ന്യൂഡൽഹി: ഇരുനൂറ്റിനാൽപത്തിമൂന്ന്  അംഗ ബീഹാർ നിയമസഭയിലേക്ക് നടന്ന തീവ്രമായ പോരാട്ടം, ഒടുവിൽ ഭരണത്തുടർച്ച പ്രഖ്യാപിച്ച് അവസാനിച്ചു. മുഖ്യമന്ത്രി നിതീഷ് കുമാർ നയിച്ച എൻ.ഡി.എ സഖ്യം 202 സീറ്റുകൾ തൂത്തുവാരിയാണ് ബീഹാറിൽ അധികാരം നിലനിർത്തിയത്. വികസന നേട്ടങ്ങളെയും സാമൂഹ്യക്ഷേമ പദ്ധതികളെയും മുൻനിർത്തി നിതീഷ് കുമാർ നേടിയ ഈ വിജയം, അദ്ദേഹത്തെ ആറാം തവണയും മുഖ്യമന്ത്രി കസേരയിലേക്ക് അടുപ്പിക്കുന്നു.

ബി.ജെ.പി. കരുത്ത് കാട്ടി

​സഖ്യത്തിൽ ഇത്തവണ ബി.ജെ.പി. 89 സീറ്റുകളോടെ ഏറ്റവും വലിയ ഒറ്റക്കക്ഷിയായി മാറി, തങ്ങളുടെ സ്വാധീനം അരക്കിട്ടുറപ്പിച്ചു. മുഖ്യമന്ത്രിയുടെ പാർട്ടിയായ ജെ.ഡി.യു. 85 സീറ്റുകൾ നേടി വിജയത്തിൽ നിർണായക പങ്ക് വഹിച്ചു. ലോക്ജന ശക്തി പാർട്ടി (എൽ.ജെ.പി-19), ഹിന്ദുസ്ഥാൻ അവാമി മോർച്ച (5), രാഷ്‌ട്രീയ ലോക് മോർച്ച (4) എന്നിവരും എൻ.ഡി.എയുടെ വൻ വിജയത്തിന് മുതൽക്കൂട്ടായി.

​ തകർന്ന മഹാസഖ്യം

​മറുപക്ഷത്ത്, തേജസ്വി യാദവിന്റെ നേതൃത്വത്തിലുള്ള മഹാസഖ്യം നിരാശയുടെ പടുകുഴിയിലായി. കഴിഞ്ഞ തിരഞ്ഞെടുപ്പിൽ 75 സീറ്റുണ്ടായിരുന്ന ആർ.ജെ.ഡി., ഇത്തവണ 25 സീറ്റിലേക്ക് കൂപ്പുകുത്തി. 19 സീറ്റിൽ നിന്ന് 6 സീറ്റിലേക്ക് ഒതുങ്ങിയ കോൺഗ്രസിനും കനത്ത പ്രഹരമേറ്റു. ചെറു പാർട്ടികളായ എ.ഐ.എം.ഐ.എം. (6), ഇടതു പാർട്ടികൾ (3) എന്നിവർ തങ്ങളുടെ നില മെച്ചപ്പെടുത്തിയപ്പോൾ, അത് മഹാസഖ്യത്തിന്റെ വോട്ട് ബാങ്കിൽ വിള്ളൽ വീഴ്ത്തുകയായിരുന്നു.

​നിതീഷിനെ പുണർന്ന 'നാരിശക്തി'

​ഈ തിരഞ്ഞെടുപ്പിലെ ഏറ്റവും ശ്രദ്ധേയമായ ഘടകം സ്ത്രീ വോട്ടർമാരുടെ പങ്കാളിത്തമാണ്. പുരുഷന്മാരെക്കാൾ 5 ശതമാനം അധിക സ്ത്രീകളാണ് ഇത്തവണ പോളിംഗ് ബൂത്തുകളിലെത്തിയത്. സാമ്പത്തികമായി പിന്നാക്കം നിൽക്കുന്ന സ്ത്രീകൾക്കായി പ്രഖ്യാപിച്ച 'മുഖ്യമന്ത്രി റോസ്‌ഗർ യോജൻ', വനിതാ സംരംഭകർക്കുള്ള 'ലഖ്പതി ദീദി' എന്നീ പദ്ധതികൾ നിതീഷ് കുമാറിന് വൻ പിന്തുണ ഉറപ്പാക്കി.
​വികസനം, ക്രമസമാധാനം, സാമൂഹ്യക്ഷേമം എന്നിവയിലൂന്നിയ എൻ.ഡി.എയുടെ പ്രചാരണ തന്ത്രങ്ങൾ, ആർ.ജെ.ഡി. വീണ്ടും അധികാരത്തിൽ വന്നാൽ 'കാട്ടുഭരണം' തിരിച്ചുവരുമെന്ന പ്രചാരണം എന്നിവ വോട്ടർമാരെ സ്വാധീനിച്ചു. മഹാസഖ്യത്തിന്റെ യുവ വോട്ടർമാരെ ആകർഷിക്കാനുള്ള തൊഴിൽ വാഗ്ദാനം പോലും നിതീഷിന്റെ അനുഭവപരിചയത്തിനും വികസന പദ്ധതികൾക്കും മുന്നിൽ നിഷ്പ്രഭമായി.

​ പ്രതികരണങ്ങൾ

​"എൻ.ഡി.എയ്ക്ക് ചരിത്ര വിജയം നൽകി അനുഗ്രഹിച്ച എന്റെ കുടുംബാംഗങ്ങൾക്കും ബീഹാറിലെ യുവാക്കൾക്കും സ്ത്രീകൾക്കും സമൃദ്ധമായ ജീവിതം ഉറപ്പാക്കും."
​പ്രധാനമന്ത്രി നരേന്ദ്രമോദി

​"ഫലം ഞെട്ടിക്കുന്നതാണ്. തുടക്കം മുതൽ നീതിപൂർവമല്ലാത്ത തിരഞ്ഞെടുപ്പായിരുന്നു. മഹാസഖ്യത്തിന് വോട്ടിട്ടവർക്ക് നന്ദി."
​രാഹുൽ ഗാന്ധി

​തുടർച്ചയായി ആറാം തവണയും സംസ്ഥാനത്തെ നയിക്കാൻ ഒരുങ്ങുന്ന നിതീഷ് കുമാറിന് ഈ വിജയം, ബീഹാറിലെ ജനങ്ങൾ വികസനത്തിലും സ്ഥിരതയിലും അർപ്പിച്ച വിശ്വാസത്തിന്റെ പ്രതിഫലനമാണ്.
​