പട്‌ന: ഭാര്യയെ കണ്ടെത്തണമെന്ന ആവശ്യവുമായി സാമൂഹികമാധ്യമങ്ങളിലൂടെ കരഞ്ഞപേക്ഷിച്ച യുവാവിന്റെ സംശയങ്ങൾ ഒടുവിൽ ശരിവെക്കപ്പെട്ടു. രണ്ട് മാസത്തിലേറെയായി കാണാതായിരുന്ന 19-കാരിയായ സുജാത കുമാരിയുടെ തിരോധാനം, ബീഹാറിനെ നടുക്കിയ ദുരഭിമാനക്കൊലക്കേസായി മാറിയിരിക്കുകയാണ്. ബീഹാറിലെ മുസാഫർപൂർ സ്വദേശിനിയായ സുജാത കുമാരിയെ സ്വന്തം വീട്ടുകാർ തന്നെ കൊലപ്പെടുത്തി മൃതദേഹം ആരുമറിയാതെ കത്തിക്കുകയായിരുന്നു എന്നാണ് പൊലീസ് അന്വേഷണത്തിൽ കണ്ടെത്തിയത്. 

മുസാഫർപൂർ ജില്ലയിലെ അയൽഗ്രാമങ്ങളിലായിരുന്നു സുജാതയുടെയും ഗൗരിശങ്കറിന്റെയും താമസം. സ്കൂൾകാലത്തെ സൗഹൃദം 2020-ൽ പ്രണയമായി മാറി. എന്നാൽ വ്യത്യസ്ത ജാതികളിൽപ്പെട്ടവരായതിനാൽ ഇരുവരുടെയും കുടുംബങ്ങൾ ഈ ബന്ധത്തെ ശക്തമായി എതിർത്തു. എതിർപ്പുകൾക്കിടയിലും ആറുവർഷത്തോളം പ്രണയം തുടരുകയും ഒടുവിൽ ഈ വർഷം ജനുവരിയിൽ ഇരുവരും ഒളിച്ചോടി വിവാഹിതരാകുകയും ചെയ്തു.

സമസ്തിപുരിൽ നടന്ന വിവാഹശേഷം ദമ്പതികൾ ഹരിയാനയിലേക്ക് താമസം മാറി. എന്നാൽ ഈ വിവാഹം സുജാതയുടെ കുടുംബത്തിൽ വലിയ പ്രതിഷേധത്തിനാണ് വഴിവെച്ചത്. ഗൗരിശങ്കർ യുവതിയെ തട്ടിക്കൊണ്ടുപോയെന്നാരോപിച്ച് കുടുംബം പോലീസിൽ പരാതി നൽകി. ഫെബ്രുവരിയിൽ ദമ്പതികളെ കണ്ടെത്തിയ പോലീസ് കോടതിയിൽ ഹാജരാക്കി. അവിടെ സുജാത വ്യക്തമായി തന്റെ നിലപാട് അറിയിച്ചു. പ്രായപൂർത്തിയായ വ്യക്തിയായ താൻ സ്വന്തം ഇഷ്ടപ്രകാരമാണ് വിവാഹം കഴിച്ചതെന്നും ഭർത്താവിനൊപ്പം ജീവിക്കാനാണ് ആഗ്രഹമെന്നും യുവതി കോടതിയെ അറിയിച്ചു.

എന്നാൽ അതിന് പിന്നാലെ സാഹചര്യങ്ങൾ മാറി. ഹോളി ആഘോഷ സമയത്ത് സുജാത സ്വന്തം വീട്ടിലേക്ക് മടങ്ങേണ്ടിവന്നു. മാർച്ച് 31-നാണ് താൻ ഭാര്യയുമായി അവസാനമായി സംസാരിച്ചതെന്ന് ഗൗരിശങ്കർ പറയുന്നു. അതിനുശേഷം സുജാതയെ കുറിച്ച് യാതൊരു വിവരവും ലഭിച്ചില്ല. ഭാര്യയെക്കുറിച്ച് യാതൊരു വിവരവുമില്ലാതെ ദിവസങ്ങൾ കടന്നുപോകുമ്പോൾ ഗൗരിശങ്കർ കുമാറിന്റെ ആശങ്കയും വേദനയും വർധിച്ചു. ഫോൺ വിളികൾക്ക് മറുപടിയില്ല, യുവതിയുടെ വീട്ടുകാർക്കും ഒന്നും അറിയില്ലെന്ന മറുപടി മാത്രം. ഒടുവിൽ, തന്റെ ഭാര്യയ്ക്ക് എന്തോ ദാരുണം സംഭവിച്ചിട്ടുണ്ടെന്ന വിശ്വാസത്തിൽ അദ്ദേഹം സാമൂഹികമാധ്യമങ്ങളിലൂടെ നീതിക്കായി പോരാട്ടം തുടങ്ങി.

