നാഗോയ: ഇരുപതാമത് ഏഷ്യൻ ഗെയിംസ് ബീച്ച് വോളിബോളിൽ ഖത്തറിന്റെ ഒന്നാം നമ്പർ സഖ്യമായ ശരീഫ് യൂനസ് - അഹമ്മദ് തിജാൻ ജോഡി പ്രീക്വാർട്ടറിൽ (റൗണ്ട് ഓഫ് 16) പ്രവേശിച്ചു. ഗ്രൂപ്പ് എയിലെ നിർണായക പോരാട്ടത്തിൽ ഒമാന്റെ ഹൂദ് അൽ ജൽബൂബി - മാസിൻ അൽ ഹാഷ്മി സഖ്യത്തെ നേരിട്ടുള്ള സെറ്റുകൾക്ക് പരാജയപ്പെടുത്തിയാണ് ഖത്തർ മുന്നേറിയത്. സ്കോർ: 21-19, 21-19.
തുടർച്ചയായ മൂന്നാം തവണയും സ്വർണം ലക്ഷ്യമിട്ടാണ് ഖത്തർ ടീം ഇത്തവണ ഇറങ്ങുന്നത്. 2018-ലെ പാലെംബാങ്, 2022-ലെ ഹാംഗ്ഷൂ ഏഷ്യൻ ഗെയിംസുകളിലും ഖത്തറിനായി ഇവർ സ്വർണം നേടിയിരുന്നു.
അതേസമയം, മൂസ അൽ ഖൈർ - മുഹമ്മദ് ഇഹാബ് എന്നിവരടങ്ങിയ ഖത്തറിന്റെ ബി ടീമും പ്രീക്വാർട്ടർ യോഗ്യത നേടിയിട്ടുണ്ട്. ഗ്രൂപ്പ് ഡിയിൽ തായ്ലൻഡ് എ ടീമിന് പിന്നിൽ രണ്ടാം സ്ഥാനക്കാരായാണ് ഇവർ അടുത്ത റൗണ്ടിലേക്ക് കടന്നത്.
ഖത്തറിന് പുറമെ ചൈന, ജപ്പാൻ, ഇന്തോനേഷ്യ, ഇറാൻ, തായ്ലൻഡ്, കസാക്കിസ്ഥാൻ, വിയറ്റ്നാം എന്നീ രാജ്യങ്ങളിൽ നിന്നുള്ള ടീമുകളും പ്രീക്വാർട്ടറിലെത്തിയിട്ടുണ്ട്. ഒക്ടോബർ 4 വരെയാണ് ജപ്പാനിലെ ഐച്ചി-നാഗോയയിൽ ഏഷ്യൻ ഗെയിംസ് മത്സരങ്ങൾ നടക്കുന്നത്.
