സെക്രട്ടറിയേറ്റ് പടിക്കൽ 266 ദിവസം നീണ്ടുനിന്ന രാപ്പകൽ സമരം അവസാനിക്കാൻ ആശ പ്രവർത്തകരുടെ തീരുമാനം. ഇതുസംബന്ധിച്ച പ്രഖ്യാപനം കേരളപ്പിറവി ദിനമായ നാളെ നടത്തും. അതേസമയം, ഓണറേറിയം വർധന ആവശ്യപ്പെട്ടുള്ള സമരം തുടരാനാണ് തീരുമാനം. ഇനി സമരം ജില്ലകൾ കേന്ദ്രീകരിച്ച് നടത്താനാണ് സമരസമിതിയുടെ തീരുമാനം.
സമരങ്ങൾ വഴിയാണ് ആശ പ്രവർത്തകർ എല്ലാ അവകാശങ്ങളും നേടിയെടുത്തതെന്ന് സമരസമിതി നേതാവ് എം. എ. ബിന്ദു പറഞ്ഞു. “സമരത്തെ അപഹസിക്കാൻ ശ്രമിച്ചവർ പലരും ഉണ്ടായിരുന്നു. പക്ഷേ സ്ത്രീകളുടെ ഉറച്ച മുന്നേറ്റമാണ് വിജയത്തിലേക്ക് നയിച്ചത്. പട്ടിണിക്കെതിരായ പോരാട്ടമായിരുന്നു ഇത്. ഇപ്പോൾ സമരത്തിന്റെ രൂപം മാത്രമാണ് മാറുന്നത്. മിനിമം കൂലി ലഭിക്കുംവരെ ഈ പോരാട്ടം തുടരും” - അവർ കൂട്ടിച്ചേർത്തു.
ഓണറേറിയം വർധന സമര നേട്ടമായിട്ടാണ് ആശ പ്രവർത്തകർ കാണുന്നത്. ആശ പ്രവർത്തകരുടെ ഓണറേറിയം 7,000 രൂപയിൽ നിന്ന് 8,000 രൂപയാക്കിയതോടെ സർക്കാർ തങ്ങളുടെ സമരത്തിന് മുന്നിൽ വഴങ്ങിയെന്നാണ് സമരസമിതി വിലയിരുത്തുന്നത്. സർക്കാരിന്റെ തീരുമാനത്തിന് പിന്നിൽ തങ്ങളുടെ ദീർഘകാല പോരാട്ടമാണ് കാരണമെന്നും അവർ ആവർത്തിക്കുന്നു. എന്നാൽ അവരുടെ പ്രധാന ആവശ്യം 21,000 രൂപയാക്കി വർധിപ്പിക്കാനാണ്.
സമരത്തിന്റെ അവസാനഘട്ടത്തിൽ ക്രെഡിറ്റ് നേടാൻ സി.ഐ.ടി.യു അടക്കമുള്ള സംഘടനകളുടെ ശ്രമങ്ങൾക്കിടയിലാണ് സമരസമിതിയുടെ ഈ നിർണ്ണായക നീക്കം.
