ദോഹ:ഡിജിറ്റൽ പരിവർത്തനത്തിന്റെ ഭാഗമായി ഹുവാവേയുമായി (Huawei) സഹകരിച്ച് ഖത്തർ യൂണിവേഴ്സിറ്റി അത്യാധുനിക 'സ്മാർട്ട് ക്ലാസ്റൂം' സംവിധാനം ആരംഭിച്ചു. ആർട്ടിഫിഷ്യൽ ഇന്റലിജൻസ് (AI), ക്ലൗഡ് കമ്പ്യൂട്ടിംഗ് എന്നിവയിൽ അധിഷ്ഠിതമായ ഈ പദ്ധതി, കൂടുതൽ സംവേദനാത്മകവും (Interactive) വഴക്കമുള്ളതുമായ പഠനാനുഭവം വിദ്യാർത്ഥികൾക്ക് വാഗ്ദാനം ചെയ്യുന്നു.
ഇൻ്ററാക്ടീവ് ഡിസ്‌പ്ലേകൾ, ലക്ചർ റെക്കോർഡിംഗ് സിസ്റ്റങ്ങൾ, ഡാറ്റ അനാലിസിസ് പ്ലാറ്റ്‌ഫോമുകൾ എന്നിവ സ്മാർട്ട് ക്ലാസ്റൂമുകളിൽ സജ്ജീകരിച്ചിരിക്കുന്നു.
വിദ്യാർത്ഥികൾക്ക് നേരിട്ടോ ഓൺലൈനായോ ക്ലാസുകളിൽ പങ്കെടുക്കാനും റെക്കോർഡ് ചെയ്ത പാഠഭാഗങ്ങൾ എപ്പോൾ വേണമെങ്കിലും ആക്സസ് ചെയ്യാനും സാധിക്കും.ഡിജിറ്റൽ സമ്പദ്‌വ്യവസ്ഥയ്ക്ക് ആവശ്യമായ പ്രായോഗിക നൈപുണ്യങ്ങൾ വിദ്യാർത്ഥികളിൽ വളർത്താൻ ഈ എഐ അധിഷ്ഠിത സംവിധാനം സഹായിക്കും.ഗവേഷണങ്ങൾക്കായി ഹൈ-പെർഫോമൻസ് കമ്പ്യൂട്ടിംഗ് സൗകര്യങ്ങളും ഒരു പുതിയ എഐ ലാബും യൂണിവേഴ്സിറ്റി വിഭാവനം ചെയ്യുന്നതാണ് പദ്ധതി.
പ്രാദേശികവും അന്തർദ്ദേശീയവുമായ ഡിജിറ്റൽ പരിവർത്തനത്തിൽ ഒരു പ്രധാന പങ്കുവഹിക്കാനും വിദ്യാഭ്യാസ നിലവാരം മെച്ചപ്പെടുത്താനുമാണ് ഈ പദ്ധതിയിലൂടെ ഖത്തർ യൂണിവേഴ്സിറ്റി ലക്ഷ്യമിടുന്നത്.
