തിരുവനന്തപുരം: അഡ്വക്കേറ്റ്സ് ആക്ടിനും പ്രൊഫഷണൽ എത്തിക്സിനും (ചട്ടങ്ങൾക്കും) വിരുദ്ധമായി സമൂഹമാധ്യമങ്ങൾ വഴി റീലുകളും പരസ്യ പ്രചാരണങ്ങളും വ്യാപകമായി നടത്തുന്ന അഭിഭാഷകർക്കെതിരെ ശക്തമായ അച്ചടക്ക നടപടി സ്വീകരിക്കാൻ ബാർ കൗൺസിൽ ഓഫ് കേരള തീരുമാനിച്ചു. ഇതുസംബന്ധിച്ച് നിരവധി പരാതികൾ ലഭിച്ചതിന്റെ പശ്ചാത്തലത്തിൽ, 2026 നവംബർ 8-ന് ചേർന്ന ബാർ കൗൺസിൽ യോഗത്തിലാണ് ഈ നിർണ്ണായക തീരുമാനം എടുത്തത്.
പ്രൊഫഷണൽ മര്യാദകൾ ലംഘിച്ച് സോഷ്യൽ മീഡിയ മുഖേന ഔദ്യോഗിക പദവിയെയോ തൊഴിലിനെയോ ദുരുപയോഗം ചെയ്ത് പ്രചരണം നടത്തുന്നവർക്കെതിരെ ഇനി മുതൽ കർശന നിലപാട് സ്വീകരിക്കും. ഇത്തരം പരസ്യങ്ങളോ പ്രചാരണങ്ങളോ ബാർ കൗൺസിലിന്റെ ശ്രദ്ധയിൽപ്പെട്ടാൽ യാതൊരുവിധ പരാതികൾക്കും കാത്തുനിൽക്കാതെ suo moto (സ്വമേധയാ) ആയി അച്ചടക്ക നടപടി (Disciplinary Action) സ്വീകരിക്കുമെന്നും യോഗം വ്യക്തമാക്കിയതായി ബാർ കൗൺസിൽ ഓഫ് കേരള ചെയർമാൻ അഡ്വ. ജി. മുരളീധരൻ അറിയിച്ചു.
