
കൊച്ചി / തിരുവനന്തപുരം: അരിയിൽ ഷുക്കൂർ വധക്കേസിൽ സി.പി.എം നേതാക്കളായ പി. ജയരാജൻ, ടി.വി. രാജേഷ് എന്നിവരടക്കം 18 പ്രതികളെ കുറ്റവിമുക്തരാക്കിയ സി.ബി.ഐ പ്രത്യേക കോടതി വിധിക്കെതിരെ അപ്പീൽ നൽകുമെന്ന് ഷുക്കൂറിന്റെ കുടുംബവും സംസ്ഥാന സർക്കാരും. വിധിന്യായത്തിന്റെ പകർപ്പ് വിശദമായി പരിശോധിച്ച ശേഷം കുടുംബവുമായി ആലോചിച്ച് അപ്പീൽ നടപടികൾ സ്വീകരിക്കുമെന്ന് മുഖ്യമന്ത്രി വി.ഡി. സതീശൻ വ്യക്തമാക്കി.
സി.പി.എം നേതാക്കൾക്ക് ഗൂഢാലോചനയിലുള്ള പങ്ക് പുറത്തുകൊണ്ടുവരേണ്ടത് അനിവാര്യമാണെന്നും ഷുക്കൂറിന്റെ കുടുംബത്തിന് നീതി ലഭിക്കാൻ സർക്കാർ ഒപ്പം നിൽക്കുമെന്നും മുഖ്യമന്ത്രി പറഞ്ഞു. സാക്ഷികൾ ഭയന്നിട്ടാണ് കോടതിയിൽ ഹാജരാകാതിരുന്നതെന്നും വിധിക്കെതിരെ ഹൈക്കോടതിയെ സമീപിക്കുമെന്നും മന്ത്രി പി.കെ. കുഞ്ഞാലിക്കുട്ടിയും ഷുക്കൂറിന്റെ സഹോദരൻ ദാവൂദ് മുഹമ്മദും പ്രതികരിച്ചു. അതേസമയം, കേസിൽ വിധിന്യായം പൂർണ്ണമായി ലഭിച്ച ശേഷം തുടർനടപടികൾ തീരുമാനിക്കുമെന്ന് പി. ജയരാജൻ പ്രതികരിച്ചു.










