ദോഹ: ഖത്തർ ഫിലറ്റലിക് ആൻഡ് ന്യൂമിസ്മാറ്റിക് സെന്റർ, സാംസ്കാരിക മന്ത്രാലയത്തിന്റെ ഖത്തർ ദാർ അൽ കുതുബുമായി ചേർന്ന് ‘അഥർ ആൻഡ് കിതാബ്’ എന്ന പേരിൽ രണ്ട് ദിവസത്തെ പ്രത്യേക പ്രദർശനം സംഘടിപ്പിച്ചു. ഖത്തറിന്റെ തപാൽ ചരിത്രവും നാണയ പാരമ്പര്യവും പ്രതിഫലിപ്പിക്കുന്ന നിരവധി അപൂർവ ശേഖരങ്ങളാണ്  പ്രദർശിപ്പിച്ചത്.
1950-ൽ ഖത്തറിലെ ആദ്യ പോസ്റ്റ് ഓഫീസ് ആരംഭിച്ചതിന് ശേഷം ഉണ്ടായ തപാൽ വ്യവസ്ഥയുടെ പുരോഗതിയാണ് പ്രദർശനത്തിന്റെ പ്രധാന ആകർഷണം. ആ വർഷം മുതൽ പുറത്തിറങ്ങിയ തപാൽ സ്റ്റാമ്പുകളുടെ ചരിത്രവും അതിന്റെ രൂപകല്പനാ വൈവിധ്യവും ഇവിടെ അവതരിപ്പിച്ചു.
ഷെയ്ഖ് അലി ബിൻ അബ്ദുല്ല അൽ താനിയുടെ ചിത്രങ്ങളോട് കൂടിയ ഉപയോഗത്തിലാവാത്ത മോഡൽ സ്റ്റാമ്പുകളും, വിദ്യാഭ്യാസം, സംസ്കാരം, സാഹിത്യം തുടങ്ങിയ വിഷയങ്ങളെ ആസ്പദമാക്കിയ വിജയകരമായ അന്താരാഷ്ട്ര പുരസ്കാരജേതൃ സ്റ്റാമ്പുകളും പ്രദർശനത്തിൽ ഉൾപ്പെടുത്തിയിട്ടുണ്ട്. അറബിയിലും ഇംഗ്ലീഷിലും തയ്യാറാക്കിയ വിവരാവലികൾ പ്രദർശനം കൂടുതൽ വിജ്ഞാനപരമാക്കുന്നു.
പ്രദർശനത്തോടനുബന്ധിച്ച് നടന്ന സെമിനാറിൽ, ലോകത്തെയും ഖത്തറിലെയും തപാൽ സംവിധാനത്തിന്റെ ചരിത്രത്തെക്കുറിച്ച് സെന്റർ ഡയറക്ടർ ഹുസൈൻ രജബ് അൽ ഇസ്മായിൽ പ്രബന്ധം അവതരിപ്പിച്ചു. ദാർ അൽ കുതുബിൽ വെള്ളിയാഴ്ച(ഒക്ടോബർ 17) 209 അപൂർവ നാണയങ്ങളും സ്റ്റാമ്പുകളും ഉൾപ്പെടുന്ന ലേലം (auction) സംഘടിപ്പിക്കുമെന്നും അധികൃതർ അറിയിച്ചു.
തപാൽ-നാണയ ശേഖരണത്തിന്റെ സമ്പന്ന പാരമ്പര്യം സംരക്ഷിക്കുകയും പുതിയ തലമുറയ്ക്ക് പരിചയപ്പെടുത്തുകയും ചെയ്യുക എന്നതാണ് പ്രദർശനത്തിന്റെ പ്രധാന ലക്ഷ്യം. ഖത്തറിന്റെ ചരിത്രസ്മാരകങ്ങളെ സംരക്ഷിക്കുന്നതിലും പ്രചരിപ്പിക്കുന്നതിലുംപ്രദർശനം വേറിട്ട അടയാളമാകുന്നു.