​ദോഹ: അന്താരാഷ്ട്ര കായിക മാധ്യമ രംഗത്തെ പ്രമുഖ പുരസ്കാരമായ 'എഐപിഎസ് (AIPS) സ്‌പോർട്‌സ് മീഡിയ അവാർഡ്‌സി'ലും വിവിധ അന്താരാഷ്ട്ര ചലച്ചിത്ര മേളകളിലും തിളക്കമാർന്ന നേട്ടവുമായി ബീഇൻ മീഡിയ ഗ്രൂപ്പിന്റെ മുൻനിര നെറ്റ്‌വർക്കായ ബീഇൻ സ്പോർട്സ് (beIN SPORTS). സ്വിറ്റ്‌സർലൻഡിലെ ലോസാനിൽ നടന്ന ചടങ്ങിൽ ബീഇൻ സ്പോർട്സിന്റെ രണ്ട് ഒറിജിനൽ പ്രൊഡക്ഷനുകളാണ് ലോകത്തെ മികച്ച പത്ത് എൻട്രികളിൽ ഇടംപിടിച്ചത്.
​ബീഇൻ സ്‌പോർട്‌സ് ജേണലിസ്റ്റ് മുഹമ്മദ് അൽനഖല നിർമ്മിച്ച “In Gaza, Hope Always Rises from the Rubble” എന്ന ഹ്രസ്വചിത്രവും “Palestine: One Jersey, Many Roots” എന്ന ഡോക്യുമെന്ററിയുമാണ് ഈ നേട്ടം കൈവരിച്ചത്.
യുദ്ധക്കെടുതികൾക്കിടയിലും തളരാത്ത ഗസയിലെ കായികതാരങ്ങളുടെ അതിജീവനത്തിന്റെ കഥ പറയുന്ന ഈ ചിത്രം ഏഷ്യയിൽ ഒന്നാം സ്ഥാനവും ആഗോളതലത്തിൽ ആറാം സ്ഥാനവും കരസ്ഥമാക്കി. കൂടാതെ, മനുഷ്യാവകാശ വിഷയങ്ങൾ ഉയർത്തിക്കാട്ടിയതിന് പ്രത്യേക പുരസ്‌കാരവും (Human Rights Special Commendation) ഈ ചിത്രം നേടി.ഫലസ്തീൻ ദേശീയ ഫുട്ബോൾ ടീമിന്റെ പോരാട്ടവീര്യവും കായികരംഗം എങ്ങനെ ഫലസ്തീനികളുടെ സ്വത്വത്തിന്റെയും ഐക്യത്തിന്റെയും പ്രതീകമാകുന്നു എന്നും വിവരിക്കുന്ന ഈ ഡോക്യുമെന്ററി ഏഷ്യയിൽ രണ്ടാം സ്ഥാനം നേടി.പുരസ്കാര നേട്ടത്തിന് പുറമെ, ഫ്രാൻസിലെ ബ്യൂസോളിൽ കോട്ട് ഡി അസൂർ ഇന്റർനാഷണൽ സ്‌പോർട്‌സ് ഫിലിം ഫെസ്റ്റിവലിലേക്കും, തുർക്കിയിലെ ഇസ്താംബുൾ സ്‌പോർട്‌സ് ഫിലിം ഫെസ്റ്റിവൽ 2026-ലേക്കും ഈ ഡോക്യുമെന്ററി പ്രദർശനത്തിനായി തിരഞ്ഞെടുക്കപ്പെട്ടിട്ടുണ്ട്. നിലവിൽ മിഡിൽ ഈസ്റ്റ്, നോർത്ത് ആഫ്രിക്ക മേഖലകളിൽ ബീഇന്നിന്റെ ഒടിടി പ്ലാറ്റ്‌ഫോമായ 'ടോഡിൽ' (TOD) ഈ ചിത്രം ലഭ്യമാണ്.
​ലോകമെമ്പാടുമുള്ള 130 രാജ്യങ്ങളിൽ നിന്നായി ലഭിച്ച 1,987 എൻട്രികളിൽ നിന്നാണ് ബീഇൻ സ്പോർട്സ് ഈ നേട്ടം കൈവരിച്ചത്. ഉയർന്ന നിലവാരമുള്ള ഉള്ളടക്കത്തിലൂടെയും സ്വാധീനം ചെലുത്തുന്ന കഥപറച്ചിലിലൂടെയും ആഗോളതലത്തിൽ പ്രേക്ഷകരെ ആകർഷിക്കാൻ തങ്ങൾക്ക് കഴിയുന്നു എന്നതിന്റെ തെളിവാണ് ഈ അംഗീകാരമെന്ന് ബീഇൻ മീഡിയ ഗ്രൂപ്പ് അറിയിച്ചു.