ദോഹ: ഖത്തറിലെ റോഡ് സുരക്ഷ വർദ്ധിപ്പിക്കുന്നതിനും ട്രാഫിക് മാനേജ്‌മെന്റ് കാര്യക്ഷമമാക്കുന്നതിനും ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യകൾ പ്രയോജനപ്പെടുത്തുന്നതിനെക്കുറിച്ച് കത്താറയിൽ നടന്ന സാങ്കേതിക സംവാദം ചർച്ച ചെയ്തു. 'റോഡ് സുരക്ഷയും ആർട്ടിഫിഷ്യൽ ഇന്റലിജൻസും: എഐ ഉപയോഗിച്ച് ട്രാഫിക് സുരക്ഷ എങ്ങനെ മെച്ചപ്പെടുത്താം' എന്ന പ്രമേയത്തിൽ നടന്ന 'കത്താറ ടെക് 28' ഫോറത്തിലാണ് വിദഗ്ധർ അഭിപ്രായങ്ങൾ പങ്കുവെച്ചത്.വാഹനങ്ങളുടെ എണ്ണം വർദ്ധിക്കുന്ന സാഹചര്യത്തിൽ, ട്രാഫിക് സ്ഥിതിവിവരക്കണക്കുകൾ വിശകലനം ചെയ്യാനും തിരക്കേറിയ സ്ഥലങ്ങൾ മുൻകൂട്ടി തിരിച്ചറിയാനും എഐ സാങ്കേതികവിദ്യ സഹായിക്കുന്നു.റോഡിലെ ഡ്രൈവർമാരുടെ ശൈലികൾ നിരീക്ഷിക്കാനും അപകടസാധ്യതകൾ കുറയ്ക്കാനും ഈ സാങ്കേതികവിദ്യയിലൂടെ സാധിക്കുമെന്ന് എഞ്ചിനീയേഴ്‌സ് അസോസിയേഷൻ അംഗം എഞ്ചിനീയർ ഖാലിദ് അബ്ദുൽറഹീം അൽ സയ്യിദ് വ്യക്തമാക്കി.മൗസലാത്ത് (കർവ) പോലുള്ള പൊതുഗതാഗത സംവിധാനങ്ങളിൽ യാത്രക്കാരുടെ സുരക്ഷയ്ക്കും വാഹനങ്ങളുടെ കാര്യക്ഷമത വർദ്ധിപ്പിക്കുന്നതിനും ഡിജിറ്റൽ പരിവർത്തനം വലിയ മാറ്റങ്ങൾ കൊണ്ടുവന്നതായി അധികൃതർ പറഞ്ഞു. ഗതാഗത മേഖലയിൽ എഐ ഉപയോഗിക്കുമ്പോൾ യാത്രക്കാരുടെ വിവരങ്ങൾ സംരക്ഷിക്കുന്നതിനും സൈബർ ഭീഷണികൾ തടയുന്നതിനും അതീവ ജാഗ്രത വേണമെന്ന് കർവ ജനറൽ അഡ്വൈസർ ഫത്ഹി റദ്വാൻ ഓർമ്മിപ്പിച്ചു.ഖത്തറിലെ ട്രാഫിക് പ്ലാനിംഗ് ഓരോ പ്രദേശത്തിന്റെയും ഭൂമിശാസ്ത്രപരമായ പ്രത്യേകതകൾ പഠിച്ചാണ് തയ്യാറാക്കുന്നതെന്ന് ട്രാഫിക് അവയർനസ് ഡിപ്പാർട്ട്‌മെന്റിലെ ക്യാപ്റ്റൻ ഹമദ് സലേം അൽ നെഹാബ് പറഞ്ഞു. മാറുന്ന സാങ്കേതിക വിദ്യകൾക്കനുസരിച്ച് നിയമസംവിധാനങ്ങളിലും മാറ്റങ്ങൾ കൊണ്ടുവരേണ്ടതിന്റെ ആവശ്യകതയും ഫോറം ചൂണ്ടിക്കാട്ടി.നഗരവൽക്കരണവും സാങ്കേതിക വളർച്ചയും ഒരേപോലെ മുന്നേറുന്ന ഖത്തറിൽ, സുരക്ഷിതവും സുസ്ഥിരവുമായ ഗതാഗത സംവിധാനം കെട്ടിപ്പടുക്കാൻ ആർട്ടിഫിഷ്യൽ ഇന്റലിജൻസ് അനിവാര്യമാണെന്ന് കത്താറ ടെക് ഫോറം വിലയിരുത്തി.