദിനാഘോഷ പരിപാടിയിലായിരുന്നു പാംപ്ലാനിയുടെ പ്രതികരണം. മന്ത്രി എ.പി. അനിൽകുമാർ വേദിയിലിരിക്കെയാണ് അദ്ദേഹം പരസ്യമായി നന്ദി അറിയിച്ചത്.
