ദോഹ: ദോഹ ഖത്തർ നാഷണൽ കൺവെൻഷൻ സെന്ററിൽ (QNCC) ഇന്ന് (സെപ്റ്റംബർ 7) തുടക്കമാകുന്ന രണ്ടാമത് ഓട്ടോണമസ് ഇ-മോബിലിറ്റി ഫോറത്തിന്റെ (AEMOB 2026) സിൽവർ സ്പോൺസറായി മുവാസലാത്ത് (കർവ) പങ്കാളിയാകുന്നു. സെപ്റ്റംബർ 9 വരെ നീളുന്ന ഫോറത്തിൽ സുസ്ഥിരവും ആധുനികവുമായ യാത്രാസൗകര്യങ്ങൾ വികസിപ്പിക്കുന്നതിൽ കമ്പനിയുടെ സാങ്കേതിക മുന്നേറ്റങ്ങളും കാഴ്ചപ്പാടുകളും അവതരിപ്പിക്കും.
ഖത്തറിലെ പൊതുഗതാഗത രംഗത്ത് സുരക്ഷിതവും സ്മാർട്ടുമായ സാങ്കേതികവിദ്യകൾ നടപ്പിലാക്കുന്നതിലും ഭാവി യാത്രാ പദ്ധതികൾ രൂപീകരിക്കുന്നതിലും മുവാസലാത്തിന്റെ പങ്ക് വ്യക്തമാക്കുന്ന ചർച്ചകളിൽ കമ്പനി പ്രതിനിധികൾ പങ്കെടുക്കും. മുവാസലാത്തിന്റെ ഐ.ടി വിഭാഗം എക്സിക്യൂട്ടീവ് ഡയറക്ടർ ഡോ. ഹമേദ് അൽഷൈബാനി, ടെക്നിക്കൽ അഫയേഴ്സ് ആന്റ് ഇന്നൊവേഷൻ മാനേജർ ഡോ. റഫാ അൽഅറൂഖി എന്നിവർ വിവിധ പാനൽ ചർച്ചകളിൽ കമ്പനിയെ പ്രതിനിധീകരിക്കും.