"എന്റെ ഭാര്യയുടെ കൊലയാളികളെ കണ്ടെത്തണം. അല്ലെങ്കിൽ ഞാൻ ജീവനൊടുക്കും" എന്ന അദ്ദേഹത്തിന്റെ വികാരനിർഭരമായ ആഹ്വാനം വ്യാപക ശ്രദ്ധ നേടി. ഇതോടെയാണ് പോലീസ് കേസ് കൂടുതൽ ഗൗരവത്തോടെ അന്വേഷിക്കാൻ തയ്യാറായത്. ഭാര്യയെ തേടിയുള്ള അദ്ദേഹത്തിന്റെ പോരാട്ടം ഒടുവിൽ ഫലിച്ചു. മുതിർന്ന ഉദ്യോഗസ്ഥരുടെ മേൽനോട്ടത്തിൽ പ്രത്യേക അന്വേഷണസംഘം രൂപീകരിച്ച പോലീസ്, കേസിൽ വിശദമായ അന്വേഷണം ആരംഭിച്ചു. അന്വേഷണത്തിന്റെ കേന്ദ്രബിന്ദുവായത് സുജാതയുടെ സഹോദരൻ അഭിഷേക് കുമാറായിരുന്നു.

ചോദ്യംചെയ്യലിനിടെ പുറത്തുവന്ന വിവരങ്ങളാണ് കേസിന്റെ ചുരുളഴിച്ചത്. സുജാത വീണ്ടും ഭർത്താവിന്റെ അടുത്തേക്ക് മടങ്ങുമെന്ന ഭയം കുടുംബാംഗങ്ങൾക്കുണ്ടായിരുന്നുവെന്ന് അന്വേഷണത്തിൽ വ്യക്തമായി. ഇതാണ് ഗൂഢാലോചനയിലേക്കും പിന്നീട് കൊലപാതകത്തിലേക്കും നയിച്ചതെന്നാണ് പോലീസിന്റെ കണ്ടെത്തൽ.

മേയ് എട്ടിന് സുജാതയെ ശ്വാസംമുട്ടിച്ച് കൊലപ്പെടുത്തിയ ശേഷം മൃതദേഹം ബുധി ഗന്ധക് നദിക്കരയിൽ കൊണ്ടുപോയി കത്തിച്ചുവെന്നാണ് അന്വേഷണസംഘം പറയുന്നത്. തെളിവുകൾ ശേഖരിക്കുന്നതിനായി ഫോറൻസിക് വിദഗ്ധർ സംഭവസ്ഥലത്ത് നിന്ന് സാമ്പിളുകളും ശേഖരിച്ചു. കൊലപാതകത്തിൽ അഞ്ച് കുടുംബാംഗങ്ങളിൽ കൂടുതൽ പേർക്ക് പങ്കുണ്ടെന്നാണ് പോലീസിന്റെ നിഗമനം. ബാക്കിയുള്ള പ്രതികളെ കണ്ടെത്താനും കൂടുതൽ തെളിവുകൾ ശേഖരിക്കാനുമായി അന്വേഷണം തുടരുകയാണ്. പ്രണയത്തിനുവേണ്ടി സമൂഹത്തിന്റെയും കുടുംബത്തിന്റെയും എതിർപ്പുകളെ മറികടന്ന ഒരു യുവതിയുടെ ജീവിതമാണ് ഒടുവിൽ സ്വന്തം വീട്ടുകാരുടെ കൈകളാൽ അവസാനിച്ചത്.