ദോഹ: അസ്പയർ സോൺ ഫൗണ്ടേഷൻ (AZF) ഖത്തർ സ്പോർട്സ് ഫോർ ഓൾ ഫെഡറേഷനുമായി സഹകരിച്ച് സംഘടിപ്പിക്കുന്ന 12-ാമത് റമദാൻ സ്പോർട്സ് ഫെസ്റ്റിവലിൽ ആവേശകരമായ മത്സരങ്ങൾ തുടരുന്നു. ഫാമിലി ഫൺ റൺ, വനിതകളുടെ 3x3 ബാസ്‌ക്കറ്റ്‌ബോൾ ടൂർണമെന്റ് എന്നിവയിലെ വിജയികളെ കഴിഞ്ഞ ദിവസം പ്രഖ്യാപിച്ചു.അസ്പയർ പാർക്കിൽ നടന്ന 1 കിലോമീറ്റർ, 3 കിലോമീറ്റർ ഓട്ടമത്സരങ്ങളിൽ പ്രായഭേദമന്യേ നിരവധിയാളുകൾ പങ്കെടുത്തു. പുരുഷന്മാരുടെ 3 കിലോമീറ്റർ ഓട്ടത്തിൽ സക്കറിയ ഗ്രഹാം ഒന്നാം സ്ഥാനം നേടി. ഫൈസൽ യൂസഫ്, നായിഫ് അൽ ഷമ്മരി എന്നിവർ യഥാക്രമം രണ്ടും മൂന്നും സ്ഥാനങ്ങൾ കരസ്ഥമാക്കി. വനിതാ വിഭാഗത്തിൽ അജിയോൾ ഖബീബുലിന ഒന്നാമതെത്തി. ആൺകുട്ടികളുടെ 13 വയസ്സിന് മുകളിലുള്ളവരുടെ വിഭാഗത്തിൽ അർജൻ രാകേഷ് ഒന്നാം സ്ഥാനം നേടി.ലേഡീസ് സ്പോർട്സ് ഹാളിൽ നടന്ന 3x3 ബാസ്‌ക്കറ്റ്‌ബോൾ ടൂർണമെന്റിൽ അൽ ഗറാഫ-1 ചാമ്പ്യന്മാരായി. ഫൈനലിൽ അൽ മുഹാരിബൂണിനെ 21–12 എന്ന സ്കോറിനാണ് അവർ പരാജയപ്പെടുത്തിയത്. അൽ ഗറാഫയുടെ ഈമാൻ ജലാലി ടൂർണമെന്റിലെ മികച്ച താരമായി തിരഞ്ഞെടുക്കപ്പെട്ടു.വിവിധ രാജ്യങ്ങളുടെ എംബസികൾ മാറ്റുരയ്ക്കുന്ന ഫുട്ബോൾ ടൂർണമെന്റിൽ നാലാം ദിവസം നടന്ന മത്സരത്തിൽ ഇന്ത്യ ഏകപക്ഷീയമായ മുന്നേറ്റം നടത്തി. ഫിൻലൻഡിനെ 12-3 എന്ന സ്കോറിനാണ് ഇന്ത്യ പരാജയപ്പെടുത്തിയത്. മറ്റ് മത്സരങ്ങളിൽ ഒമാൻ ദക്ഷിണാഫ്രിക്കയെയും (6-1), ചാഡ് മാലിയെയും (6-5) പരാജയപ്പെടുത്തി. മാർച്ച് ഒന്നിന് പ്രാഥമിക റൗണ്ട് അവസാനിക്കും.
​ബീച്ച് വോളിബോൾ മത്സരങ്ങൾ ഇന്ന് മുതൽ അസ്പയർ അക്കാദമിയിലെ മണൽ കോർട്ടിൽ ആരംഭിക്കും. ഫെബ്രുവരി 28 വരെയാണ് വോളിബോൾ മത്സരങ്ങൾ ക്രമീകരിച്ചിരിക്കുന്നത്.