​ദോഹ: പരിസ്ഥിതി സംരക്ഷണത്തിലും ജല മാനേജ്‌മെന്റിലും വിപ്ലവകരമായ മാറ്റങ്ങൾക്കൊരുങ്ങി ഖത്തർ പരിസ്ഥിതി വ്യതിയാന മന്ത്രാലയം (MoECC). ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള ആധുനിക ഡിജിറ്റൽ സാങ്കേതികവിദ്യകൾ ഉപയോഗിച്ച് രാജ്യത്തെ പരിസ്ഥിതി നിരീക്ഷണം ശക്തമാക്കാനും, വ്യാവസായിക മേഖലകളിൽ നിന്നുള്ള ജലം നൂതന രീതികളിൽ ശുദ്ധീകരിച്ച് പുനരുപയോഗിച്ചുകൊണ്ട് ജലക്ഷാമം നേരിടാനുമുള്ള വലിയ പദ്ധതികളിലാണ് മന്ത്രാലയം ഇപ്പോൾ ശ്രദ്ധകേന്ദ്രീകരിക്കുന്നത്.
​ആഗോളതലത്തിൽ തന്നെ പരിസ്ഥിതി വെല്ലുവിളികൾ നേരിടാൻ പുത്തൻസാങ്കേതികവിദ്യകൾപ്രയോജനപ്പെടുത്തുന്നതിന്റെ ഭാഗമായാണ് ഖത്തറിന്റെ ഈ നിർണ്ണായക ചുവടുവെപ്പ്. അത്യാധുനിക AI സംവിധാനങ്ങൾ വഴി വായുവിന്റെ ഗുണനിലവാരം, കാലാവസ്ഥാ വ്യതിയാനങ്ങൾ, മണ്ണൊലിപ്പ് എന്നിവ കൃത്യമായി നിരീക്ഷിക്കാനും പ്രതിരോധ നടപടികൾ സ്വീകരിക്കാനും സാധിക്കും. അതോടൊപ്പം, ഫാക്ടറികളിൽ നിന്നും മറ്റ് വ്യാവസായിക സ്ഥാപനങ്ങളിൽ നിന്നും പുറന്തള്ളുന്ന മലിനജലം കാര്യക്ഷമമായി ശുദ്ധീകരിച്ച് കാർഷിക-വ്യവസായ ആവശ്യങ്ങൾക്ക് ഉപയോഗിക്കുന്നതിലൂടെ രാജ്യത്തെ ഭൂഗർഭ ജലസ്രോതസ്സുകളുടെ മേലുള്ള സമ്മർദ്ദം കുറയ്ക്കാൻ സാധിക്കുമെന്നും മന്ത്രാലയ വൃത്തങ്ങൾ വ്യക്തമാക്കി.പ്രകൃതിയിൽ നിന്ന് പ്രചോദനം ഉൾക്കൊണ്ട്; കാലാവസ്ഥയ്ക്കായി, നമ്മുടെ ഭാവിക്കായി" (Inspired by Nature. For Climate. For Our Future) എന്ന ആഗോള പ്രമേയത്തോടെ ഖത്തറിൽ ലോക പരിസ്ഥിതി ദിനം വിപുലമായ പരിപാടികളോടെ ആചരിക്കുന്നത്.ഖത്തർ നാഷണൽ വിഷൻ 2030-ന്റെ സുസ്ഥിരതാ ലക്ഷ്യങ്ങൾ മുൻനിർത്തി പരിസ്ഥിതി വ്യതിയാന മന്ത്രാലയവും (MoECC) നഗരസഭ മന്ത്രാലയവും സംയുക്തമായാണ് രാജ്യത്തുടനീളം വിപുലമായ സുസ്ഥിരതാ കാമ്പെയ്‌നുകൾ സംഘടിപ്പിക്കുന്നത്.ഭാവി തലമുറയ്ക്കായി പ്രകൃതിവിഭവങ്ങൾ സംരക്ഷിക്കേണ്ടത് ഓരോ പൗരന്റെയും കൂട്ടായ ഉത്തരവാദിത്തമാണെന്ന് പരിസ്ഥിതി വ്യതിയാന മന്ത്രി ഡോ. അബ്ദുല്ല ബിൻ അബ്ദുൽഅസീസ് ബിൻ തുർക്കി അൽ സുബൈയി ഓർമ്മിപ്പിച്ചു.
ദോഹ ഫെസ്റ്റിവൽ സിറ്റി, മാൾ ഓഫ് ഖത്തർ തുടങ്ങിയ പ്രമുഖ വാണിജ്യ കേന്ദ്രങ്ങളിൽ പരിസ്ഥിതി മന്ത്രാലയത്തിന്റെ നേതൃത്വത്തിൽ സംവേദനാത്മക (Interactive) കുടുംബ പവലിയനുകൾ ഒരുക്കിയിട്ടുണ്ട്. ജൈവവൈവിധ്യ സംരക്ഷണം, പ്ലാസ്റ്റിക് മലിനീകരണം കുറയ്ക്കൽ എന്നിവയെക്കുറിച്ചുള്ള ശില്പശാലകളും കുട്ടികൾക്കായുള്ള മത്സരങ്ങളും സംഘടിപ്പിച്ചിട്ടുണ്ട്.